“Iueyi tonal Jehová ayakmo uejka kajki”: ma tiyetokan tiixtlamatkej
“Matimoskaltikah itech totlaneltokalis iwa matiyetokah kemi Cristo” (HEB. 6:1).
1, 2. ¿Tlen okinpaleui tokniuan tlen ochantiayaj Jerusalén uan Judea ma cholokan?
SE TONAL imachtijkauan Jesús omotokijkej inauak uan okitlajtlanijkej: “¿Tlen kiteititis yitika uan ijkuak yitlamis nochi tlen onka itech tlaltikpak?”. Ye okinmilui se profecía tlen omochi itech achto siglo. Okinmilui opanoskia itlaj tlen kiteititiskia yitlamis nochi. Ijkuak ijkon kitaskiaj “akimeh yetoskeh kan tlali de Judea, macholojtiwetsikah kan tepemeh” (Mat. 24:1-3, TNM; 15-22). ¿Kajsikamatiskiaj imachtijkauan Jesús tlen okinmilui uan choloskiaj?
2 Kanaj treinta xiuitl satepan, itech xiuitl 61, apóstol Pablo okintlajkuilili tokniuan hebreos tlen ochantiayaj Jerusalén uan Judea itlaj tlen omonekiaya ma kimatikan. ¿Tleka okintlajkuilili? Para kimatiskiaj tlen kichiuaskiaj. Nion yejuan nion Pablo okimatiayaj ok opoliuiaya san makuili xiuitl uan peuaskia “tlaijyowílistli” (Mat. 24:21). Itech xiuitl 66, Cestio Galo iuan isoldados okiyaualojkej Jerusalén para kimoaxkatiskiaj pero ijkuak yikalakiskiaj, Cestio Galo okinuikak isoldados. Ijkon tokniuan tlen okatkaj Jerusalén uelis choloskiaj.
3. ¿Tlen okinmilui apóstol Pablo tokniuan hebreos uan tleka?
3 Tokniuan omonekiaya kajsikamatiskej opanotoka tlen Jesús okinmilui uan omonekiaya choloskej, pero sekimej ‘yolik okajsikamatkej’. Ken yetoskiaj ok konemej uan omonekiaya kinmakaskej ‘leche’ (xiktlajtolti Hebreos 5:11-13). Oksekimej maski yimiak xiuitl omomachtijtokaj, opejkej ‘moixkoyantiaj inawak Dios non yolitok’ (Heb. 3:12). Miakej ayakmo omonechikouayaj maski okimatiayaj ‘itonal Toteko ya walajsiskia’ (Heb. 10:24, 25). Ik non, apóstol Pablo okinmilui: “Ayakmó matikmomachtikah tlan sikinika otechmachtijkeh de Cristo, matimoskaltikah itech totlaneltokalis iwa matiyetokah kemi Cristo” (Heb. 6:1).
4. ¿Tleka miak ipati ma tiijsatokan uan tlen techpaleuis?
4 Axkan tikatej itech tonal kanin mochiuas profecía tlen okijto Jesús. “Iueyi tonal Jehová” kanin kipojpoloskej nochi tlen kinauatia Satanás, “amo uejka kajki” (Sof. 1:14). Ik non, moneki okachi ma tiijsatokan uan ma timoyolchikauakan (1 Ped. 5:8). Tla ijkon tikchiuaj, techpaleuis para amo ma tikilkauakan ayakmo uejka kajki non tonal.
¿Tlen kijtosneki tiyetoskej tiixtlamatkej?
5, 6. (1) ¿Ken tiyetoskej okachi tiixtlamatkej? (2) ¿Tlen moneki tikchiuaskej para tiyetoskej okachi tiixtlamatkej?
5 Apóstol Pablo okinyole tokniuan hebreos ma yetokan ixtlamatkej uan noijki okinmilui ken kichiuaskiaj (xiktlajtolti Hebreos 5:14). Konemej konij “leche” pero akinmej ayakmo konemej “kikuaj tlakuali”, ijkon akinmej ixtlamatkej amo san kimatij tlen moneki, noijki mochijchikauaj para kajsikamatiskej ken mokuayejyekoua toTajtsin Dios (1 Cor. 2:10). Tla kichiuaj tlen momachtiaj, okachi kajsikamatiskej tlen kuali uan tlen amo kuali. Ijkon, ijkuak itlaj kipejpenaskej, moyekanaskej ika principios bíblicos tlen kinpaleuis itech innemilis.
6 Apóstol Pablo okijkuilo: “Moneki okachi matikmopantikah n kualitlájtoli tlan yotikakeh, para amo matimoxelokah itech ojtli non Dios yotechititi” (Heb. 2:1). Para amo timoxeloskej itech tlen toTajtsin Dios yotechmachti, “moneki okachi matikmopantikah” tlen timomachtiaj itech Biblia. Ik non, ma timotlajtlanikan: “¿Nimomachtia san tlen moneki? ¿Nikchiua san tlen nechnauatiaj? ¿Tlen uelis nikchiuas para ajsis itech noyolo tlen nimomachtia uan okachi nitlaneltokas?”. Para tiyetoskej okachi tiixtlamatkej, moneki okachi timochijchikauaskej para timomachtiskej iTlajtol toTajtsin Dios uan titetlakamatiskej.
Kuali ma tikajsikamatikan tlen kijtoua Biblia
7. ¿Ken uelis techpaleuis tla kuali tikajsikamatij iTlajtol toTajtsin Dios?
7 Apóstol Pablo noijki okijkuilo: “Nochi akin yolitok san ika lechi, kijtosneki ayamó kixmati [noso amo kajsikamati] katlie n kuali tlamachtílistli, ken ok konetl” (Heb. 5:13). Para tiyetoskej tiixtlamatkej moneki okachi tikajsikamatiskej tlen toTajtsin Dios techmachtia. Ik non, moneki timomachtiskej Biblia iuan amochmej tlen techmaka “tlakeuali yolmelajki uan ixtlamatki” (Mat. 24:45-47). Ijkon kuali tikajsikamatiskej ken mokuayejyekoua toTajtsin Dios uan tikmatiskej tlen kuali uan tlen amo kuali. Ma tikitakan tlen okijto tokni Rosa: a “Yonechpaleui porque onikchi tlen onechiluijkej, ma niktlajtolti nochipa Biblia. Opanok ome xiuitl oniktlajtolti Biblia uan non sapanoua onechpaleui ma nikixmati akin otechchijchi: onikajsikamatki ken iyelis, tlen kipaktia, noijki onikitak ye chikauak uan ixtlamatki. Nochipa oniktlajtoltiaya Biblia, non onechpaleui ijkuak itlaj onikixnamikiaya itech nonemilis”.
8. ¿Ken techpaleuis tla nochipa tiktlajtoltiaj Biblia?
8 Tla nochipa tiktlajtoltiaj tlen kijtoua Biblia, techpaleuis itech tonemilis (xiktlajtolti Hebreos 4:12). Techpaleuis para uelis tikpatlaskej tlen amo kipaktia toTajtsin Dios uan ijkon tikyolpaktiskej. Ken tikita ¿kox moneki timochijchikauas para okachi tiktlajtoltis Biblia uan timokuayejyekos tlen timomachtia?
9, 10. ¿Tleka moneki kuali tikixmatiskej iTlajtol toTajtsin Dios? ¿Tlen techititia tlen okipanok tokni?
9 Moneki kuali tikajsikamatiskej tlen kijtoua Biblia. Apóstol Pablo okijto akinmej okintlajkuilili okatkaj ken konemej, porque amo okachi omomachtiayaj iTlajtol toTajtsin Dios. Amo okajsikamatiayaj ken kinpaleuiskia tlen omomachtiayaj porque amo okichiuayaj tlen omomachtiayaj. Noijki amo itlaj okimatiayaj porque amo okintekitiltiayaj principios bíblicos ijkuak okipejpenayaj tlen kichiuaskiaj.
10 Tla amo tikchiuaj tlen timomachtiaj, kijtosneki amo tikajsikamatij tlen kijtoua Biblia. Ijkon okipanok tokni Kyle. Ye omokualani iuan se siuatl tlen iuan otekipanouaya. Pero okinekiaya kuali iuan mouikas. ¿Tlen okichi? Okijto: “Onikilnamik tlen kijtoua Romanos 12:18 ‘Asta kan weletis, nomejwah xiktemolikah kenijki nonmoyekwikaskeh ika yolsewílistli iwan nochteh’. Ik non, onikilui oniknekiaya iuan nimotlapouis”. Kuali omotlapouijkej uan siuatl omotlajtlachialti ika tlen okichi Kyle. Tokni saiktlami okijto: “Onimomachti tla timoyekanaj ika principios bíblicos nochi tlen tikchiuaj kuali kisas”.
¿Tlen techpaleuis ma titetlakamatikan?
11. ¿Tlen kiteititia oui titetlakamatiskej ijkuak itlaj tikixnamikij?
11 Ijkuak itlaj tikixnamikij xamo tikitaskej oui tikchiuaskej tlen toTajtsin Dios technauatia. Ma tikitakan tlen okinpanok yiuejkika israelitas. Satepan ijkuak okiskej Egipto opejkej mokualaniaj iuan Moisés uan ayakmo otlaneltokaya itech Jehová. ¿Tleka ijkon okinpanok? Porque amo okipiayaj atl (Éx. 17:1-4). Noijki amo okitlakamatkej tlanauatil tlen okijtouaya amo kinueyichiuaskiaj teotsitsintin maski okichijkej se tlajtolsenkaualistli iuan Jehová ome metstli achto, yejuan okijtojkej kichiuaskiaj nochi tlen kinnauatiskiaj pero amo ijkon okichijkej (Éx. 24:3, 12-18; 32:1, 2, 7-9). ¿Tleka amo otetlakamatkej? ¿Ijkon okichijkej porque Moisés oyajki itech se tepetl tlen itoka Horeb para kiseliskia itlanauatiluan Jehová uan omomojtijkej ma kinteuikan? Amalequitas yokinteuijkaj achto uan Moisés yokinpaleuijka ijkuak okinmajkokuik imauan, pero axkan amo inmiuan okatka. ¿Tlen uelis kichiuaskiaj tla kinteuiskiaj? (Éx. 17:8-16). Amo tikmatij tleka ijkon omokuayejyekouayaj pero “omoixkopkeh inawak” (Hech. 7:39-41). Noijki amo okitlakamatkej Jehová ijkuak omomojtijkej uan amo okalakej itech tlali tlen ye okinmilui kinmakaskia. Ik non, apóstol Pablo okinmilui akinmej okichiuayaj ken Cristo amo ma kichiuakan ken israelitas (Heb. 4:3, 11).
12. ¿Ken omomachti tetlakamatis Jesús uan ken okipaleui?
12 Para tiyetoskej tiixtlamatkej moneki tikchiuaskej tlen Jehová technauatia. Tlen techpanoua techmachtia moneki titetlakamatiskej, ijkon okipanok Jesús (xiktlajtolti Hebreos 5:8, 9). Ijkuak okatka iluikak, Jesús nochipa okitlakamatiaya iTajtsin, pero ijkuak nikan ouala, okitlajyouiltijkej uan okiyolkokojkej, ik non, okichiuili oui kitlakamatis iTajtsin. Nochi tlen okipanok okipaleui para satepan uelis kichiuaskia tekitl tlen toTajtsin Dios kimakaskia: Yetos tekiua uan Ueyi Teopixki.
13. ¿Ken tikteititiskej titetlakamatij?
13 ¿Tejuan tlen tikchiuaskej? ¿Tiktlakamatiskej Jehová maski titlajyouiskej? (Xiktlajtolti 1 Pedro 1:6, 7). Biblia kijtoua tlen moneki tikchiuaskej, tikpiaskej chipauak tonemilis, amo titlakajkayauaskej, kuali titlajtoskej, tiktlajtoltiskej uan timomachtiskej Biblia, timonechikoskej uan titetlapouiskej (Jos. 1:8; Mat. 28:19, 20; Efes. 4:25, 28, 29; 5:3-5; Heb. 10:24, 25). ¿Tikchiuaskej tlen technauatia Biblia maski titlajyouiskej? Tla ijkon tikchiuaj tikteititiskej tiixtlamatkej.
¿Ken techpaleuis tla tiyetoskej tiixtlamatkej?
14. ¿Ken okipaleui se tokni yetos ixtlamatki?
14 Tla akin kichiua ken Cristo kuali kimachtia itlalnamikilis, uelis kipaleuis ma kita tlen kuali uan tlen amo kuali, maski axkan miakej “ayakmó pinawah” (Efes. 4:19). Ma tikitakan tlen okipanok se tokni tlen itoka Jorge, ye kintlajtoltia uan kinpatioita amatlajkuilolmej. Kanin opejki tekipanoua, okatkaj okachi miakej siuamej. Ye okijto: “Miakej siuamej tlen inmiuan onitekipanouaya oauilnemiayaj, pero se siuatl otetlakaitaya uan okinekiaya kimatis tlen kijtoua Biblia. Se tonal ijkuak san sekan otitekipanojtokaj, ye okinekiaya nouan motekas. Ne amo onikneltokaya tlen okichijtoka, pero ye okachi omotokiaya notech uan amo onikmatiaya ken nikiluis ayakmo ijkon ma kichiua. Ijkuakon onikilnamik tlen okijtouaya revista Akin Tetlapouijtok, ompa kijtoua tlen okipanok se tokni kanin otekipanouaya. Itech non revista noijki kijtoua tlen okichi José ijkuak isiua Potifar okinekiaya iuan motekas.b Onikilui amo ijkon ma kichiua, ik non, ye oyajki” (Gén. 39:7-12). Jorge kuali omomachili porque amo itlaj opanok uan itlalnamikilis amo okikuejso (1 Tim. 1:5).
15. ¿Ken techpaleuis tla tiyetoskej tiixtlamatkej?
15 Tla tiyetoskej tiixtlamatkej, techyolchikauas porque amo techkajkayauaskej akinmej tlamachtiaj tlen amo melauak (xiktlajtolti Hebreos 13:9). Noijki, tla timochijchikauaj tiyetoskej tiixtlamatkej, tikchiuaskej tlen okachi ipati (Filip. 1:9, 10). Non techpaleuis ma tikpatioitakan Jehová uan ma tiktlasojkamatilikan nochi tlen techmaka (Rom. 3:24). Akinmej kichiuaj ken Cristo uan kipiaj kuali intlayejyekolis, motlasojkamatij uan kuali mouikaj iuan Jehová (1 Cor. 14:20).
16. ¿Tlen okiyolchika se tokni?
16 Se tokni tlen itoka Luisa okichiuaya seki tlamantli san para tokniuan ma kitakan. Ye okijto: “Amo onikchijtoka tlen amo kuali, pero amo melauak oniknekiaya niktekichiuilis Jehová. Satepan onikajsikamatki tla oniknekiaya nikchiuas tlen kuali, omonekiaya nikpatlas seki tlamantli, ik non, onimochijchika para niktekichiuilis Jehová ika nochi noyolo”. Tlen okichi Luisa okiyolchika uan non okipaleui ma tlaxiko ijkuak omokoko (Sant. 5:8). Saiktlami okijto: “Sapanoua onitlajyoui, pero Jehová nochipa nouan okatka”.
Ma titetlakamatikan ika nochi toyolo
17. ¿Ken okinpaleui ijkuak otetlakamatkej akinmej okichiuayaj ken Cristo itech achto siglo?
17 Pablo okinmilui tokniuan tlen ochantiayaj Jerusalén uan Judea ma yetokan ixtlamatkej uan non okinpaleui ma momakixtikan. Akinmej okichijkej tlen okinmilui apóstol Pablo okachi otlaneltokakej uan okimatkej keman omonekiaya choloskej “kan tepemeh”. Ijkuak okitakej ‘itla fierotik tlen teixpolo, omoketoka Kan Tlatiochitok’, kijtosneki ijkuak soldados okiyaualojkej Jerusalén uan ompa okalakej, okajsikamatkej yejuan omonekiaya choloskej (Mat. 24:15, 16, Itlajtol Totajtzin Dios [NSUNT]). Okilnamikej tlen okijto Jesús panoskia uan ocholojkej achto kipojpoloskiaj Jerusalén. Se ixtlamatki tlen itoka Eusebio uan momachtia tlen yiuejkika opanok, okijto akinmej ocholojkej ochantito Pela noso Pella, ik tepeyo tlen kajki Galaad. Ijkon akinmej okichiuayaj ken Cristo, ocholojkej ijkuak okipojpolojkej Jerusalén.
18, 19. (1) ¿Tleka axkan okachi miak ipati ma titetlakamatikan? (2) ¿Tlen tikitaskej itech okse tlamachtil?
18 Akinmej ixtlamatkej tetlakamatij uan non uelis kinpaleuis ma momakixtikan ijkuak mochiuas ‘tlaijyowílistli [...] tlen satlawel temojti’ tlen Jesús okijto (Mat. 24:21). ¿Tikchiuaskej tlen technauatis tlakeuali yolmelajki? (Luc. 12:42). Miak ipati titetlakamatiskej ika nochi toyolo (Rom. 6:17).
19 Para tiyetoskej tiixtlamatkej moneki tikmachtiskej totlalnamikilis uan uelis ijkon tikchiuaskej tla kuali timomachtiaj iTlajtol toTajtsin Dios uan titetlakamatij. Telpochmej kinchiuilia oui yetoskej ixtlamatkej. Ik non, itech okse tlamachtil tikitaskej tlen uelis kinpaleuis.
[Notas]
a Itech nin tlamachtil sekimej otikinpatilijkej intoka.
b Xikita tlamachtil “Fortalecidos para rechazar el mal”, tlen kajki itech revista Akin Tetlapouijtok, 1 de octubre 1999.
¿Tlen titlanankiliskia?
• ¿Tlen kijtosneki uan ken uelis tiyetoskej tiixtlamatkej?
• ¿Tleka moneki kuali tikmatiskej tlen kijtoua Biblia tla tiknekij tiyetoskej tiixtlamatkej?
• ¿Tlen techpaleuis ma titetlakamatikan?
• ¿Ken techpaleuis tla tiyetoskej tiixtlamatkej?
[Foto]
Tla tikchiuaj tlen kijtoua Biblia, techpaleuis ijkuak tikixnamikiskej se ouijkayotl
[Foto]
Omomakixtijkej akinmej okikakej tlen okijto Jesús panoskia