Biblia okinpatili innemilis

“Axkan okachi niktlasojtla nosiua” (RIGOBERT HOUETO)

• ONESKI ITECH XIUITL: 1941

• UEYI ALTEPETL: BENÍN

• OKSEKI TLAMANTLI: OKIPIAYA MIAKEJ ISIUAUAN UAN OKINKOKOLIAYA ITLAIXPANTIJKAUAN JEHOVÁ

TLEN ONIKCHIUAYA:

Onineski itech altepetl Cotonou tlen kajki Benín. Onikatka católico pero amo oniaya teopan. Miakej católicos okinpiayaj miakej insiuauan uan tekiua amitlaj okimiluiaya. Ne onikinpiaya naui nosiuauan.

Itech 1970 omoteuijkej ompa Benín. Oniknekiaya nikpaleuis noaltepe, ik non, onimokajkalaki itech política. Akinmej omoteuiayaj okinkokoliayaj iTlaixpantijkauan Jehová porque yejuan amo omokajkalakiayaj uan ne noijki onikinkokoliaya. Itech 1976 okinkixtijkej misioneros itech non altepetl uan onimokuayejyeko ayakmo keman mokopaskiaj.

BIBLIA OKIPATLAK NONEMILIS:

Itech xiuitl1990 otlanki omoteuijkej. Onechtlajtlachialti onikitak misioneros oksepa omokopkej. Opejki nimokuayejyekoua xamo toTajtsin Dios kinpaleuia. Ijkuakon onikpatlak kanin onitekipanouaya. Kanin opejki nitekipanoua okatka se iTlaixpantijka Jehová uan opejki nechtlapouia tlen okineltokaya uan onechtlajtoltili seki textos tlen kijtoua toTajtsin Dios yolmelajki uan tetlasojtla (Deuteronomio 32:4; 1 Juan 4:8). Non onechpakti uan oniknekiaya okachi nikmatis, ik non, opejki nimomachtia iuan se iTlaixpantijka Jehová.

San niman opejki inmiuan nimonechikoua, onechtlajtlachialti ken sapanoua motlasojtlaj uan amikaj okichikoitayaj. Ijkuak okachi onikinmixmatiaya onikajsikamatiaya yejuan melauak kichiuaj ken Jesús (Juan 13:35).

Onikitak tla oniknekiaya nikyolpaktis Jehová omonekiaya ayakmo nimonechikos inmiuan católicos. Sapanoua onikitak oui porque onechtekipachouaya tlen kijtoskej oksekimej. Maski opanok miak xiuitl, Jehová onechyolchika para uelis nikkauas teopan.

Ok omonekiaya itlaj nikchiuas. Biblia kijtoua toTajtsin Dios amo kipaktia matikinpiakan miakej tosiuauan (Génesis 2:18-24; Mateo 19:4-6). Ixpan toTajtsin Dios san okiseliaya akin achto iuan onimosetili, ik non iuan onimonamikti ixpan tekiuajkej. Akinmej noijki okatka nosiuauan ayakmo inmiuan onichantiaya pero onikinmakaya tlen ika mopanoltiskej. Satepan ome omochijkej iTlaixpantijkauan Jehová.

TLATEOCHIUALISTLI TLEN YONIKSELI:

Maski nosiua católica amitlaj kijtoua ne niiTlaixpantijka Jehová uan kijtoua axkan okachi niktlasojtla.

Yiuejkika onimokuayejyekouaya tla nimokajkalakis itech política uelis nikpaleuiskia noaltepe pero axkan nikmati san iTekiuajkayo toTajtsin Dios uelis tlayektlalis ipan tlaltikpak (Mateo 6:⁠9, 10). Niktlasojkamatilia Jehová porque onechmachti ken uelis niyolpakis.

“Onikitak oui nikpatlas seki tlamantli” (ALEX LEMOS SILVA)

• ONESKI ITECH XIUITL: 1977

• UEYI ALTEPETL: BRASIL

• OKSEKI TLAMANTLI: OTLAYEKANAYA ITECH RELIGIÓN PENTECOSTAL

TLEN ONIKCHIUAYA:

Onimoskalti itech se altepetsintli tlen itoka Itu —tlen kajki São Paulo—, miakej kixmatij non altepetl porque ompa sapanoua tlachtekij.

Oniauilnemiaya uan onimoteuiaya iuan oksekimej, noijki oniknemakaya drogas. Pero onikitak tlen onikchiuaya amo kuali porque uelis nechtsakuaskiaj noso nechmiktiskiaj, ik non, onimochijchika ayakmo nikchiuas tlen amo kuali. Ijkon opejki nio itech religión Pentecostal uan satepan ompa opejki nitlayekana.

Onimokuayejyekouaya ika non teopan uelis nikpaleuiskia noaltepe, ik non, opejki nitlamachtia itech radio uan miakej opejki nechixmatij. Satepan onikitak non religión amo okitekipachouaya kinpaleuis akinmej ompa omomachtiayaj uan amo okitlakamatiayaj toTajtsin Dios. San okinekiayaj tomin, ik non, onikijto nikkauas.

BIBLIA OKIPATLAK NONEMILIS:

Ijkuak opejki nimomachtia iuan iTlaixpantijkauan Jehová onikitak yejuan amo ken okseki religiones. Onechtlajtlachialti ome tlamantli. Se, yejuan amo san kintlapouiaj oksekimej toTajtsin Dios kintlasojtla, yejuan kiteititiaj tetlasojtlaj. Ome, yejuan amo mokajkalakia itech política nion itech guerras (Isaías 2:4). Nin ome tlamantli onechpaleui manikajsikamati onikajsik religión tlen kichiua tlen toTajtsin Dios kipaktia uan nin ojtli uelis techpaleuis para tiyoltoskej nochipa (Mateo 7:13, 14).

Onikajsikamatki tla oniknekiaya nikyolpaktis toTajtsin Dios omonekiaya nikpatlas nonemilis, niyetos niyolyamanki uan okachi niyetos iuan nofamilia. Maski onikitak oui Jehová onechpaleui manikpatla nonemilis. Nosiua achto opejki momachtia Biblia, omotlajtlachialti ijkuak okitak onikpatlak seki tlamantli. Satepan otimochijkej iTlaixpantijkauan Jehová uan otimoapolaktijkej.

TLATEOCHIUALISTLI TLEN YONIKSELI:

Nosiua uan ne tiyolpakij tikinpaleuiaj tokoneuan mamouikakan iuan Jehová. Axkan okachi tiyolpakij. Niktlasojkamatilia toTajtsin Dios onechpaleui manikixmati iTlajtol. Biblia uelis techpatilis tonemilis, ijkon ken onechpanok.

“Kuali nimomachilia, niyolpaki uan nimoyolseuia” (VICTORIA TONG)

• ONESKI ITECH XIUITL: 1957

• UEYI ALTEPETL: AUSTRALIA

• OKSEKI TLAMANTLI: OTLAJYOUI IJKUAK OKATKA TAKOTSIN

TLEN ONIKCHIUAYA:

Nikinpia chikuase nokniuan tlen okachi tsikitsitsintin, onimoskalti Newcastle (Nueva Gales del Sur). Notajtsin sapanoua omoteuiaya uan otlauanaya. Nonantsin noijki onechuitekiaya uan onechuijuikaltiaya. Nochipa onechiluiaya nias ijtik tlitl, non okichiuaya manimomojti.

Ualeua sapanoua onechuitekiaya uan amo ueli oniaya escuela. Ijkuak onikpiaya 11 xiuitl tekiuajkej okijtojkej ayakmo niyetoskia inmiuan notatajuan. Satepan onechkauatoj kanin okatkaj monjas pero ijkuak onikpiaya 14 xiuitl onicholo. Onimokauaya itech ojtli ompa Kings Cross (altepetl Sydney) uan san ik ompa oninentinemiaya.

Satepan opejki nikmotlalilia drogas, onitlauanaya, onikitaya pornografía uan oniauilnemiaya. Se tonal onechpanok itlaj tlen sapanoua onechmomojti, onimokauaya ikalijtik akin iuan onitekipanouaya yiyouak. Non youak omotlapouijtoka iuan ome tlakamej, onechilui manikochiti pero onikkak okijto okinekiaya nechnemakas, ninmej ome tlakamej nechuikaskia Japón ijtik se barco uan ompa nitekipanoskia itech se bar. Non onechmomojti, ik non, san niman onicholo.

Se tlakatl tlen okatka itech non altepetl oniknamik onikilui tlen onechpanok para manechpaleui uan manechmaka tomin. Pero ye okijto maniuia ikalijtik para nimaltis uan nitlakuas. Ompa onimoka uan se xiuitl satepan otimonamiktijkej.

BIBLIA OKIPATLAK NONEMILIS:

Ijkuak opejki nimomachtia Biblia ualeua amo kuali onimomachiliaya. Onikualanki ijkuak onikmatki Satanás itlajtlakol nochi tlamantli tlen amo kuali panoua, kanin onimomachtiaya onechmachtijkej toTajtsin Dios itlajtlakol ijkuak panoua tlen amo kuali. Pero onimoyolseui ijkuak onikmatki toTajtsin Dios amo techtlajyouiltia ijtik tlitl, nin onechmomojtiaya ijkuak onikatka nitakotsin.

Onechtlajtlachialti ijkuak onikitak iTlaixpantijkauan Jehová kichiuaj tlen kijtoua Biblia uan kichiuaj tlen kineltokaj. Maski ualeua onikinmiluiaya tlen amo kuali, yejuan nochipa kuali onechseliayaj uan onechtlakaitayaj.

Onikmachiliaya oui nikpatlas ken onimokuayejyekouaya. Onikmachiliaya amitlaj nopati uan onimokokoliaya. Maski yonimoapolakti ken iTlaixpantijka Jehová ok ijkon onikmachiliaya, ne oniktlasojtlaya ToTajtsin Dios pero onimokuayejyekouaya ye amo keman nechtlasojtlaskia.

Opanok 15 xiuitl ijkuak onimoapolakti uan itlaj opanok. Itech se tlamachtil tlen okitemakakej kanin timonechikouaj, tokni okiyekijto tlen kijtoua Santiago 1:23 uan 24. Ninmej versículos kijtouaj iTlajtol toTajtsin Dios kineskayotia ken se espejo kanin uelis tikitaskej ken techita Jehová. Onimotlajtlaniaya kox nimota ken nechita Jehová. Onikmachiliaya oui nikajsikamatis Jehová nechtlasojtla.

Satepan oniktlajtolti itech Biblia tlen onechpaleui ayakmo ijkon manimokuayejyeko. Oniktlajtolti Isaías 1:​18, ompa Jehová kijtoua: “Axkan xiualakan uan matikyektlalikan ouijkayotl tlen tikpiaj [...]. Maski namotlajtlakol yetos ken escarlata, mokopas istak ken nieve”. Onikmachili ken Jehová kijtoskia: “Xiuiki Vicky, matikyektlalikan tlen tikpia, nimitsixmati, nikmati tlen otikchi, nikixmati moyolo pero nimitstlasojtla”.

Non youak amo ueli onikochki. Ok onimotlajtlaniaya kox toTajtsin Dios nechtlasojtla pero opejki nimokuayejyekoua tlen okichi Jesús nopatka. Ijkuakon onikitak ken Jehová mochia uan amo nechkaua. Yetoskia ken nochipa onikiluiaya: “Te amo keman techtlasojtlas. Mokone amo uelis nechmakixtis uan amo uelis nannechtlapojpoluiskej”. Ijkon onikteititiaya amo niktlasojkamati tlen okichi Jesús nopatka. Opejki nimokuayejyekoua tlen Jehová okichi uan opejki niktlasojtla.

TLATEOCHIUALISTLI TLEN YONIKSELI:

Kuali nimomachilia, niyolpaki uan nimoyolseuia. Kuali nimouika iuan nonamik uan ika tlen onechpanok ueli nikinpaleuia oksekimej. Axkan okachi nimouika iuan Jehová.

“Onechnankili ijkuak onimotlatlaujti” (SERGEY BOTANKIN)

• ONESKI ESKI ITECH XIUITL: 1974

• UEYI ALTEPETL: RUSIA

• OKSEKI TLAMANTLI: OKIPAKTIAYA HEAVY METAL

TLEN ONIKCHIUAYA:

Ijkuak onimoskalti nofamilia amo okachi okipiaya tomin, otichantiayaj Vótkinsk ompa noijki oneski se tlakatl akin otlakuikaya tlen itoka Piotr Ilič Chaikovski. Notajtsin okatka yolkuali pero sapanoua otlauanaya, ik non, amo kuali otikatkaj nokalijtik.

Amo onechpaktiaya nimomachtis uan satepan opejki nimoueyineki. Opejki nipinaua uan onikitaya oui nimomachtiti. Ijkuak onechiluiaya itlaj manikchiua onikitaya oui nikyekijtos. Ijkuak oniaya escuela akin otlamachtiaya okijkuilo itech nocuaderno: “Amo ueli tlajtoua uan amo ueli kijtoua tlen kimachilia”. Non tlamantli sapanoua onechyolkoko uan onikmachiliaya amitlaj nopati. Opejki nimotlajtlania tleka niyoltok.

Ijkuak onikatka nitelpochtli opejki nikoni alcohol uan kuali onimomachiliaya pero ijkuak sapanoua onitlauanaya ayakmo kuali onimomachiliaya. Amo onikmatiaya tleka niyoltok. Onimomachiliaya noselti, ualeua san onikatka nokalijtik uan hasta oniknekiaya nimomiktis.

Ijkuak onikpixki 20 xiuitl, opejki nikkaki heavy metal uan onikmachiliaya onechpaleuiaya. Ijkuak onikkakiaya non tlakuikali onimomachiliaya nichikauak, ik non, opejki nimouika inmiuan akinmej okikakiayaj rock, ayakmo oniktekiaya notsonkal, onimonakaskoyoni uan opejki nimotlakentia ken akinmej otlakuikayaj rock. Miakej opejkej nechmauiliaj noso nechimakasij uan opejki nimokualania iuan nofamilia.

Nonemilis ayakmo okatka ken achto. Onimokuayejyekouaya tla nikkakiskia non tlakuikali niyolpakiskia pero amo ijkon opanok. Satepan onikmatki tlen okichiuayaj akinmej otlakuikayaj uan onechyolkoko.

Oksepa oniknekiaya nimomiktis. Pero amo onikchi porque onikilnamik tlen nopatka okichi nonantsin, ken nochipa onechpaleuiaya uan sapanoua onechtlasojtlaya. Amo onikmatiaya tlen nikchiuas porque amo oniknekiaya niyoltos pero noijki amo nimomiktiskia.

Para kuali nimomachiliskia opejki nikintlajtoltia amochmej tlen okinchijchijkej Rusia. Itech se amochtli okijtouaya tlen okichiuaya se teopixki. San niman opejki nikneki nikyolpaktis toTajtsin Dios uan nikinpaleuis oksekimej. Opejki nimotlatlaujtia maski amo keman ijkon onikchiuaya, onikilui toTajtsin Dios manechpaleui kuali maniyeto. Ijkuak onimotlatlaujti, kuali onimomachili. Sapanoua onechtlajtlachialti ijkuak opanok ome hora uan se iTlaixpantijka Jehová onechtlajpaloto uan onechilui kox oniknekiaya nimomachtis Biblia. Onikajsikamatki toTajtsin Dios onechnankili ijkuak onimotlatlaujti. Ijkuakon opejki niyolpaki.

BIBLIA OKIPATLAK NONEMILIS:

Maski onikitaya oui, oniktlamotlak nochi tlen opouiaya itech heavy metal. Pero amo san niman onikilka. Ijkuak oniaya ik kanin otlakuikayaj oksepa onikilnamikiaya tlen achto amo kuali onikchiuaya. Onechpaktiaya tlen onimomachtiaya uan amo oniknekiaya itlaj manechkuatlapololti, ik non, ayakmo ik ompa oniaya. Ijkuak onikilnamikiaya tlen amo kuali onikchiuaya, sapanoua onimotlatlaujtiaya. Ijkon onikmachili “iyolsewilis Dios, non amaka weleti kajsikamati” (Filipenses 4:⁠7).

Itech Biblia onimomachti moneki tikintlapouiskej oksekimej tlen tikneltokaj (Mateo 28:​19, 20). Onikijtouaya ne amo keman nitetlapouiskia pero tlen onimomachtiaya onechyolpaktiaya uan onechyolseuiaya. Onikmatiaya oksekimej noijki moneki kimatiskej tlen melauak. Ik non, maski onimomojtiaya opejki nikintlapouia oksekimej tlen onimomachtijtoka. Non okichi kuali manimomachili uan manikilnamikto tlen onimomachtijtoka.

TLATEOCHIUALISTLI TLEN YONIKSELI:

Axkan niyolpaki iuan nosiua uan yonikinpaleui miakej mamomachtikan Biblia, ken nokni uan nonantsin. Opejki niyolpaki ijkuak onikixmatki toTajtsin Dios uan opejki nikinpaleuia oksekimej.