Biblia tlamachtia
¿Tlen panos ijkuak tlaixkomakaskej?
Itech nin tlamachtil tikajsis tlen kijtoua Biblia itech seki tlamantli tlen xamo timotlajtlania. Tla tikneki, iTlaixpantijkauan Jehová uelis mitspaleuiskej xikajsikamati nin tlamachtil.
1. ¿Tlen kijtosneki ijkuak tlaixkomakaskej?
Nin dibujo kiteititia tlen miakej mokuayejyekouaj panos ijkuak toTajtsin Dios tlaixkomakas. Kijtouaj non tonal yetoskej ixpan toTajtsin Dios uan kinmixkomakaskej ika tlen okichijkej: mokuayejyekouaj sekimej yaskej iluikak uan oksekimej kintlajyouiltiskej ijtik tlitl. Pero Biblia kijtoua non tonal toTajtsin Dios tlaixkomakas para kachiuas tlen techtlajyouiltia (Salmo 96:13). Ye yokipejpenki Jesús para kuali ma tlaixkomaka (Xiktlajtolti Isaías 11:1-5 uan Hechos 17:31).
2. ¿Tleka tikijtouaj tlaixkomakaskej ika melajkayotl?
Adán amo okitlakamatki toTajtsin Dios, ik non, tinochtin titlajtlakolejkej, titlajyouiaj uan tiixpoliuij (Romanos 5:12). Para moyektlalis nin tlamantli, Jesús kinyolitis miakej akinmej yoixpolikej. Amochtli Apocalipsis, kijtoua nin panos ijkuak Jesús tlanauatis mil xiuitl (Xiktlajtolti Apocalipsis 20:4, 11, 12).
Akinmej kinyolitiskej, kinmixkomakaskej ika tlen kichiuaskej ijkuak kimatiskej tlen kijtoua rollos tlen motlaposkej, ijkon ken kijtoua Apocalipsis capítulo 20 uan amo ika tlen okichijkej ijkuak oyoltokaj (Romanos 6:7). Pablo okijto kinyolitiskej “akimeh otlájtlakolchijkeh iwa akimeh amó” ijkon yejuan uelis mouikaskej iuan toTajtsin Dios (Xiktlajtolti Hechos 24:15).
3. ¿Tlen okseki panos ijkuak tlaixkomakaskej?
Akinmej oixpolikej uan amo okixmatkej toTajtsin Dios uelis momachtiskej para kitlakamatiskej. Tla ijkon kichiuaskej, nochipa yoltoskej. Pero akinmej kinyolitiskej uan amo kitlakamatiskej toTajtsin Dios kinmixkomakaskej uan kinmixpoloskej (Xiktlajtolti Juan 5:28, 29 uan Isaías 26:10; 65:20).
ToTajtsin Dios tlaixkomakas mil xiuitl uan satepan nochtin akinmej mokauaskej tlaltikpak ayakmo kipiaskej tlajtlakoli (1 Corintios 15:24-28). ¡Jehová kinteochiuas akinmej kitlakamatiskej! Diablo tsaktos mil xiuitl uan saiktlami kikajkauaskej para kinkajkayauas oksekimej. Satanás kichiuas miakej amo makitlakamatikan Jehová pero akinmej amo kikauiliskej Satanás makinkajkayaua nochipa yoltoskej (Xiktlajtolti Isaías 25:8 uan Apocalipsis 20:1, 7-9).
4. ¿Ken techpaleuis ijkuak oksepa tlaixkomakaskej?
Biblia kijtoua onka okse tonal ijkuak Jehová tlaixkomakas. Ijkuakon kinpojpolos tekiuajkej tlen axkan tlanauatiaj. Non tonal san niman ajsiki ijkon ken opanok ijkuak oyoltoka Noé, ijkuakon miakej oixpolikej porque okichiuayaj tlen amo kuali. ToTajtsin Dios kinmixpolos nochtin akinmej amo yolkualmej uan san mokauaskej akinmej kichiuaj tlen ye kineki (Xiktlajtolti 2 Pedro 3:6, 7, 13).