¿ITlaixpantijkauan Jehová kinkauiliaj siuamej ma tlayekanakan?

Itech nochi tlaltikpak katej miakej siuamej tlen tetlapouiaj kuali tlajtolmej itech iTekiuajkayo toTajtsin, ijkon ken kijtoua Salmo 68:11: “Siuamej tlen kitematiltiaj kuali tlajtolmej sapanoua miakej”.

Pero ninmej siuamej iTlaixpantijkauan Jehová amo tlamachtiaj ijkon ken oksekimej siuamej itech okseki religiones ¿Tleka ijkon tikijtouaj?

Achto, tlatlamantli tlamachtiaj. Siuamej tlen tlamachtiaj itech teopan kintlaliaj ma tlayekanakan. Ik non, san kinmachtiaj akinmej ompa monechikouaj. Pero siuamej iTlaixpantijkauan Jehová tetlapouiaj itech tlatlamantli altepemej, ipan ojtli uan tekalijtik.

Tlatlamantli tlapaleuiaj kanin monechikouaj. Miakej siuamej tlayekanaj itech teopan uan kinmachtiaj akinmej inmiuan monechikouaj. Siuamej iTlaixpantijkauan Jehová amo tlayekanaj nion tlamachtiaj kanin monechikouaj tla katej tlakamej tlen toTajtsin Dios yokintlali ijkon ma kichiuakan (1 Timoteo 3:2; Santiago 3:⁠1).

Biblia techiluia san tlakamej uelis tlayekanaskej itech tlanechikol. Ijkon ken Pablo okilui Tito: “Ne onimitskajte kan isla de Creta [...] para xikintlali tetajmeh non matlayakantokah kan moololoah n tlaneltokakeh” (Tito 1:​5). Noijki okilui, tlakatl akin tlayekanaskiaj “moneki mayeknemi ika iyolo chipawak [...]. Amo makikajkayawa isiwa” (Tito 1:⁠6). Pablo noijki okilui Timoteo: “Tla aka kineki kinyakanas n tokniwah non kineltokah Cristo Jesús, kuali tekitl kineki kichiwas. Yika, akin kinyakantinemi n tokniwah, moneki yetos se tlakatl yekmilajka para amaka makiteili tenawak [...] makipia san se isiwa [...] iwa makimati kenijki temachtis” (1 Timoteo 3:​1, 2).

¿Tleka san tlakamej uelis tlayekanaskej kanin timonechikouaj? Pablo okijto: “Porke ne amo niktekawilia se siwatl matlamachti nion makinawatijto n tlakatl, yej san mamokajtia. Porke Dios achto okichijchi Adán, iwa satepa n Eva” (1 Timoteo 2:​12, 13). Nin kijtosneki, toTajtsin Dios okitlali tlakatl para tlayekanas uan tlamachtis.

Tokniuan akinmej tlayekanaj kichiuaj ijkon ken Jesús tlamachtia. Lucas okijto: “Jesús otlamachtijtijtnemia itech miakeh altepemeh. Ye okintlapowijtinemia de n kualitlájtoli de Dios”. ¿Tlen okichijkej idiscípulos Jesús ijkuak okinmilui ma kichiuakan non tekitl? Biblia kijtoua: “Itlamachtijkawah n Jesús otetlapowijtinemiah n kualitlájtoli itech nochteh n altepemeh” (Lucas 8:1; 9:​2-6).

Axkan nochtin iTlaixpantijkauan Jehová, tlakamej uan siuamej, kichiuaj ika miak pakilistli tlen kijtoua Mateo 24:14, TNM. Jesús okijto: “Ninmej kuali tlajtolmej itech Tekiuajkayotl motetlapouis itech nochi tlaltikpak para ma kimatikan nochi altepemej, ijkuakon nochi tlamis”.