¿Techijtlakos tla tikitaj pornografía?

Axkan miakej kitaj pornografía.a Uelis motas itech televisión, internet, ijkuak kintlejkoltiaj fotos, ken motlakentiaj, películas, tlakuikalmej, revistas, videojuegos, celulares, computadoras noso okseki tlamantli. Axkan miakej kitaj kuali ijkon kichiuaskej non tlamantli. Sapanoua miakej kitaj pornografía (xikita recuadro “Tlen moneki tikmatiskej itech pornografía”).

Noijki axkan miakej ayakmo kitaj tlajtlakoli kitaskej pornografía. Se siuatl tlamachti tlen itoka Gail Dines okijkuilo: “Yiuejkika okitayaj sapanoua amo kuali kitaskej pornografía pero axkan ayakmo ijkon kitaj”.

¿Tejuatsin tlen tikijtoskia? ¿Uelis techijtlakos tla tikitaj pornografía? Jesús okijto: “Nochi kuali kuawitl, kitemaka kuali itlakilo, iwa n kuawitl non ayakmó kuali, amo kuali itlakilo kitemaka” (Mateo 7:17). ¿Tlen techpanos tla tikitaj pornografía? Matikitakan eyi tlamantli.

¿Tlen kinpanoua akinmej kitaj pornografía?

TLEN KIJTOUAJ IXTLAMATKEJ: Akinmej kitaj pornografía nochipa san itech mokuayejyekouaj. Sekimej tlapajtijkej uan akinmej tlatemouaj kijtouaj yetoskia ken crack noso cocaína.

Brian,b se telpochtli tlen nochipa okitaya pornografía itech internet, okijto: “Nochipa oniknekiaya nikitas, yetoskia ken nikmotlaliliskia droga. Sapanoua onechkuejsouaya notlalnamikilis, onimomojtiaya uan onechkokouaya notsonteko. Opanok miak xiuitl para ayakmo nikitas”.

Akinmej nochipa kitaj pornografía amo kijtouaj. Amo kijtouaj tlen kinpanoua, tlakajkayauan, sekimej pinauaj, katej inselti, momojtiaj, sapanoua moyolkokouaj noso kualanij. Sekimej hasta kinekij momiktiskej. Se telpochtli tlen itoka Sergio, nochipa okikixtiaya pornografía itech itelefono, ye okijto: “Nochipa oniknekiaya noselti niyetos uan amo onikmatiaya tlen nikchiuaskia. Onikmachiliaya amo itlaj nopati, onechkuejsouaya notlalnamikilis uan onimomachiliaya noselti. Onimomojtiaya uan onipinauaya nikiluis ikaj mamechpaleui”.

Uelis sapanoua titlajyouis maski san tepitsin tikitas pornografía. Se tlapajti tlen itoka Judith Reisman, ye kita tlen kinpanoua akinmej kitaj pornografía, okilui Senado, se comité tlen kajki Estados Unidos: “Akinmej kitaj pornografía nochipa kilnamiktokej maski amo kinekiskia pero ijkon kinpanoua [...] uan oui kilkauaskej”. Susan, se ichpochtli tlen kipia 19 xiuitl, se tonal okitak pornografía itech internet maski amo okinekiaya kitas pero satepan opejki nochipa kita, ye okijto: “Nochi tlen onikitak nochipa nikilnamiki. Maski nimokuayejyekojtok itech okseki tlamantli, ualeua nikilnamiki. Xamo ayakmo uelis nikilkauas”.

TLEN PANOUA: Akinmej kitaj pornografía satepan nochipa kinekij kitaskej uan sapanoua tlajyouiaj (2 Pedro 2:19).

¿Ken tlajyouia ifamilia akin kita pornografía?

TLEN KIJTOUAJ IXTLAMATKEJ: “Pornografía kintlajyouiltia akinmej yomonamiktijkej uan infamilia”. (The Porn Trap [Las trampas del porno], de Wendy y Larry Maltz.)

Akin kita pornografía kitlajyouiltia inamik uan ifamilia porque...

• ... inamik ayakmo kineltokilia uan ayakmo iuan moteka nion kitlasojtla (Proverbios 2:12-17).

• ... san itech motekipachoua, ayakmo yolpaki nion kuali mouikaj iuan inamik (Efesios 5:28, 29).

• ... san mokuayejyekoua uan kineki kichiuas tlen amo kuali (2 Pedro 2:14).

• ... kichiualtia inamik seki tlamantli para san ye ika moyolpaktis ijkuak iuan moteka (Efesios 5:3, 4).

•  ... kikajkayaua inamik (Mateo 5:28).

Biblia kijtoua akin yomonamikti amo makikajkayaua inamik noso isiua (Malaquías 2:16). Ijkuak ikaj kikajkayaua inamik noso isiua uan satepan mokajkauaj ixpan tekiuajkej, kintlajyouiltiaj inkoneuan.

Konemej okachi tlajyouiaj ijkuak kitaj pornografía. Brian noijki okijto: “Ijkuak onikpiaya kanaj diez xiuitl, onikajsik seki revistas tlen iaxka notajtsin, ompa omotaya pornografía. Ijkuak amikaj onechitaya ne onikinmitaya revistas maski amo onikmatiaya tleka oniknekiaya nikitas. Opejki nechpaktia nikitas hasta ijkuak onikatka nitelpochtli”. Miakej tlamachtijkej kijtouaj akinmej kitaj pornografía ijkuak ok telpochmej uelis kinekiskej miakej inmiuan motekaskej maski ayamo kipiaj miak xiuitl noso kinchiualtis ikaj iuan mamoteka. Noijki kichiua makualanikan uan ayakmo mayolpakikan.

TLEN PANOUA: Pornografía yetoskia ken veneno porque kichiua ayakmo mamotlasojtlakan familias uan kintlajyouiltia (Proverbios 6:27).

¿Tlen kijtoua Biblia itech pornografía?

TLEN KIJTOUA BIBLIA: “Xikpojpolokah tlan amo kuali kelewia nomokuerpo. Amaka mamokalakijtinemi iwan se non amo isiwa, nion manemi itech tlan pitsotik, nion mamotemaka imak tlan amokuali kelewia ikuerpo, nion makitlawelneki tomi, porke tla ijkó nonkichiwah, noni yaskia kemi nonkinweyilijtoskiah diostsitsinteh” (Colosenses 3:5).

Biblia kijtoua Jehovác kikokolia pornografía. Pero amo kijtosneki ye amo kineki matiyolpakikan. Ye otechchijchi para timotekaskej san iuan tonamik para uelis timoyolpaktiskej uan tikinpiaskej tokoneuan (Santiago 1:17).

¿Tleka tikijtouaj Jehová kikokolia pornografía? Matikitakan seki tlamantli.

• Jehová kimati akinmej kitaj pornografía tlajyouiaj (Efesios 4:17-19).

• Ye techtlasojtla uan amo kineki matitlajyouikan (Isaías 48:17, 18).

• Kineki kinmaluis familias uan akinmej yomonamiktijkej (Mateo 19:4-6).

• Kineki matiyetokan tichipauakej uan matikintlakaitakan oksekimej (1 Tesalonicenses 4:3-6).

• Ye kineki matiktlakaitakan tocuerpo ijkuak timotekaj iuan tonamik (Hebreos 13:4).

• Kimati tla tikitaj pornografía uelis ayakmo kuali tikinmitaskej oksekimej uan totech timokuayejyekojtoskej ijkon ken kichiuaj Satanás uan amo kuali ejekamej (Génesis 6:2; Judas 6, 7).

TLEN PANOUA: Akin kita pornografía ayakmo kuali mouika iuan toTajtsin Dios (Romanos 1:24).

Jehová kineki kinpaleuis akinmej ayakmo kinekij kitaskej pornografía. Biblia kijtoua: “Jehová teiknomati uan yolkuali, amo san niman kualani uan sapanoua tetlasojtla. Porque ye kuali kimati ken otechchijchi uan kilnamiki tejuan titlali” (Salmo 103:8, 14). ToTajtsin Dios kinyoleua akinmej yolyamankej makitemokan para kinmiknomatis uan kinmititis sapanoua kintlasojtla (Hebreos 4:16; xikita recuadro “Tlen tikchiuas para ayakmo tikitas pornografía”).

Miakej yokiselijkej makinpaleui toTajtsin Dios. ¿Melauak kinpaleuia? Miakej ayakmo kichiuaj tlen pitsotik porque Biblia kijtoua: “Axa ya nonyolchipawakeh, iwa ya nonteaxkawah inawak Dios. Iwa axa Dios ya kajki nomowah, por Cristo Jesús iwa por Iespíritu Dios” (1 Corintios 6:11). Yejuan omomachilijkej ken okijto apóstol Pablo: “Para nochi tlamantli nikpia chikaualistli porque onka akin nechmaka chikaualistli” (Filipenses 4:13, TNM).

Susan omochijchika ayakmo kitas pornografía, ye okijto: “San Jehová uelis techpaleuis ayakmo matikitakan pornografía. Tla tikiluia matechpaleui uan matechyekana, tiyetoskej tichipauakej uan kuali iuan timouikaskej.