¿Ken uelis tikintlapouiskej tofamiliares tlen amo kineltokaj tlen kijtoua Biblia?

JESÚS okilui se tlakatl akin okinekiaya yetos idiscípulo: “Xiajti mocha, iwa xikinmatilti mochanikniwah nochi tlan Dios okichi mowa, iwa kenijki omitsiknoma”. Xamo okatka ik sureste itech mar de Galilea, ompa Gadara. Tlen okijto Jesús kiteititia kipatioita tla ikaj kineki kintlapouis ifamiliares (Mar. 5:19).

Axkan ok ijkon panoua itech nochi altepemej, sekimej kintlapouiaj infamiliares uan oksekimej amo. Ik non, ijkuak ikaj mochiua iTlaixpantijka Jehová, kineki kintlapouis ifamiliares tlen ye kineltoka. Pero, ¿ken moneki kichiuas?¿Ken uelis ajsis itech inyolo maski kipiaj okse inreligión noso amo kineltokaj toTajtsin Dios? Biblia techmachtia ken tikchiuaskej.

“Yotikajsikeh n Mesías”

Itech achto siglo, Andrés achto okimatki Jesús ye okatka Mesías. ¿Akin san niman okiluito? “Andrés achto okajsik ikni Simón, iwa okili:—Yotikajsikeh n Mesías —noni kijtosneki n Cristo noso non Dios okipéjpenki”. Satepan oyajkej iuan Pedro kanin okatka Jesús. Pero Andrés amo okichiualti Simón noso Pedro mamochiua imachtijka Jesús (Juan 1:35-42).

Chikuase xiuitl satepan, ijkuak Pedro okatka Jope, okinauatijkej mauia Cesarea ikalijtik Cornelio akin okinyekanaya soldados. ¿Akinmej ompa yokatkaj? Biblia kijtoua: “Cornelio sa okinchixtoka. Noiwa ompa okatka ichantlakawah iwa oksikimeh tlakah non satlawel íwa omowikaya”. Cornelio okinnechiko infamiliares uan ijkon okinkauili yejuan makipejpenakan kox okinekiayaj kikakiskej Pedro (Hech. 10:22-33).

¿Tlen techmachtia tlen okichijkej Andrés uan Cornelio?

Andrés okiuikak Pedro para makixmati Jesús uan Cornelio okinnechiko infamiliares para makikakikan Pedro, pero amo okinchiualtijkej mamochiuakan imachtijkauan Jesús. ¿Tlen techmachtia tlen okichijkej? ¿Ken uelis tikchiuaskej ken yejuan? Matikintlapouikan tlen tikneltokaj, tlen yejuan kinpaktia uan matiktemokan keman ijkon tikchiuaskej noso matikinyoleuakan oksekimej tokniuan makinmixmatikan. Pero amo matikinyolkokokan nion matikinchiualtikan makineltokakan tlen tikneltokaj, matiktlakaitakan tlen kipejpenaj. Para tikmatiskej ken tikinpaleuiskej, matikitakan tlen okinpanok Jürgen uan isiua Petra, yejuan chantij ompa Alemania.

Petra omomachti Biblia iuan iTlaixpantijkauan Jehová uan omoapolakti. Jürgen okinyekanaya soldados uan ijkuak Petra opejki momachtia Biblia, ye amo okipakti. Pero satepan okitak iTlaixpantijkauan Jehová tlamachtiaj tlen kijtoua Biblia. Satepan omotemakak ixpan Jehová uan axkan tlayekanki. ¿Tlen kijtoua Jürgen matikchiuakan para tikinpaleuiskej tofamiliares akinmej kipiaj okse inreligión?

Jürgen kijtoua: “Amo xikinchiualti makineltokakan tlen te tikneltoka nion sapanoua xikintlapoui tlen kijtoua Biblia, porque tla ijkon tikchiuas ayakmo kinekiskej mitskakiskej. Okachi kuali, amo sapanoua xikintlapoui. Noijki mitspaleuis tla tikinyoleuas oksekimej tokniuan makinmixmatikan mofamiliares, porque xamo kinpaktis tlen oksekimej tokniuan kichiuaj”.

Apóstol Pedro uan ifamilia Cornelio san niman okiselijkej tlen okijtouaya iTlajtol toTajtsin Dios. Pero oksekimej ouejkajkej.

IKNIUAN JESÚS

Ijkuak otetlapouiaya Jesús, sekimej ifamiliares okineltokakej. Xamo apóstol Santiago uan Juan okatkaj iprimos uan innantsin tlen omoyokayotiaya Salomé okatka itía. Xamo ye okatka “iwa n oksikimeh siwameh non okipalewiayah n Jesús ika tlan okipiayah” (Luc. 8:1-3).

Pero oksekimej ifamiliares amo san niman okineltokakej. Kanaj se xiuitl satepan ijkuak omoapolakti, miakej omonechikojkej itech se kali para kikakiskej. “Ijkuak okimatkeh non ken okitayah n Jesús, owalajkeh okinotsakoh, porke okimoliayah chamo yokuatlapolo”. Ijkuak ikniuan okiluijkej mauia oksekan para makintlapoui oksekimej, ye amo okinmilui kox kema yaskia “porke nion yejwah amo okineltokayah” (Mar. 3:21; Juan 7:5).

¿Tlen techmachtia tlen okichi Jesús? Ye amo okualanki ijkuak okiluijkej okuatlapolo. Ijkuak okixpolojkej uan omoyoliti, okiyolchika ifamilia ijkuak okinmonextili. Xamo tlen opanok okinpaleui itlakpaikniuan makineltokakan ye Mesías. Yejuan okatkaj iuan oksekimej apóstoles ijkuak okiselijkej espíritu santo. Satepan Santiago uan noijki Judas okse itlakpaikni Jesús, okinmakak okachi tekitl itech tlanechikol (Hech. 1:12-14; 2:1-4; 1 Cor. 15:7).

SEKIMEJ OKACHI UEJKAUAJ

Ijkon ken itech achto siglo axkan sekimej tofamiliares amo san niman tlaneltokaj. Ijkon okipanok Roswitha, ye okatka católica ijkuak inamik omochi iTlaixpantijka Jehová itech xiuitl 1978. Ye amo okipakti tlen inamik opejki kineltoka. Pero opanok seki xiuitl uan ayakmo ijkon omokuayejyeko, porque okitak iTlaixpantijkauan Jehová tlamachtiaj tlen kijtoua Biblia uan itech xiuitl 2003 omoapolakti. ¿Tlen okipaleui Roswitha matlaneltoka? Okitak tlen okichiuaya inamik, maski Roswitha san tlen okitoktiaya, inamik amo san niman okualaniaya uan okikauiliaya makijto tlen ye omokuayejyekouaya. ¿Tlen kijtoua Roswitha moneki tikchiuaskej? “Para tikinpaleuis mofamiliares tlen amo tlaneltokaj moneki timochias, timochias uan timochias”.

Monika omoapolakti itech xiuitl 1974 uan majtlaktli xiuitl satepan ome ikoneuan noijki omochijkej iTlaixpantijkauan Jehová. Inamik tlen itoka Hans okinkauiliaya makichiuakan tlen kijtoua Biblia pero amo otlaneltokaya, omoapolakti hasta itech xiuitl 2006. ¿Tlen techiluiaj matikchiuakan? Yejuan kijtouaj: “Amo kema xikkaua Jehová maski yetos oui itech mofamilia”. Hans noijki otlaneltokak porque ifamilia nochipa okiteititiayaj okitlasojtlayaj. Yejuan okimatiayaj se tonal mochiuaskia iTlaixpantijka Jehová.

ATL TLEN KISA ITECH ITLAJTOL TOTAJTSIN DIOS

Jesús okijto kuali tlajtolmej tlen otlamachtiaya yetoskia ken atl tlen kichiuas nochipa matiyoltokan (Juan 4:13, 14). Tiknekij noijki tofamiliares makonikan nin atl tlen kinpaleuis. Pero amo tiknekij tikinchiualtiskej makonikan sapanoua miak atl. Ken tikintlapouiaj uelis kinpaleuis noso amo. Biblia kijtoua: “Iyolo akin yolmelauak mokuayejyekoua tlen tlanankilis” uan “akin ixtlamatki iyolo kipaleuia kuali mamokuayejyeko ijkuak tlajtos uan ijkon oksekimej okachi kineltokaj tlen kijtoua”. ¿Ken uelis tikchiuaskej tlen nikan kijtoua? (Prov. 15:28; 16:23).

Tla se siuatl kineki matlaneltoka inamik moneki mokuayejyekos ken kitlapouis uan amo san niman tlajtos. Amo moueyineki nion kiteititia ye okachi ixtlamatki. Ijkon tlen kijtos kiyolchikauas uan kichiuas kuali mamouikakan. Tla kineki kuali motlapouis iuan inamik, moneki mamotlajtlani: “¿Keman okachi kuali nimotlapouis iuan nonamik? ¿Tlen kipaktia kijtos? ¿Tlen kipaktia kitlajtoltis? ¿Kipaktia ciencia, política noso okseki tlamantli? ¿Ken uelis nikchiuas makipakti tlen kijtoua Biblia uan noijki niktlakaitas tlen kimachilia uan mokuayejyekoua?”.

Tla tiknekij tofamiliares makinpakti tlen kijtoua Biblia amo san moneki matikintlapouikan. Moneki matikchiuakan tlen tikijtouaj.

MATIKTEITITIKAN TIKCHIUAJ TLEN TIKIJTOUAJ

Jürgen kijtoua: “Nochipa xikchiua tlen kijtoua Biblia. Ijkon mofamiliares akinmej amo momachtiaj kitaskej kuali tlen tikchijtok maski amo mitsiluiskej”. Hans omoapolakti 30 xiuitl satepan ijkuak isiua omoapolakti uan ye okijto: “Moneki matikchiuakan tlen kuali, ijkon tofamiliares tlen amo momachtiaj kitaskej melauak tikchiuaj tlen tlamachtia Biblia”. Tofamiliares moneki makitakan techpaleuia tlen timomachtiaj.

Apóstol Pedro okijto tlen moneki kichiuaskej tokniuan siuamej tla innamik amo momachtia: “Xiktlakitakah nomookich. Ijkó, non amo tlaneltokakeh, tlaneltokaskeh ijkuak nomechitaskeh kenijki nontetlakitah, iwa mach ok monekis xiktetlapowikah itlajtol Dios. Porke yejwah kitaskeh kenomi nonmoyekuikah iwa nonmotlakitah. Amo san ximochijchiwakah ik pánixko, kemi n siwameh non saikpanoa mochijchiwah, noso kimopipililtiah oro, iwa motlakentiah ika kuajkualteh tlakemeh. Yej xiyetokah tlakualtsi ik tlaijtik, itech nomoyolo, nochi tlan kuali amo poliwi, yej tikpias se espíritu yámanki ika yolsewílistli, ni tlan okachi ipati ixpa n Dios” (1 Ped. 3:1-4).

Pedro okijto tla tokniuan siuamej kichiuaj tlen kuali, uelis kichiuaskej innamik matlaneltoka. Se tokni itoka Christa ijkon kichiua, ye omoapolakti itech xiuitl 1972 uan mochijchikaua kipaleuis inamik. Maski inamik yomomachti inmiuan tokniuan ayamo kitekichiuilia Jehová. Noijki touan yomonechiko uan kuali mouika inmiuan tokniuan porque kiteititiaj kitlakaitaj tlen ye mokuayejyekoua. ¿Ken kichiua Christa para kipaleuis?

Ye okijto: “Nikkauilia Jehová manechyekana, noijki nimochijchikaua nikchiuas tlen kijtoua Biblia uan ijkon nikpaleuis nonamik. Ijkuak nechiluia manikchiua itlaj tlen amo kixnamiki Biblia, nikchiua para nikyolpaktis. Niktlakaita tlen kineki kichiuas uan nikiluia Jehová manechpaleui”.

Tlen kichiua Christa techititia amo san moneki matechtekipacho tlen tejuan tiknekij tikchiuaskej, noijki moneki matechtekipacho tlen oksekimej kinekij. Ye monechikoua uan tetlapouia, pero noijki kitekipachoua tlen kineki inamik. Ye kilnamiktok moneki kititis inamik kitlasojtla uan moneki iuan yetos. Tinochtin moneki matechtekipacho tlen kinekij tofamiliares tlen amo momachtiaj uan matikinmajsikamatikan. Biblia kijtoua “nochi moneki tikitaskej keman tikchiuaskej”, non kijtosneki moneki tiyetoskej inmiuan tofamiliares tlen amo momachtiaj, tokniuan tlen inamik noso insiua amo momachtia moneki ijkon kichiuaskej. Tla katej san sekan, uelis okachi kuali mouikaskej uan noijki amo kimachiliskej amo kinekij inmiuan yetoskej nion chauatiskej (Ecl. 3:1).

AMO MATIMOSOTLAUAKAN

Itajtsin Holger omoapolakti 20 xiuitl satepan ijkuak ye iuan ifamilia omoapolaktijkej, Holger okijto: “Moneki matikititikan tiktlasojtlaj tofamiliar akin amo momachtia uan noijki ipatka matimotlatlaujtikan”. Christa okijto: “Amo keman nimosotlauas uan nimochijchikajtos nikpaleuis nonamik para makitekichiuili Jehová”. Moneki matimokuayejyekokan tofamiliares akinmej amo momachtiaj, se tonal kitekichiuiliskej Jehová. Amo keman matimosotlauakan.

Tiknekij kuali timouikaskej inmiuan tofamiliares tlen amo momachtiaj, noijki tiknekij makimatikan tlen kijtoua Biblia pero tiknekij maajsi itech inyolo. Ijkuak tikinmiluiskej tlen kijtoua Biblia moneki matikinyekiluikan uan matikintlakaitakan (1 Ped. 3:15).