TLAJTLANILMEJ ITECH BIBLIA
¿Tleka moneki tiktlajtlaniliskej toTajtsin Dios ma uiki iTekiuajkayo?
¿Mitspaktiskia okachi tikmatis itech iTekiuajkayo toTajtsin Dios uan tlen kichiuas?
ITekiuajkayo toTajtsin Dios kajki iluikak. Jesús okinmachti imachtijkauan ma motlatlaujtikan uan ma kitlajtlanikan ma uiki iTekiuajkayo toTajtsin Dios, pampa san nin Tekiuajkayotl uelis kichiuas ma yeto yolseuilistli uan melajkayotl. Nion se tekiuajkayotl uelis kichiuas ayakmo ma moteuikan tlaltikpaktlakamej, ma yeto melajkayotl nion uelis kitlajtlamis kokolistli, pero iTekiuajkayo toTajtsin Dios kema uelis uan kichiuas. ToTajtsin Dios okitlali Jesús ken ueyi Tekiua itech nin Tekiuajkayotl uan noijki okinpejpenki sekimej tlaltikpaktlakamej pampa iuan ma tlanauatikan. (Xiktlajtolti Lucas 11:2 uan 22:28-30.)
Ayakmo miak poliui uan Tekiuajkayotl kinmixpolos nochtin akinmej kikokoliaj toTajtsin Dios. Ik non, ijkuak tiktlajtlaniliaj ma uiki iTekiuajkayo tiktlajtlaniliaj ma kinpatla tekiuajkej ika iTekiuajkayo. (Xiktlajtolti Daniel 7:13, 14 uan Apocalipsis 11:15, 18.)
¿Tleka Tekiuajkayotl uelis techpaleuis?
Jesús se kuali ueyi Tekiua pampa kinmiknomati tlaltikpaktlakamej. Ken ye ikone toTajtsin Dios, ye kipia chikaualistli pampa kinpaleuis akinmej kitlajtlaniliaj iTajtsin ma kinpaleui. (Xiktlajtolti Salmo 72:8, 12-14.)
Nochtin akinmej kitlakamatij itlanauatiluan toTajtsin Dios uan ika nochi inyolo kitlajtlaniliaj ma uiki iTekiuajkayo kiseliskej miakej tlateochiualismej. Ximomachti tlen kijtoa Biblia itech nin Tekiuajkayotl. Amo keman timoyolkokos. (Xiktlajtolti Lucas 18:16, 17 uan Juan 4:23.)