TLAMACHTIL TLEN IKA PEUA | ¿MELAUAK ONKA DIABLO?
¿Moneki techmomojtis Diablo?
Diablo noijki ken monóxido de carbono: amo mota uan sapanoa tetlajyouiltia
Onka se gas tlen amo mota uan tlen amo moijnekui, nin gas itoka monóxido de carbono uan yokinmikti sapanoa miakej tlaltikpaktlakamej. Moijtoa miakej tlaltikpaktlakamej mikij ika nin gas. Pero amo ma techmomojti nin gas. Onka miak tlamantli tlen techpaleuia pampa amo ma techmikti uan san niman ma tikmatikan onka nin gas. Miakej tlaltikpaktlakamej inkalijtik kintlaliliaj alarmas tlen tsilinij ijkuak onka nin gas.
Diablo noijki ijkon ken monóxido de carbono: amo mota, sapanoa tetlajyouiltia uan amo tikmatij keman uelis peuas techijtlakos. Pero amo ma techmomojti, pampa toTajtsin Dios techpaleuia ika miak tlamantli. Ma tikitakan seki tlamantli tlen ika techpaleuia.
Uelis tikpejpenaskej. Santiago 4:7 kijtoa: “Ximochijchikawakah para amo manomechtlani n amokualitlakatl, iwa ye nomechcholilis”. Maski Satanás kipia chikaualistli, amo uelis techchiualtis ma tikchiuakan itlaj tlen amo tiknekij tikchiuaskej. Tejuan tikpejpenaj tlen tikchiuaskej. Tla tikpiaj chikauak totlaneltokilis, ye cholos (1 Pedro 5:9). Ken Jesús amo okiseli tlamantli tlen okilui Satanás, saiktlami Satanás okikajte Jesús (Mateo 4:11). Tejuan noijki ijkon uelis tikchiuaskej.
Iuan timouikaskej. Santiago 4:8 kijtoa: “Xiwalmijkuanikah [ximotokikan] inawak Dios”. Jehová techyoleua iuan ma timouikakan. ¿Ken uelis iuan timouikaskej? Uelis tikchiuaskej tla kuali tikmatij tlen techiluia Biblia itech toTajtsin Dios (Juan 17:3). Tla okachi kuali tikixmatij toTajtsin Dios, okachi tiktlasojtlaskej, uan tla okachi tiktlasojtlaj okachi tiknekiskej tiktekichiuiliskej (1 Juan 5:3). ¿Tlen kichiuas toTajtsin Dios pampa timochijchikauaj? Santiago noijki okijto: “Ye [toTajtsin Dios] mijkuanis [motokis] nomonawak”.
Jehová techiluia techmaluis
Yokijto techmaluis. Proverbios 18:10 kijtoa: “Itoka Jehová ken se tepamitl. Akin yolmelauak ompa itech motlaloa uan kimaluia”. Nin amo kijtosneki san tikijtoskej tokayotl Jehová uan techmakixtis, okachi kuali akinmej kitlakaitaj uelis motokiskej itech toTajtsin Dios uan ye kinpaleuis ijkuak kinekiskej.
Se neskayotl tlen moneki tikchiuaskej. Itech Hechos 19:19 onka se tlapoualistli tlen uelis techpaleuis miak. Nin tlapoualistli techiluia tlen okichijkej akinmej opejkej kichiuaj ken Cristo tlen ochantiayaj Éfeso. Itech amochtli Hechos kijtoa: “Noiwa miakeh non otetlajchiwiayah, okwalinwikakeh intlajkuilolwah non intech omomachtiayah para tetlajchiwiskeh iwa teixpa okinchichinojkeh. Iwa ijkuak okiyejyekolijkeh kech impati nonteh tlajkuílolteh, okijtojkeh ome póali iwa n májtlaktli mil (50,000) platajtomi”.a Tokniuan ayakmo okinekiayaj kipiaskej nion amochmej tlen otlamachtiayaj itech magia, maski sapanoa patio okatkaj. Nin se kuali neskayotl pampa tejuan. Axkan noijki miakej tetlajchiuiaj. Onka miak tlamantli tlen uelis tikijtoskej amo techijtlakos, pero uelis mouika iuan tetlajchiuilistli noso iuan amo kuali ejekamej. Ik non, miak ipati ma timochijchikauakan pampa ma tikisakan itech tetlajchiuilistli (Deuteronomio 18:10-12).
Ijkuak Rogelio —akin itech otitlajtojkej kanin peua nin tlamachtil— okipiaya 50 xiuitl, okajsikamatki Diablo melauak onka. ¿Tleka okipatlak tlen okineltokaya? Ye kijtoa: “Oajsik tonal ijkuak onikpixki se Biblia, uan tlen oniktlajtolti okichi ma nikajsikamati Diablo melauak onka. Nochi nin tlamachtilistli nechpaleuia pampa amo ma nechkajkayaua”.
“Tlen oniktlajtolti itech Biblia okichi ma nikajsikamati Diablo melauak onka. Nochi nin tlamachtilistli nechpaleuia pampa amo ma nechkajkayaua”
¿Mitspaktiskia ayakmo ma yeto Diablo? Nin melauak mochiuas. Biblia techyekiluia ayakmo miak poliui uan Satanás akin yokinkajkaya miakej tlaltikpaktlakamej, “kitlamotlaskeh kan kuakualakatok tletl iwa asufre” (Apocalipsis 20:10). Uan ken tlitl uan azufre amo itlaj uelis kichiuiliskej se espíritu, nin lago kijtosneki okse tlamantli: kijtosneki sepa kipojpoloskej. Kema, Satanás sepa kimiktiskej. ¡Itekipanojkauan toTajtsin Dios melauak yolpakiskej!
Ik non, axkan ximomachti okachi itech Jehová uan tlen kineki.b Tla tikchiuas tikitas tonal ijkuak tikijtoskej: “¡Diablo ayakmo onka!”.
a Tla nin tomin okatkaj denarios romanos, ikaj monekiskia tekitis nochi tonalmej itech kanaj 136 xiuitl. Sapanoa miak tomin.
b Tla tikneki tikmatis okachi itech Diablo uan tlen kijtoa toTajtsin Dios itech tetlajchiuilistli, xikita tlamachtil 10 itech amochtli ¿Tlen melauak tlamachtia Biblia? Xiktlajtlanili se iTlaixpantijka Jehová noso xiktlajtolti itech www.jw.org/ncx.