Se tlamantli tlen miak ipati tlen kuali okimaluijkej maski opanok miak xiuitl

Nin tlapoualistli peua ika Thomas (1)a Williams akin oneski itech tonal 20 metstli enero xiuitl 1815 itech Horncastle (Inglaterra). Inantsin omikik ijkuak ye okipiaya ome xiuitl, ik non, itajtsin, John, okiskalti ye uan ok eyi ikniuan. Itajtsin okimachti pampa yetos kuajxinki, pero Thomas okinekiaya kichiuas okse tlamantli.

Itech non kauitl, itech Inglaterra okse tlamantli opejkej mokuayejyekoaj. Akin otetlapouiaya John Wesley omoxelo itech teopan anglicana uan okipeualti tlaneltokilismej Metodistas, okinyoleuaya oksekimej ma kitlajtoltikan Biblia uan ma tetlapouikan. Tlen otlamachtiaya Wesley sapanoa omoxitini, uan kalchanejke Williams okinseli. Thomas opejki tetlapouia ken okichiuaya Wesley uan okinekiaya tetlapouiti itech Pacífico sur. Itech metstli julio xiuitl 1840, satepan ijkuak omonamikti, oajsito iuan isiua, Mary, (2) itech Lakeba,b se isla tlen okatka itech altepetl Fiyi kanin okatkaj tlakamej tlen okikuayaj innakayo tlaltikpaktlakamej.

OCHANTIAYAJ IUAN TLAKAMEJ TLEN OKIKUAYAJ INNAKAYO OKSEKIMEJ TLALTIKPAKTLAKAMEJ

Achto xiuitl tlen okatkaj itech Fiyi sapanoa oui okatka. Sapanoa otekitiaj, amo okatka miak tlen ika mopanoltiskej, sapanoa otonaya, uan tlaltikpaktlakamej amo okinkakiaya. Uan amo san okitakej ken nonmej tlakamej okikuayaj innakayo oksekimej tlaltikpaktlakamej, noijki okitakej ken okinkechtsontekiayaj iknosiuamej, ken okinmiktiayaj konemej uan ken sapanoa omoteuiayaj ompa. Mary uan achto ikone, John, sapanoa omokokojkej uan hasta yimikiskiaj. Itech 1843, Thomas okijkuilo: “Amo kuali onimomachiliaya pampa sapanoa onimotekipachoaya. [...] Amo onikmatiaya tlen nikchiuaskia”. Pero Thomas uan Mary otlaxikojkej, uan amo okipolojkej intlaneltokilis itech inDios, Jehová.

Itech non kauitl, Thomas omopaleui itech tlen okimachtijkej pampa kuajximas uan okichijchi achto kali europeo ompa itech Fiyi. Nin kali sapanoa okinpakti tlaltikpaktlakamej tlen ompa ochantiayaj, okinpakti ken okatka achitsin tlakpak pampa ma kalaki ejekatl. Achto kitlamiskia nin kali, Mary okipixki okse konetl, ye Thomas Whitton (3) Williams, iuejkatata notajtsin.

Itech 1843, Thomas akin teta otlapaleui pampa kitlajtolkuepaskej Evangelio de Juan ika tlajtoli fiyiano, itlaj tlen sapanoa oui.c Ye kuali okinmixmatiaya tlaltikpaktlakamej, pampa ye kuali okinmitaya. Ik non, okijkuilo se amochtli itech inyelis fiyianos itech siglo 19, tlen omotokayotiaya Fiji and the Fijians (1858).

Ken opanok 13 xiuitl uan otekitik miak, Thomas omokoko, ik non, ye uan ikalchanejkauan oyajkej ochantito Australia. Ompa ok otetlapouiayaj uan nochtin okitlakaitayaj. Itech xiuitl 1891, omikik itech Ballarat, itech altepetl Victoria.

KAJSI “ORO” ITECH OESTE

Itech xiuitl 1883, Thomas Whitton Williams, isiua Phoebe, (4) uan inkoneuan ochantitoj Perth (Austlalia Occidental). Okse inkone, nouejkatata Arthur Bakewell (5) Williams, okipiaya chiknaui xiuitl.

Ijkuak okajxiti 22 xiuitl, Arthur okitemoto tlen ika mopanoltis itech Kalgoorlie, se altepetl tlen okatka itech 600 kilómetros ik este itech Perth altepetl tlen okipiaya miak tomin pampa okipiaya miakej minas kanin okikixtiayaj miak oro. Ompa okitlajtolti seki amatlajkuilolmej tlen okinchijchiuayaj akinmej oMomachtiayaj Biblia, ijkon okinmixmatiayaj iTlaixpantijkauan Jehová itech nonmej tonalmej. Noijki okitlajtlanki ma kinuikilikan amatlajkuilolmej Zion’s Watch Tower (axkan Akin Tetlapouijtok). Sapanoa okintlajtlachialtiaya tlen omomachtiayaj, opejki kintlapouiaj oksekimej uan opejkej kichiuaj nechikolmej itech ikalijtik pampa momachtiskej Biblia. Ijkon opejki tetlapouiaj itech tlen melauak tlamachtiaj iTlaixpantijkauan Jehová itech Australia Occidental.

Arthur noijki okintlapoui ikalchanejkauan itech tlen omomachti. Itajtsin okipaleui, pero satepan san niman omikik. Inantsin, uan iikniuan, Violet uan Mary, noijki opejkej momachtiaj Biblia. Violet omochi precursora, akin otekitiaya ika kauitl ajsitok. Arthur okijto Violet okatka: “Se precursora tlen okachi otekitiaya itech nochi Australia Occidental”. Onimokuayejyekoaya san okijtoaya, pero Violet omochi se kuali neskayotl pampa kalchanejke Williams tlen nesiskiaj satepan.

Seki kauitl satepan, Arthur omonamikti uan ochantito Donnybrook, se altepetl kanin nochtin okitokayaj tlakilolmej ik suroeste itech Australia Occidental. Ompa nochtin okiluiayaj akin yotlapolo itech 1914 pampa nochipa okijtoaya itech non xiuitl itlaj panoskia tlen yomoijtojka itech Biblia.d Pero ijkuak opejki Primera Guerra Mundial, ayakmo ijkon okiluiayaj. Arthur okintlaliaya amatlajkuilolmej itech Biblia kanin ye otlanemakaya uan okintlapouiaya akinmej okitlakouiliayaj. Noijki okitlali se amatl kanin okijtoaya kitetliokoliskia 100 libras akin uelis kijtos ika Biblia melauak tlen kijtoa tlamachtil itech Trinidad, se tlamachtil tlen ye okixtopeuaya. Amo ika okitlanki non tetliokolil.

Itech inkalijtik Williams itech altepetl Donnybrook opejkej monechikoaj pampa momachtiskej Biblia. Satepan, Arthur okichijchi se kali pampa uelis monechikoskej itech non altepetl, achto kali kanin monechikoaj iTlaixpantijkauan Jehová itech Australia Occidental. Maski yokipiaya 80 xiuitl, ok kuali omotlakentiaya, okiyektlaliaya icaballo, Doll, uan otetlapouiaya itech nochi altepetl Donnybrook.

Arthur oyaj se tlakatl yolyamanki uan okipiaya chikauak itlaneltokilis, okinmakak se kuali neskayotl inkoneuan. Itakotsin, Florence (6) otekipanok ken misionera itech altepetl India, uan inkoneuan, Arthur Lindsay (7) uan Thomas, otekipanokej ken tlayekankej itech tlanechikol, ijkon ken intajtsin.

MANZANA TLEN TSOPELIK LADY WILLIAMS

Arthur Lindsay Williams, nouejkatata, okatka se tlakatl yolkuali uan okipaktiaya kitemakas tlen okipiaya. Nochipa okixeloaya kauitl pampa oksekimej uan okintlakaitaya. Noijki kuali okitekitiltiaya hacha, uan itech 12 xiuitl okintlanili oksekimej, 18 tetliokolilmej pampa kuali okintekiaya kuajmej.

Pero Arthur amo okipakti ken ikone akin okipiaya ome xiuitl, Ronald (8) nokojkol, akin okitski se hacha uan okitejteki se kuauitl tlen okitemakaya manzanas tlen okatka inakastlan tokalijtik. Inantsin Ronald okiyoliti non kuauitl, tlen satepan okitemakak miak manzanas tlen okatka sapanoa tsopelikej, uan ken ye okiyoliti nin kuauitl okitokayotijkej manzanas Lady Williams. Ninmej manzanas oneskej achto nesiskiaj manzanas Cripps Pink, tlen okachi kinmixmatij itech nochi Tlaltikpak.

Ronald nokojkol, amo okipaktiaya san tlaxixitinis ijkuak omoskalti. Satepan omonamikti, ye uan nositsin opejki tekiti pampa kinchijchiuaskej kalmej tlen kintekitiltia iTlaixpantijkauan Jehová itech Australia uan itech islas Salomón. Axkan maski nokojkol yikipiaj 80 xiuitl, tekiti ken tlayekanki itech tlanechikol uan tekiti pampa kinchijchiuaskej uan kinyektlaliskej kalmej kanin monechikoaj iTlaixpantijkauan Jehová itech Australia Occidental.

TIKPATIOITAJ MIAK TLEN OTECHKAJTEUILIJKEJ

Ijkon ken okichijkej touejkatatajuan, notatajuan, Geoffrey (9) uan Janice (10) Williams, omochijchikajkej pampa techmachtiskej ken tikchiuaskej ken Cristo, nokni, Katharine (11) uan ne (12). Ijkuak onikpiaya 13 xiuitl onikpejpenki nikchiuas ijkon uan niktekichiuilis toTajtsin Dios nochipa itech noyolilis. Ijkon onikpejpenki ijkuak oniajsito nokalijtik satepan onia itech se nechikol kanin otimomachtijkej Biblia. Ompa onikak se tlapoualistli tlen okitemakak John E. Barr, akin opouiya itech Cuerpo Gobernante tlen kipiaj iTlaixpantijkauan Jehová, okinmilui telpokamej ninmej tlajtolmej: “Amo xikpolokan tlen okachi ipati nankipiaj: nonkixmatiskej Jehová uan nonkitlasojtlaskej”. Ome xiuitl satepan, onimochi precursor.

Axkan, nosiua, Chloe, uan ne titetlapouiaj miak iTlajtol toTajtsin Dios itech Tom Price, se altepetl kanin miakej tekitij itech minas ik noroeste itech Australia Occidental. Pampa timopanoltiskej, san seki kauitl titekitij. Notatajuan, nokni uan inamik akin itoka Andrew, noijki katej ken precursores itech Port Hedland, tlen kajki itech kanaj 420 kilómetros ik norte itech Tom Price. Notajtsin uan ne noijki titlayekankej itech tonechikoluan.

Chikome kalchanejkej Williams, opejki ika iuejkatata nokojkol hasta notech axkan tonalmej, nochtin tejuan otikpejpenkej tiktekichiuiliskej toTajtsin Dios itech nochi toyolilis. Sapanoa nikpatioita tetliokolil espiritual tlen onechkajteuilijkej.