TLAMACHTIL TLEN IKA PEUA | ¿AKINMEJ ITLAIXPANTIJKAUAN JEHOVÁ?
¿Tlen kineltokaj iTlaixpantijkauan Jehová?
TiiTlaixpantijkauan Jehová tikneltokaj “nochi tiotlajkuíloli Dios otlanawati makijkuilokah” (2 Timoteo 3:16). Itech Biblia timomachtiaj itech akin oTechchijchi, uan noijki timoyekanaj ika tlen kijtoa Biblia, pampa ijkon okachi kuali tikpiaskej tonemilis.
Biblia kijtoa: “Tlaltikpaktlakamej ma kimatikan te, akin motoka Jehová, san te okachi tiUeyititok ipan nochi Tlaltikpak” (Salmo 83:18). Ik non, san tikueyichiuaj toTajtsin Jehová. Uan noijki ken tiiTlaixpantijkauan timochijchikauaj pampa oksekimej ma kixmatikan nin tokayotl (Isaías 43:10-12).
Tikchiuaj ken Cristo uan tikneltokaj “Ye Ikone Dios”,a akin ouala Tlaltikpak uan ye Mesías (Juan 1:34, 41; 4:25, 26). Satepan ijkuak okimiktijkej Jesús, okiyolitijkej uan omokuepki iluikak (1 Corintios 15:3, 4). Uan seki kauitl satepan okitlalijkej ken ueyi Tekiua itech iTekiuajkayo toTajtsin Dios (Apocalipsis 11:15). Nin tekiuajkayotl yikajki uan kichiuas nochi Tlaltikpak ma mokuepa se Xochitlali (Daniel 2:44). Biblia kijtoa: “Akinmej yolkualmej yetoskej itech Tlaltikpak, uan melauak yolpakiskej pampa yetos miak yolseuilistli” (Salmo 37:11, 29).
“Ijkuak kitlajtoltiaj Biblia, yetoskia ken toTajtsin Dios kintlapouijtoskia. Ijkuak itlaj kintlajyouiltia, itech iTlajtol toTajtsin Dios kitemoaj tlapaleuilistli. [...] Yejuan kineltokaj Biblia yoltok.” (Nin okijto teopixki Benjamin Cherayath, okiski itech periódico Münsterländische Volkszeitung, Alemania)
TiiTlaixpantijkauan Jehová tikneltokaj nochi tlen kijtoa Biblia kinpaleuia tlaltikpaktlakamej (Isaías 48:17, 18). Ik non, timochijchikauaj tikintlakamatiskej nochi itlanauatiluan. Se neskayotl, Biblia techiluia moneki tikpiaskej chipauak tokuayejyekol uan totlalnakayo, ik non, amo titlachichinaj nion tikintekitiltiaj drogas (2 Corintios 7:1). Noijki amo tikchiuaj tlamantli tlen Biblia kijtoa amo ma tikchiuakan, amo titlauanaj, amo tiauilnemij nion titlachtekij (1 Corintios 6:9-11).
a Itech Biblia kijtoa Jesús “san Ye se Ikone n Totajtsi Dios”, pampa san ye ineuia toTajtsin Dios okichijchi. Uan noijki achto ye okichijchi (Juan 3:18; Colosenses 1:13-15).