Xitetlapojpolui

PRINCIPIO BÍBLICO: “Ximosepantlapojpolwikah ijkó kemi Dios otechtlapojpolwi por Cristo” (Efesios 4:32).

¿Tlen kijtosneki? Itech Biblia moijtoa tlajtlakoli ken itlaj tlen tikteuikiliaj uan ijkuak techtlapojpoluiaj ken ijkuak ayakmo itlaj tikteuikiliaj (Lucas 11:4). Itlaj tlen ijkuilitok itech Biblia kijtoa tlajtoli griego tlen motlajtolkuepa “tlapojpoluilistli” uelis kijtosneki “tikilkauaskej tlen techuikiliaj, noso amo tikchiuaskej ma techtlaxtlauilikan”. Ik non, ijkuak tiktlapojpoluiaj ikaj akin otechyolkoko, tikijtoaj ayakmo itlaj techuikilia. Tlapojpoluilistli amo kijtosneki kuali tlen otechchiuili nion kijtosneki amo otechyolkoko tlen otechchiuili. Kijtosneki amo tikilnamikiskej tlen otechchiuili, maski uelis otechkualani.

¿Techpaleuia nin principio? Ken tinochtin titlajtlakolejkej ualeua tikchiuaj tlen amo kuali (Romanos 3:23). Ik non, moneki ma tikintlapojpoluikan oksekimej, pampa se tonal noijki tiknekiskej ma techtlapojpoluikan. Uan tla titetlapojpoluiaj noijki tejuan timopaleuiaj. ¿Ken techpaleuia ma titetlapojpoluikan?

Tla tikualantokej uan amo titetlapojpoluiaj, san toneuian timoijtlakoaj. Tlen tikmachiliaj uelis kichiuas amo ma tiyolpakikan, ma timoyolkokokan uan amo kuali ma tikpiakan tonemilis. Uan noijki uelis timokokoskej. Itech revista Journal of the American College of Cardiology, Andrew Steptoe akin tlamachtia psicología uan akin tlapajtia Yoichi okijtojkej: ‘Tlen yikin otimomachtijkej kijtoa amo kuali sapanoa ma tikualanikan uan nion ma tikintlauelitakan oksekimej, pampa nin kijtlakoa toyolo’.

Axkan ximokuayejyeko ken mitspaleuia titetlapojpoluis. Ijkuak tikintlapojpoluiaj oksekimej noijki titlapaleuiaj pampa ma tikpiakan yolseuilistli uan san sekan ma tiyetokan, uan noijki kuali timouikaj iuan oksekimej. Pero noijki tikchijtokej ken toTajtsin Dios, akin kintlapojpoluia akinmej moyolkuepaj uan kineki tejuan noijki ijkon ma tikchiuakan (Marcos 11:25; Efesios 5:1).