TLAMACHTIL TLEN IKA PEUA | ¿AYAKMO IKAJ KICHIUA TLEN KUALI?

Tikchiuaskej tlen amo kuali techijtlakoa

“Miak uelta titlakajkayauaskej sapanoa techpaleuia” (Samantha, Sudáfrica).

¿Noijki ijkon timokuayejyekoa? Ualeua tinochtin techpanoa itlaj tlen sapanoa oui uan amo tikmatij tlen tikchiuaskej. Pero tlen tikchiuaskej ijkuak techpanos itlaj tlen uelis kichiuas ma titlakajkayauakan kiteititis ken toyelis. Se neskayotl, tla okachi techtekipachoa ken techitaj oksekimej, uelis amo tikijtoaj itlaj tlen amo kuali otikchijkej. Pero ijkuak momati tlen melauak, moneki ma tikijtokan otitlakajkayajkej. Axkan tikitaskej tlen panoa ijkuak ikaj tlakajkayauaj.

AYAKMO KINELTOKILIAJ AKIN TLAKAJKAYAUA

Okachi kuali timouikaj iuan akin itech titlaneltokaj. Pero pampa uelis itech ikaj titlaneltokaskej moneki ma pano seki kauitl. Nin mochiua ijkuak kuali motlapouiaj, kijtoaj tlen melauak uan amo tlakajkayauaj. Pero ijkuak ikaj kijtos itlaj tlen amo melauak, okse ayakmo itech tlaneltokas. Uan ijkuak ayakmo itech tlaneltokaj, sapanoa oui pampa oksepa itech tlaneltokaskej.

¿Yomitskajkaya akin kuali iuan otimouikaya? Tla ijkon uelis otikmachili amo kuali tlen okichi, uan otikijto amo melauak moyolikni. Ijkuak kijtoaj tlen amo melauak uelis kinmijtlakos akinmej sapanoa kuali mouikaj.

OKSEKIMEJ NOIJKI KINEKIJ KICHIUASKEJ TLEN AMO KUALI

Robert Innes akin tlamachtia itech Universidad de California okitak “oksekimej noijki kinekij kichiuaskej tlen amo kuali”. Nin ken se kokolistli: tla sapanoa timouikaj iuan akin tlakajkayaua, satepan noijki tiknekiskej titlakajkayauaskej.

¿Tlen uelis tikchiuaskej pampa amo titlakajkayauaskej? Biblia techpaleuia. Ma tikinmitakan seki principios bíblicos.

¿Ken kichiuaj tlen amo kuali?

Tlakajkayauaj

¿TLEN KIJTOSNEKI? Tikiluiskej itlaj amo melauak akin moneki kimatis tlen melauak. Noijki kijtosneki tikpatlaskej tlen melauak opanok, pampa ikaj tikkajkayauaskej, amo tikijtoskej seki tlamantli noso noijki tikijtoskej okseki tlamantli tlen amo melauak opanok.

BIBLIA KIJTOA: “Jehová kikokolia akin kitlatia iyelis [noso, tlakajkayaua], pero Ye kuali mouika iuan akinmej yolmelauakej” (Proverbios 3:32). “Ayakmó ximokajkayawakah, yej nochipa xikijtokah tlan milák” (Efesios 4:25).

Tlateneuaj

¿TLEN KIJTOSNEKI? Tikijtoskej tlen amo melauak itech ikaj pampa tikijtlakoskej.

BIBLIA KIJTOA: “Akin kichiua ma mokualanikan kinxeloa, uan akin tlateneua kinxeloa akinmej kuali mouikaj” (Proverbios 16:28). “Kanin amo onka kuauitl, tlitl seui, uan kanin amo ikaj tlateneua, amo ikaj mokualania” (Proverbios 26:20).

Tlakajkayauaj pampa itlaj kipiaskej

¿TLEN KIJTOSNEKI? Kinkajkayauaj tlaltikpaktlakamej pampa ma kitemakakan tomin noso tlen kipiaj.

BIBLIA KIJTOA: “Amo xikkajkayaua akin tiktlakeua uan tlen amo kipia tomin” (Deuteronomio 24:14, 15). “Akin kikajkayaua akin amo itlaj kipia, kipinatia akin oKichijchi, pero akin kintlasojtla akinmej amo kipiaj tomin kiueyichiua” (Proverbios 14:31).

Tlachtekij

¿TLEN KIJTOSNEKI? Kimoaxkatiskej tlen amo inmiaxka.

BIBLIA KIJTOA: “Akin otlachtekia, ayakmó matlachteki, yej mapewa matekiti ika imawah para makipia tlan ika kimpalewis akimeh kimpoloa” (Efesios 4:28). “Amo manomechkajkayawakah; [...] n tlachtekeh, n tominápisteh, n tlawankeh, n tepojpojkeh, iwa akimeh tekajkayawah para tlachtekiskeh, mach kalakiskeh kan Dios tlanawatijtok” (1 Corintios 6:9, 10).