“¿Kanin okatka toTajtsin Dios?”

¿IJKON YOTIMOTLAJTLANI IJKUAK PANOA TLEN AMO KUALI? ¿YOTITLAJYOUI UAN TIMOKUAYEJYEKOA TOTAJTSIN DIOS AMO MOTECH MOTEKIPACHOA?

Sheila chanti Estados Unidos, ye uan ikalchanejkauan sapanoa kipatioitaj intlaneltokilis. Ye okijto: “Desde nitakotsin nitlaneltoka itech toTajtsin Dios porque nikmati ye otechchijchi pero onikmachiliaya uejka okatka. Maski onikmatiaya ye onechitaya pero ne onikijtoaya amo onechkakiaya. Amo onimokuayejyekoaya onechkokoliaya pero onimokuayejyekoaya amo notech omotekipachoaya”. ¿Tleka ijkon omokuayejyekoaya Sheila? Ye okijto: “Nokalchanejkauan sapanoa otlajyouijkej uan omotaya toTajtsin Dios amo otechpaleuiaya”.

Xamo mitspanotok ken Sheila, maski titlaneltoka itech toTajtsin Dios pero timotlajtlaniaj kox motech motekipachoa. Ijkon okipanok Job, ye okineltokaya toTajtsin Dios kipia chikaualistli uan okimatiaya ye ixtlamatki (Job 2:3; 9:4). Ijkuak Job sapanoa otlajyoui okitlajtlani toTajtsin Dios: “¿Tleka timotlatia uan timokuayejyekoa nimitskokolia?” (Job 13:24).

¿Pero tlen kijtoa Biblia? ¿Itlajtlakol toTajtsin Dios titlajyouiaj? ¿Motekipachoa totech toTajtsin Dios? ¿Uelis tikmatiskej kox techixmati, kox kajsikamati tlen tikmachiliaj uan kox techpaleuia ijkuak tikpiaj ouijkayotl?

Itech okseki tlamachtilmej tikitaskej toTajtsin Dios totech motekipachoa porque kiteititia ika nochi tlen okichijchi uan ika tlen kijtoa Biblia (Romanos 1:20). Tikitas mitstlasojtla toTajtsin Dios tla okachi tikixmatis (1 Juan 2:3; 1 Pedro 5:7).