Jehová kintlasojtla tokniuan tlen yikipiaj miak xiuitl

ITECH nochi tlaltikpak tlayekankej kipatioitaj tekitl tlen kichiuaj itech ialtepe Jehová. Tinochtin tikpatioitaj inteki. Pero amo yiuejkika okinmiluijkej tlayekankej tlen yikipiaj miak xiuitl, ma kinmakakan tekitl tlayekankej tlen okachi telpokamej.

Ijkuak opejki ijkon kichiuaj, tlayekankej itech circuito uan tokniuan tlen kinmachtiaj tlayekankej, ayakmo tlamachtiaj ijkuak kajxitiaj setenta xiuitl. Tokniuan tlen yikipiaj ochenta xiuitl, kinmakaj tekitl tlen okachi telpokamej ma kinyekanakan akinmej pouij itech Comité tlen kipia Betel noso akinmej tlayekanaj itech tlanechikol. ¿Kox okinpakti tokniuan nin tlamantli? Tokniuan kitlakamatij Jehová uan ialtepe.

Se tokni itoka Ken tlen kanaj cuarenta y nueve xiuitl okinyekanaya akinmej pouij itech Comité tlen kipia Betel, okijto: “Onikijto kuali tla ikaj nechpatkayotiskia. Non kualkan onikilui Jehová ma kitlalikan okse tokni tlen okachi telpochtli”. Miakej ijkon kijtoaj ken tokni Ken. Nochtin tlayekankej okinpaktiaya kinpaleuiskej tokniuan, ik non, omoyolkokojkej ijkuak okimatkej ayakmo tlayekanaskiaj.

Se tokni itoka Esperandio tlen okinyekanaya tlayekankej, noijki omoyolkoko ijkuak ijkon okimatki. Pero noijki okijto omonekiaya momaluis porque omokokoaya. Pero ok kitekichiuilia Jehová uan tokniuan yolpakij ok kinpaleuia.

¿Tlen kinpanoa tokniuan tlen okatkaj tlayekankej itech circuito? Se tokni itoka Allan okatka tlayekanki itech circuito kanaj treinta y ocho xiuitl, okijto: “Amo onikneltokak tlen onechiluijkej”. Pero ye kijtoa kitekichiuilis Jehová uan sapanoa tlapaleuis tla kinmachtis okachi telpokamej.

Russell okatka tlayekanki itech circuito uan kanaj cuarenta xiuitl okinmachtiaya tokniuan tlen oyayaj itech Tlamachtilmej para akinmej kichiuaj ken Cristo. Ye uan isiua omoyolkokojkej. Okijto: “Otechpaktiaya tlen otikchiuayaj uan tejuan otikmachiliayaj ok uelis tikchiuaskiaj non tekitl”. Axkan ok kinpaleuiaj tokniuan kanin yejuan monechikoaj uan tokniuan yolpakij porque inmiuan katej.

Xamo tejuan amo otimoyolkokojkej ken ninmej tokniuan. Pero techpaleuis tlen kijtoa 2 Samuel para tikinmajsikamatiskej.

BARZILAI OKIJTO TLEN AYAKMO UELIS KICHIUASKIA

Ma tikilnamikikan Absalón okixnamik David akin okatka itajtsin. David oyajki Jerusalén itech se altepetsintli itoka Mahanaim itempa aueyatl Jordán. David uan akinmej okipaleuiayaj amo okipiayaj tlen ika mopanoltiskej. ¿Tlen opanok?

Eyi tlakamej ika nochi inyolo okinmakakej tlakuali, tlen ipan kochiskiaj uan okseki tlamantli. Se tlakatl omotokayotiaya Barzilai (2 Sam. 17:27-29). Ijkuak Absalón ayakmo okitemojtinemiaya David, ye omokuepki Jerusalén uan Barzilai okikajkauato. David okilui Barzilai iuan ma uia Jerusalén uan kimakaskia tlen kikuaskia maski amo itlaj okipoloaya (2 Sam. 19:31-33). David xamo okitak kuali iyelis Barzilai uan kuali kipaleuiskia porque yokipiaya miak xiuitl uan okatka ixtlamatki. Xamo Barzilai kipaktiskia iuan yaskia uan iuan tekipanoskia.

Pero Barzilai okilui yokipiaya ochenta xiuitl uan ayakmo okimatiaya tlen kuali uan tlen amo kuali. ¿Tleka ijkon okijto? “Xamo sapanoa okatka ixtlamatki”. Noijki kuali okintlapouiaya oksekimej ijkon ken okichiuayaj tlayekankej ijkuak okatka Rehoboam (1 Rey. 12:6, 7; Sal. 92:12-14; Prov. 16:31). Xamo Barzilai ijkon okijto porque yokipiaya miak xiuitl. Noijki okijto ayakmo otlakakiaya uan ayakmo itlaj okiueliliaya (Ecl. 12:4, 5). Ik non, David okilui ma kiuika Kimham uan nin telpochtli xamo ikone Barzilai (2 Sam. 19:35-40).

¿TLEKA MONEKI MA KINMACHTIKAN TELPOKAMEJ?

Tlen otikijtojkej kanin peua tlamachtil kiteititia tlen okimachiliaya Barzilai. Ye san omokuayejyeko tlen uelis kichiuaskia itelpoch. Pero axkan katej miakej tlayekankej uan moneki intech timokuayejyekoskej.

Tlayekankej tlen kipiaj miak xiuitl, kajsikamatij tleka moneki ma kinmakakan tekitl tlayekankej okachi telpokamej. Tla tokniuan kinpaleuiskej telpokamej okachi tekipanoskej itech ialtepe Jehová. Miakej tlayekankej kinmachtiaj tokniuan telpokamej ijkon ken Barzilai okimachti ikone uan Pablo noijki okimachti Timoteo (1 Cor. 4:17; Filip. 2:20-22). Tokniuan telpokamej kiteititiaj kuali kichiuaj inteki uan okachi tlapaleuiaj uan ‘kiyekiskaltiah ikuerpo Cristo’ (Efes. 4:8-12; xikita ika Números 11:16, 17, 29).

OK UELIS TIKTEKICHIUILIS JEHOVÁ

Itech nochi tlaltikpak tokniuan yokinmakakej tekitl oksekimej tokniuan uan ijkon okachi kitekichiuiliaj Jehová.

Se tokni itoka Marco tlen okatka kanaj diecinueve xiuitl ken tlayekanki itech circuito, okijto: “Axkan okachi nimotlapouia iuan innamik tokniuan tlen amo iTlaixpantijkauan Jehová”.

Se tokni itoka Geraldo yokipiaya veintiocho xiuitl ken tlayekanki itech circuito, okijto: “Nosiua uan ne otikijtojkej okse tlamantli tikchiuaskej, tikinpaleuiskej akinmej ayakmo tetlapouiaj uan okachi titlamachtiskej”. Nin tokni okijto axkan kinmachtijtok quince uan miakej monechikoaj tlen ayakmo otetlapouiayaj.

Tokni Allan tlen itech yotimotlapouijkej, okijto: “Axkan okachi titetlapouiaj. Techpaktia titetlapouiskej kanin miakej panoaj, kanin tlanemakaj uan ik kanin tichantij, kanaj ome touan yimonechikoaj”.

¿Yimiak xiuitl tiktekichiuilijtok Jehová uan ayakmo titlayekana? Ok uelis titekitis iuan Jehová tla tikinmachtis tokniuan telpokamej nochi tlen tikmati. Rusell tlen itech yotimotlapouijkej, okijto: “Jehová kinmachtia tokniuan telpokamej uan kintekitiltia porque kimatij ken tekitiskej. Tokniuan kinpaleuia ken tlamachtiaj uan ken kinmaluiaj” (xikita recuadro “Xikinmachti telpokamej okachi kuali ma tekitikan”).

JEHOVÁ MITSTLASOJTLA PORQUE TIYOLMELAJKI

Amo ximoyolkoko tla ayakmo titlayekanki. Nochi tlen tikchiua kinpaleuis oksekimej. Noijki tokniuan nochipa mitstlasojtlaskej.

Noijki Jehová amo keman kilkauas nochi tlen tikchiuaj. Ye yokijto: “Amo kilkauas tlen onankichijkej uan tlasojtlalistli tlen onankiteititijkej itech itoka porque onankinpaleuijkej uan nankinpaleuijtokej akinmej santos” (Heb. 6:10, TNM). Ika nin texto Jehová techititia amo kilkaua nochi tlen yotikchijkej. Jehová techtlasojtla uan nochipa kilnamiktos tlen tikchijtokej uan ijkon tikyolpaktiaj.

¿Uan tla ok titekipanoa ken tlayekanki? Noijki kipia miak ipati. ¿Tleka?

Tla titekipanoaj iuan se tokni tlen yikipia miak xiuitl uan ayakmo tlayekanki, uelis techpaleuis tlen kimati. Ik non, ma tikiluikan ma techpaleui ken okachi kuali tikchiuaskej toteki. Uan noijki ma tikitakan ken kitekitiltia nochi tlen kimati.

Maski tokniuan ayakmo tlayekanaj porque yikipiaj miak xiuitl, techpaleuis nochi tlen kimatij maski titlakamej noso tisiuamej uan ma tikilnamiktokan Jehová kintlasojtla nonmej tokniuan porque yimiak xiuitl okitekichiuilijkej uan ok mochijchikauaj.