Akin kuali tlakatl mota ika tlen kijtoa uan ika tlen kichiua

TINOCHTIN techpaktia totech ma motekipachokan uan ma techiknomatikan. Ik non, ¿ken uelis noijki timotekipachoskej intech oksekimej uan tikinmiknomatiskej?

Ijkuak Biblia kijtoa kuali tlakatl, kijtosneki ijkuak ikaj motekipachoa itech oksekimej uan kiteititia ika tlen kijtoa uan ika tlen kichiua. Akin kuali tlakatl amo san kintlakaita oksekimej. Noijki kinchiuilia tlen kuali porque kintlasojtla uan kinmajsikamati. Akin kuali tlakatl kichiua tlen kipaktia toTajtsin Dios uan nochtin akinmej kichiuaj ken Cristo moneki ijkon kichiuaskej (Gál. 5:22, 23). Ik non, tikitaskej ken Jehová uan Jesús ijkon kichiuaj uan tikitaskej ken uelis tikchiuaskej ken yejuan.

JEHOVÁ TECHIKNOMATI

Akin kuali tlakatl noijki teiknomati. Jehová tinochtin techiknomati uan noijki “akimeh amo motlasojkamatih innawak iwa akimeh tlajtlakolchiwah” (Luc. 6:35). Ik non, Biblia kijtoa: “Ye kichiwa makisa n tonati impa non kichiwah tlan kuali iwa kichiwah tlan amo kuali” (Mat. 5:45). Ik non, akinmej amo tlaneltokaj itech Jehová, mopaleuiaj ika tlen ye techmaka para tiyoltoskej uan yejuan noijki yolpakij.

Ma tikitakan tlen okichi Jehová. Ijkuak Adán uan Eva otlajtlakolchijkej, “okijtsonkej ixijyo higos”. Pero toTajtsin Dios okitak omonekiaya kipiaskiaj intlaken porque “omoskalti xiuitl tlen uitsyo”. Ik non, okinchijchiuili “ueueyak intlaken” (Gén. 3:7, 17, 18, 21).

ToTajtsin Dios kinmiknomati “non kichiwah tlan kuali iwa kichiwah tlan amo kuali”. Pero okachi kinmiknomati itekipanojkauan yolmelajkej. Ma tikitakan tlen opanok yiuejkika ijkuak okatka profeta Zacarías. Se ángel omotekipacho porque ayakmo okiyektlalijtokaj tepamitl tlen okiyaualoaya Jerusalén. Jehová kuali okikak uan “okiyolseui ika kuali tlajtolmej” (Zac. 1:12, 13). Noijki ijkon okiknomatki profeta Elías. Se tonal, sapanoa omoyolkokoaya uan okilui Jehová ma kikauili ma miki. ToTajtsin Dios okajsikamatki ken omomachiliaya uan okiualtitlanili se ángel ma kiyolchikauaki. Noijki okilui amo iselti okatka. Sapanoa okiyolchika tlen okiluijkej Elías uan nin okipaleui ma kitekichiuili Jehová (1 Rey. 19:1-18). Pero ¿akin okachi oteiknomatki ijkon ken toTajtsin Dios?

JESÚS OTEIKNOMATKI

Ijkuak Jesús okatka nikan tlaltikpak sapanoa oteiknomatki. Amo ikaj okitlajyouilti nion san otlanauati. Ye kuali okinmajsikamatiaya oksekimej, ik non, okinmilui: “Xiwikih nonawak nonnochteh akimeh tekitih chikawak iwa yononsotlawakeh, iwa Ne nomechsewis. [...] Porke n tekitl non Ne nikneki xikchiwakah amo owi se kitlakitas” (Mat. 11:28-30). Ik non, kuali omomachiliayaj ijkuak iuan okatkaj. Noijki okintlamakak, okinpajti akinmej omokokoayaj “iwa san miak opé kinmachtia” itech iTajtsin (Mar. 6:34; Mat. 14:14; 15:32-38).

Jesús okinmajsikamatiaya oksekimej uan okintlakaitaya. Noijki kuali okinseliaya akinmej okitemoayaj maski ualeua okichijtoka okseki tlamantli (Luc. 9:10, 11). Se tonal, se siuatl tlen yokipiaya doce xiuitl oeskisaya okikitskili itlaken Jesús porque okijto ijkon pajtiskia. Nin siuatl amo uelis ijkon kichiuaskia porque tlanauatil okijtoaya sokiojkej akinmej oeskisayaj (Lev. 15:25-28). Pero Jesús amo okajuak. Okiknomatki siuatl uan okilui: “Nokone, motlaneltokalis omitspajti. Xiajti ika pakílistli, porke axa yotipajtik de motlaijyowilis” (Mar. 5:25-34). ¡Jesús sapanoa okiknomatki!

AKIN KUALI TLAKATL MOTA IKA TLEN KICHIUA

Yotikitakej akin kuali tlakatl mota ika tlen kichiua. Jesús okiteititi tleka miak ipati ijkon ma tikchiuakan ijkuak okijto tlen okichi samaritano. Yiuejkika samaritanos uan judíos amo omouikayaj. Nin samaritano okiknomatki se judío tlen okiuitekej, okitlachtekijkej uan noijki yikimiktiskiaj. Okipajtili kanin okikojkojkej, okiuikak kanin otekalotiayaj uan otetlaxtlaui ma kimaluikan. Noijki samaritano okijto kitlaxtlauaskia tla ok itlaj monekiskia (Luc. 10:29-37).

Akin kuali tlakatl amo san kiteititia ika tlen kichiua, noijki ijkuak kijtoa itlaj tlen teyolchikaua uan teyolseuia. Ik non, Biblia kijtoa: “Tlen kitekipachoa se tlakatl non tlen kiyolkokoa pero moyolchikaua ijkuak kiluiaj se kuali tlajtoli” (Prov. 12:25). Akin kuali tlakatl uan teiknomati, tlen kijtoa kichiua ma kinyolpakti oksekimej uan kiteititia intech motekipachoa.a Nin kinpaleuis oksekimej ma yetokan yolchikauakej uan ma tlaxikokan ijkuak kixnamikiskej ouijkayotl (Prov. 16:24).

MA TIKINPALEUIKAN OKSEKIMEJ

ToTajtsin Dios otechchijchi ken ye, ik non, tinochtin uelis tikchiuaskej ken ye (Gén. 1:27). Ma tikitakan tlen okichijkej itekipanojkauan toTajtsin Dios. Ijkuak Pablo okiuikakej Jerusalén, okimaluijtoka se tlakatl tlen omotokayotiaya Julio, ye okinyekanaya soldados. Nin tlakatl okikauili Pablo ompa Sidón “makintlajpaloti non iwa omowikaya para makipalewikah” (Hech. 27:3). Satepan, akinmej ochantiayaj ompa Malta okiknomatkej Pablo uan akinmej oyayaj itech barco tlen oapolaki. Otlatlatijkej para uelis mototoniskiaj uan okseki tlamantli okinmakakej (Hech. 28:1, 2). Kuali tlen okichijkej. Pero akin kuali tlakatl amo san ualeua tlapaleuia.

Moneki nochipa ma tikinpaleuikan oksekimej tla tiknekij tikyolpaktiskej Jehová (Col. 3:12). Ualeua oui tikinpaleuiskej oksekimej. ¿Tleka? Xamo amo kinekij ma tikintlapouikan itech toTajtsin Dios noso amo techpaktia okachi titlajtoskej noso san totech timotekipachoaj. Pero uelis tikpatlaskej toyelis tla tikkauiliskej Jehová ma techpaleui ika iespíritu santo uan ma tikchiuakan ken ye (1 Cor. 2:12).

¿Tlen tikchiuaskej uan ijkon tikinpaleuiskej oksekimej? Moneki timotlajtlaniskej: “¿Nikinmajsikamati oksekimej? ¿Kox tlajyouijtokej? ¿Ok nikilnamiki keman onikinpaleui akinmej amo nikinmixmati?”. Uelis okachi tikinmixmatiskej tokniuan tlen inmiuan timonechikoaj. Ijkon tikmatiskej kox kixnamikij ouijkayotl. Noijki ma tikinpaleuikan ken tiknekij ma techpaleuikan (Mat. 7:12). Ma tikiluikan Jehová ma techpaleui uan ye techteochiuas tla timochijchikauaj (Luc. 11:13).

OKSEKIMEJ KINPAKTIS TOYELIS

Tlatitlanil Pablo melauak okinpaleui oksekimej (2 Cor. 6:3-6). Ik non, Biblia kijtoa omotekipachoaya itech oksekimej uan kuali omomachiliayaj akinmej iuan okatkaj (Hech. 28:30, 31). Tla ijkon tikchiuaskej, xamo oksekimej kinpaktis toyelis. Noijki tla tikinmiknomatij oksekimej maski techtlajyouiltiskej, xamo satepan kinekiskej techkakiskej (Rom. 12:20). Xamo satepan kinekiskej momachtiskej tlen kijtoa Biblia.

Ijkuak tiyetoskej itech xochitlali, sapanoa miakej kinyolitiskej uan kuali momachiliskej porque tikinmiknomatiskej. Noijki yejuan kinmiknomatiskej oksekimej. Jehová kichiuas nochipa ma yoltokan akinmej tetlasojtlaj uan teiknomatij. Ayakmo yetoskej akinmej amo kuali inyelis (Sal. 37:9-11). Ik non, itech xochitlali yetos yolseuilistli porque ualtlanauatijtos iTekiuajkayo toTajtsin Dios. Pero ¿ken techpaleuis axkan ma tikinpaleuikan oksekimej?

¿KEN TECHPALEUIS AXKAN MA TIKINPALEUIKAN OKSEKIMEJ?

Biblia kijtoa akinmej teiknomatij uan tetlakaitaj sapanoa kinpaleuia (Prov. 11:17). Oksekimej kinpaktia inyelis uan kinekij kichiuaskej ken yejuan. Jesús okijto: “Dios nomechkopilis ijkó kemi nomejwah ononkitemakakeh” (Luc. 6:38). Akinmej ijkon kipiaj inyelis miakej inmiuan mouikaj.

Pablo okinmilui akinmej ochantiayaj Éfeso: “Moneki xiyetokah nonkualtentlakah iwa xiteiknomatikah. Ximosepantlapojpolwikah” (Efes. 4:32). Ijkuak timonechikoaj sapanoa techpaleuia tla tinochtin timoajsikamatij uan timopaleuiaj. Amo tikinpinauiaj oksekimej, amo tikinyolkokoaj nion amo tikinteneuaj. Noijki amo san tikijtojtinemij tlen amo melauak opanok. Timochijchikauaj tikinyolchikauaskej tokniuan (Prov. 12:18). Non kinpaleuia tokniuan ma kipiakan chikauak intlaneltokilis.

Ik non, akin kuali tlakatl mota ika tlen kichiua uan ika tlen kijtoa. Ijkuak tikinpaleuiaj oksekimej, tikteititiaj Jehová tetlasojtla uan kipaktia kitemakas tlen kipia (Efes. 5:1, TNM). Noijki tikinpaleuiaj tokniuan ma kipiakan chikauak intlaneltokilis uan noijki oksekimej ma kinekikan momachtiskej Biblia. Ik non, ma timochijchikauakan ma tikpiakan ijkon toyelis.