¿Tikilnamiki?

¿Yotikintlajtolti saiktlami revistas Akin Tetlapouijtok? Xikita kox uelis tikinnankilis ninmej tlajtlanilmej:

¿Ken tikmatij toTajtsin Dios kajsikamati tlen techpanoa?

ToTajtsin Dios okimatiaya israelitas otlajyouijtokaj ijkuak okatkaj Egipto uan ye noijki omoyolkokoaya (Éx. 3:7; Is. 63:9). Tejuan noijki techyolkokoa tlen oksekimej kinpanoa porque toTajtsin Dios otechchijchi ken ye. Jehová kajsikamati tlen techpanoa maski ualeua tikijtoaj amo technamiki ma techtlasojtla (wp18.3, Página 8 uan 9).

¿Ken okinpaleui Jesús oksekimej amo ma techikoitakan?

Ijkuak Jesús okatka nikan tlaltikpak miakej judíos otechikoitayaj. Cristo okinmilui miak ipati ma yetokan yolyamankej uan okinmilui amo kuali ma techikoitakan. Okinmilui imachtijkauan okatkaj nochtin iknimej (w18.06, página 9 uan 10).

¿Tlen techmachtia tlen okipanok Moisés?

Moisés kuali omouikaya iuan Jehová (Deut. 34:10). Israelitas yokipiayaj cuarenta xiuitl okatkaj kanin tlauaki uan ome uelta okixnamikej Moisés porque amo okipiayaj atl. ToTajtsin Dios okilui Moisés ma kitlapoui tepexitl. Pero Moisés amo ijkon okichi uan okiuitek. Jehová xamo iuan okualanki porque amo okichi tlen okinauati noso xamo okualanki porque amo okijto Jehová okichi non milagro (Núm. 20:6-12). Nin techmachtia miak ipati ma tiktlakamatikan Jehová uan san ye ma tikueyichiuakan (w18.07, página 13 uan 14).

¿Tlen panos tla tikinteneuaj oksekimej san ika tlen tikitaj?

Onka eyi tlamantli tlen kichiua amo kuali ma timokuayejyekokan porque oksekimej okse tlamantli tlachixtokej, kox kipiaj tomin uan keski xiuitl kipiaj. Miak ipati amo ma titechikoitakan (Hech. 10:34, 35) (w18.08, páginas 8 a 12).

¿Ken uelis tlapaleuiskej tokniuan tlen yikipiaj miak xiuitl?

ToTajtsin Dios ok kinpatioita tokniuan maski kinmiluiaj ayakmo kichiuaskej seki tekitl itech tlanechikol. Okachi uelis motlapouiskej iuan innamik tokniuan tlen amo iTlaixpantijkauan Jehová. Noijki uelis kinpaleuiskej tokniuan tlen ayakmo okachi tetlapouiaj, uelis okachi tlamachtiskej noso uelis okachi tetlapouiskej (w18.09, páginas 8 a 11).

¿Tlen ika titlamachtiaj?

Titlamachtiaj ika tarjetas uan amamej tlen ika titeyoleuaj, tikinpiaj chikueyi amatsitsintin uan revistas Akin Tetlapouijtok uan ¡Despertad! Noijki titlamachtiaj ika amatlajkuilolmej, tikinpiaj ome amochmej uan naui videos. Se itoka ¿Tleka moneki timomachtis Biblia? (w18.10, página 16).

¿Tlen moneki tikchiuaskej tla tiknekij tiktemoskej tlen tlamachtia Biblia ijkon ken kijtoa Proverbios 23:23?

Amitlaj tiktlaxtlauaskej tla tiktemoskej tlen tlamachtia Biblia. Pero moneki timajxiliskej tla tiknekij tikmatiskej tlen tlamachtia Biblia (w18.11, página 4).

¿Tleka Oseas oksepa okinotsato isiua uan tlen techmachtia nin tlamantli?

Miak uelta Gómer oauilnenki. Pero Oseas okitlapojpolui uan oksepa iuan ochantik. Nin tlamantli techmachtia tla se tlakatl kikajkayaua isiua, moneki ye siuatl kipejpenas kox ok iuan yetos inamik. Noijki ayakmo uelis mokajkauaskej inmixpan tekiuajkej tla iuan motekas (w18.12, página 13).