¿Se tonal ayakmo tiixpoliuiskej?

ADÁN uan Eva otlajtlakolchijkej uan otechpanoltilijkej tlajtlakoli uan mikilistli pero toTajtsin Dios ok kineki nochipa ma tiyoltokan. ITlajtol miak uelta kijtoa ijkon kineki kichiuas uan amo keman kipatlas.

• “Yolmelauakej yetoskej tlaltikpak uan nochipa itech chantiskej” (Salmo 37:29).

• “Ye sepa kitlajtlamis mikilistli uan toTeko Jehová akin Ueyititok melauak nochtin kinmixayouajuatsas” (Isaías 25:8).

• “Iwa ikokolikni non sa iksemi kipojpolos ye n mikílistli” (1 Corintios 15:26).

• “Ye kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli” (Apocalipsis 21:4).

¿Tlen kichiuas toTajtsin Dios para “sepa kitlajtlamis mikilistli”? Ijkon ken yotikitakej, Biblia kijtoa: “Yolmelauakej yetoskej tlaltikpak uan nochipa itech chantiskej”. Pero noijki kijtoa: “Itech tlaltikpak amo onka se tlakatl yolmelauak tlen nochipa kichiua tlen kuali uan amo tlajtlakolchiua” (Eclesiastés 7:20). ¿Kijtosneki toTajtsin Dios ayakmo kichiuas ijkon ken kijtoaj itlanauatiluan? Amo. Ye amo keman ijkon kichiuas porque ye “amo tlakajkayawa” (Tito 1:2). Tla ijkon, ¿ken kichiuas tlen kineki?

IKAJ OMOTEMAKAK UAN IJKON OTECHMAKIXTI

Jehová sapanoa techtlasojtla, ik non, itlaj okitemakak uan ijkon otechmakixti itech mikilistli. Biblia kijtoa yetoskia ken otechtlaxtla ijkon ken ijkuak ikaj kitlaxtlaua porque itlaj amo kuali okichi noso ijkon tlanauatiaj tekiuajkej. Omonekiaya motemakas se tlaxtlauili ipatka akin otlaijtlako. Tinochtin titlajtlakolejkej uan tinochtin tiixpoliuij. Ik non, Biblia kijtoa: “Amo uelis kimakixtiskej se inmikni, nion kimakaskej se tlaxtlauili toTajtsin Dios para kipaleuiskej inmikni (tlaxtlauili para uelis kimakixtiskej inyolilis sapanoa miak ipati uan amo keman uelis kitemakaskej)” (Salmo 49:7, 8).

Ijkuak ikaj ixpoliui san kitlaxtlaua itlajtlakol. Amo uelis momakixtis noso kitlaxtlauas ikaj itlajtlakol (Romanos 6:7). Omonekiaya motemakas ikaj tlen amo kipia tlajtlakoli uan kitlaxtlauaskia totlajtlakol (Hebreos 10:1-4).

Non tlen okichi toTajtsin Dios. Okiualtitlanki iKone ma nesiki nikan tlaltikpak uan ye amo kipia tlajtlakoli (1 Pedro 2:22). Jesús okijto ouala ‘omotemakako makimiktikah para ika noni kintlaxtlawas intemakixtilis miakeh’ (Marcos 10:45). Okitlaxtla totlajtlakol uan ijkon ayakmo tiixpoliuiskej. Noijki uelis tikpiaskej yolilistli tlen amo keman tlamis (Juan 3:16).

¿SE TONAL AYAKMO TIIXPOLIUISKEJ?

Axkan sapanoa titlajyouiaj ijkon ken kijtoa Biblia tikatej “iksemi tonatijmeh” (2 Timoteo 3:1). Nin kijtosneki tlamiskej “neká tonati ijkuak Ye kintlajtlakoltis nochteh, iwa kimpojpolos akimeh kichiwah tlan amokuali” (2 Pedro 3:3, 7). Pero akinmej kitlasojtlaj toTajtsin Dios amo ixpoliuiskej uan “yolitoskeh semijkak” (Mateo 25:46).

Noijki toTajtsin Dios miakej kinyolitis uan nochipa yoltoskej. Jesús kinyolitis akinmej yoixpolikej. Ijkon okiteititi ijkuak oyajki altepetl Naín. Ijkuakon oixpoliuik ikone se siuatl tlen ayakmo okipiaya inamik uan Jesús okiknomatki uan okiyoliti ikone (Lucas 7:11-15). Tlatitlanil Pablo noijki okijto: “Ne nikchia inawak Dios [...] nochteh non yomikkeh moyolitiskeh, akimeh otlájtlakolchijkeh iwa akimeh amó”. Nin techititia toTajtsin Dios sapanoa techtlasojtla (Hechos 24:15).

Sapanoa miakej uelis nochipa yoltoskej. Biblia kijtoa: “Yolmelauakej yetoskej tlaltikpak uan nochipa itech chantiskej” (Salmo 37:29). Ijkuakon nochtin kijtoskej ika miak pakilistli ken tlatitlanil Pablo: “¡Mialma mikílistli! ¿Kan omoka momintsi non ika otechkojkoaya?”. Nin yikipia kanaj dos mil xiuitl okijkuilo Pablo (1 Corintios 15:55). Ijkuakon ayakmo tiixpoliuiskej.