¿Kuali kajki ‘totlaneltokalis kemi se tépostli’?

1, 2. (1) Ijkon ken kijtoa Efesios 6:16, ¿tleka moneki tikpiaskej ‘totlaneltokalis kemi se tépostli’? (2) ¿Tlen tlajtlanilmej tikinnankiliskej?

¿TIKPIAJ ‘totlaneltokalis kemi se tépostli’? (Xiktlajtolti Efesios 6:16). Xamo ijkon tikpiaj. Se soldado mopaleuia ika se tepostli. Tejuan noijki totlaneltokilis techpaleuia amo ma tikchiuakan tlen kiyekana Satanás, amo ma tiauilnemikan, amo ma timoteuikan uan amo ma tikchiuakan okseki tlamantli tlen kixnamiki iTlajtol toTajtsin Dios.

² Pero axkan tikatej itlamian “iksemi tonatijmeh” uan miak tlamantli uelis kichiuas ayakmo ma tikpiakan chikauak totlaneltokilis (2 Tim. 3:1). Pero ¿ken tikmatiskej kox tikpiaj ‘totlaneltokalis kemi se tépostli’? ¿Tlen moneki tikchiuaskej tla tiknekij kuali tikkitskijtoskej ‘totlaneltokalis kemi se tépostli’? Ma tikitakan tlen moneki tikchiuaskej.

MA TIKITAKAN KOX KUALI KAJKI ‘TOTLANELTOKALIS KEMI SE TÉPOSTLI’

3. ¿Ken okimaluiayaj soldados intepos uan tleka?

³ Yiuejkika tepostli tlen ika omoteuiayaj okikimiloayaj ika kuetlaxtli. Soldados okitlaliliayaj chiauak uan ijkon amo otlajtlamiaya uan amo oxaualoaya. Tla se soldado okitaya itepos ayakmo kuali okatka, okiyektlaliaya uan ijkon uelis yaskia moteuiti. Pero ¿tleka tikijtoaj totlaneltokilis noijki yetoskia ken non tepostli?

4. ¿Tleka moneki ma tikitakan kox kuali tikpiaj ‘totlaneltokalis kemi se tépostli’ uan ken moneki tikchiuaskej?

⁴ Yiuejkika soldados okitayaj kox kuali okatka intepos. Tejuan noijki moneki tikitaskej kox kuali kajki totlaneltokilis. San tejuan uelis tikitaskej kox kuali tikpiaj totlaneltokilis. Tla ijkon tikchiuaskej, titlatlaniskej porque timoteuiaj inmiuan amo kuali ejekamej (Efes. 6:10-12). ¿Ken tikmatiskej kox titlaxikoskej ijkuak tikixnamikiskej ouijkayotl? Achto, ma tikiluikan Jehová ma techpaleui. Satepan, ika iTlajtol ma tikitakan kox timotaj ken ye kineki ma timotakan (Heb. 4:12). Biblia kijtoa: “Xitlaneltoka itech Jehová ika nochi moyolo uan amo xikchiua san tlen timokuayejyekoa” (Prov. 3:5, 6). Ma tikilnamiktokan nin uan ma tikitakan seki tlamantli tlen yotikpejpenkej tikchiuaskej. Ma timotlajtlanikan: Tla ayakmo otikpiayaj tomin, ¿otikilnamikej tlen kijtoa Hebreos 13:5? Nin texto kijtoa: “Ayik nimitskajtewas moselti, nion nimitsilkawas”. ¿Otikneltokakej Jehová techpaleuiskia? Tla otikneltokakej, tikteititiaj tikpiaj kuali totlaneltokilis.

5. ¿Tlen uelis panos ijkuak tikitaskej kox kuali kajki totlaneltokilis?

⁵ Timotlajtlachialtiskej ijkuak tikitaskej kox kuali kajki totlaneltokilis. Xamo tikitaskej seki tlamantli tlen amo kuali kajki uan amo otikmatiayaj. Ma tikitakan tleka ijkon tikijtoaj. Xamo ayakmo okachi titlaneltokaj porque sapanoa timotekipachoaj, oksekimej tlakajkayauaj noso timosotlauaj. Pero ¿tlen techpaleuis amo ma techijtlako non tlamantli?

AMO MA TIMOTEKIPACHOKAN, AMO MA TIKINNELTOKILIKAN TLEN TLAKAJKAYAUAJ NION MA TIMOSOTLAUAKAN

6. ¿Tlen uelis techtekipachos?

⁶ Amo tlajtlakoli tla techtekipachoa ken tikyolpaktiskej Jehová uan Jesús (1 Cor. 7:32). Tla otitlajtlakolchijkej xamo techtekipachoa ken uelis oksepa timouikaskej iuan Jehová (Sal. 38:18). Noijki xamo akinmej yomonamiktijkej kinekij kiyolpaktiskej innamik. Tinochtin techtekipachoaj akinmej inmiuan tichantij porque tiknekij kuali ma yetokan uan noijki techtekipachoaj tokniuan (1 Cor. 7:33; 2 Cor. 11:28).

7. (1) ¿Tlen techpanos tla sapanoa timotekipachoaj? (2) Ijkon ken kijtoa Proverbios 29:25, ¿tleka amo ma techmomojtikan oksekimej?

⁷ Pero tla sapanoa timotekipachoaj ayakmo titlaneltokaskej. Ualeua sapanoa techtekipachoa tikmokouiskej totlaken uan tlen tikkuaskej (Mat. 6:31, 32). Non uelis kichiuas ma tiknekikan tikpiaskej miak tlamantli uan noijki tiknekiskej tiktlaniskej okachi tomin. Satepan ayakmo titlaneltokaskej uan ayakmo timouikaskej iuan Jehová (Mar. 4:19; 1 Tim. 6:10). Xamo noijki techtekipachoa oksekimej ma techselikan. Non kichiuas okachi ma timomojtikan ijkuak techpinauiskej noso ijkuak techtlajyouiltiskej uan ayakmo techtekipachos tikyolpaktiskej toTajtsin Dios. ¿Tlen techpaleuis amo ijkon ma techpano? Ma tiktlatlaujtikan Jehová ma techpaleui okachi ma titlaneltokakan uan ma tiyetokan tiyolchikauakej (xiktlajtolti Proverbios 29:25; Luc. 17:5).

8. ¿Tlen tikchiuaskej tla akinmej kixnamikij ialtepe Jehová techiluiaj ye tlakajkayaua uan noijki tokniuan?

⁸ Satanás “ye n teta de nochteh non tlakajkayawah”. Ik non, akinmej kinnauatia kijtoaj Jehová uan tokniuan tlakajkayauaj (Juan 8:44). Ma tikitakan ken kichiuaj. Akinmej okikajkej Jehová uan kixnamikij ialtepe, kipatiliaj noso kajxitiliaj tlen techmaka ialtepe. Nin kitlaliaj itech Internet, kipanoltiaj itech televisión uan itech okseki tlamantli. Nochi non Satanás ika techmojmotla uan yetoskia ken “ika kuawitl non xotlatok” (Efes. 6:16). ¿Tlen tikchiuaskej tla akinmej kixnamikij ialtepe Jehová san tlen amo techiluiaj? Amo ma tikinkakikan. ¿Tleka? Porque tikneltokaj tlen Jehová kijtoa uan noijki tikneltokaj tlen kijtoaj tokniuan. Amo keman tikinkakij akinmej kixnamikij ialtepe Jehová. Amo keman inmiuan timotlapouiaj nion inmiuan timokualaniaj uan amo tikintemoaj inmiuan timotlapouiskej.

9. ¿Tlen techpanos tla timosotlauaj?

⁹ Tla timosotlauaj, ayakmo tikpiaskej chikauak totlaneltokilis. Ualeua timoyolkokoaj ijkuak tikixnamikij ouijkayotl. Non amo kijtosneki amo techtekipachos seki tlamantli. Pero amo nochipa ma timokuayejyekojtokan tlen techpanoa tlamo tikilkauaskej tlen Jehová yotechilui kichiuas (Apoc. 21:3, 4). Tla timosotlauaskej xamo ayakmo tiktekichiuiliskej toTajtsin Dios (Prov. 24:10). Pero amo moneki ijkon techpanos.

10. ¿Tlen techititia tlen okijkuilo se tokni?

¹⁰ Ma tikitakan tlen kichiua se tokni tlen chanti Estados Unidos. Ye okijto moneki kipias chikauak itlaneltokilis porque kimaluia inamik akin sapanoa mokokoa. Ye okinmijkuilili se carta tokniuan tlen katej ompa central mundial. Okijto: “Ualeua sapanoa timotekipachoaj uan timosotlauaj pero timoyolchikauaj porque tikneltokaj tlen kichiuas toTajtsin Dios. Sapanoa niktlasojkamatilia Jehová porque techmaka miak tlamantli tlen techpaleuia ma tikpiakan chikauak totlaneltokilis uan amo ma timosotlauakan. Nochi non techpaleuia ma tiktekichiuilijtokan Jehová. Techpaleuia ma tikxikokan nochi tlen techpanoa uan nochi tlen techchiuilia Satanás”. Tlen okijto tokni techititia amo ma timosotlauakan. ¿Ken tikchiuaskej? Ma tikilnamiktokan Satanás techyejyekoa, ik non, techpanoa miak tlamantli amo kuali. Pero ma tikneltokakan Jehová techyolseuis uan ma tikpatioitakan nochi tlen techmaka.

11. ¿Tlen moneki timotlajtlaniskej tla tiknekij tikitaskej kox kuali kajki totlaneltokilis?

¹¹ ¿Moneki tikyektlaliskej ‘totlaneltokalis’? Ma tikilnamikikan tlen otikchijkej seki metstli tlen yopanok uan ma timotlajtlanikan: “¿Ayakmo okachi nimotekipachoa? ¿Nimochijchikaua amo nikkakis tlen kijtoaj akinmej kixnamikij ialtepe Jehová uan amo inmiuan nimokualania? ¿Ayakmo nimosotlaua?”. Tla ayakmo ijkon tikchiuaj, tikteititiaj tikpiaj kuali kajki totlaneltokilis. Pero moneki timomaluiskej porque Satanás kitekitiltia okseki tlamantli tlen ika kineki techkajkayauas. Ma tikitakan se tlamantli.

AMO MA TIKTEMOKAN MIAK TLAMANTLI

12. ¿Tlen techpanos tla tiknekij tikpiaskej miak tlamantli?

¹² Tla tiknekij tikpiaskej miak tlamantli, ayakmo tikpiaskej chikauak totlaneltokilis uan ayakmo okachi tiktekichiuiliskej Jehová. Tlatitlanil Pablo okijto: “Nion se soldado weleti mokalakia itech ok se tekitl, porke sa mochixtok kichiwas tlan kinawatis akin kiyakana” (2 Tim. 2:4). Soldados amo okinkauiliayaj ma tlanemakakan. ¿Tlen kinpanoskia tla tlanemakaskiaj?

13. ¿Tleka soldados amo okinkauiliayaj ma tlanemakakan?

¹³ Ma timokuayejyekokan nochtin soldados se kualkan momachtiaj ken kitekitiltiskej inmiespada. Pero se soldado amo momachtia porque otlatlapoto kanin tlakualnemaka. Noijki non tiotlak soldados kitaj kox kuali kajki intepos uan kintentiaj inmiespadas. Pero soldado tlen tlakualnemaka ok tlakualchiua para tlanemakas mostlatika. Pero mostlatika san ichtaka kinteuiaj. ¿Akin okachi kimatis tlen kichiuas uan kiyolpaktis akin kinyekana? ¿Tikpejpenaskiaj ma techpaleui akin omomachti ken tlateuis noso akin tlakualnemaka?

14. ¿Tlen okachi tikpatioitaj?

¹⁴ Ijkon ken se soldado, tejuan amo tikchiuaj okseki tlamantli porque tiknekij tikyolpaktiskej Jehová uan Jesús akinmej techyekanaj. Tejuan okachi tikpatioitaj tlen yejuan kinekij ma tikchiuakan uan amo tikchiuaj tlen Satanás kiyekana. Timochijchikauaj kuali tiktekichiuiliskej Jehová, tikitaj kox kuali kajki ‘totlaneltokalis kemi se tépostli’ uan noijki tikitaj kox kuali kajki okseki tlamantli tlen techmaka toTajtsin Dios.

15. ¿Tlen okijto Pablo uan tleka?

¹⁵ Nochipa ma timomaluikan. ¿Tleka? Pablo okijto “akimeh kinekih motomintiskeh” satepan “kikawah Dios” noso moxeloaj (1 Tim. 6:9, 10). Ijkuak moijtoa “kikawah” noso moxeloaj, kijtosneki ijkon techpanos tla tiknekij tikpiaskej miak tlamantli maski amo techpoloa. ‘Tiwetsiskeh imak n tlajtlákoli’ tla ijkon tikchiuaskej. Ik non, ma tikmaluikan toyolo amo ma tiknekikan tikpiaskej miak tlamantli. Ma tikilnamiktokan non uelis kijtlakos totlaneltokilis.

16. ¿Tlen moneki timotlajtlaniskej ijkuak tiktlajtoltiaj Marcos 10:17-22?

¹⁶ Ma tikijtokan tikpiaj tomin tlen ika tikmokouiskej miak tlamantli. ¿Kijtosneki tlajtlakoli tla tikmokouiskej tlen tiknekij maski amo techpoloa? Amo uelis tikijtoskej tlajtlakoli. Pero moneki ma timotlajtlanikan: ¿Kox timajxiliskej tiktekitiltiskej uan tikmaluiskej tlen tiknekij tikmokouiskej? ¿Okachi tikpatioitaskej tlen tikmokouiskej? Xamo tikchiuaskej ken telpochtli tlen Jesús okilui ma kitekichiuili toTajtsin Dios (xiktlajtolti Marcos 10:17-22). Ma tiyolpakikan san ika tlen tikpiaj uan ma timochijchikauakan okachi ma tiktekichiuilikan Jehová.

KUALI MA TIKKITSKIJTOKAN ‘TOTLANELTOKALIS KEMI SE TÉPOSTLI’

17. ¿Tlen amo keman ma tikilkauakan?

¹⁷ Amo keman ma tikilkauakan tejuan noijki timoteuiaj uan nochipa moneki timomaluiskej tla tiknekij titlatlaniskej (Apoc. 12:17). Tokniuan amo uelis techkitskilijtoskej ‘totlaneltokalis kemi se tépostli’. Tejuan moneki tikkitskijtoskej.

18. ¿Tleka yiuejkika soldados kuali okikitskijtokaj intepos?

¹⁸ Yiuejkika okitayaj miak ipati ijkuak se soldado otlatlaniaya ijkuak omoteuiaya. Pero okatka tepinati tla ijkuak omokopaya ayakmo okiuikaya itepos. Se tlakatl itoka Tácito uan ochantiaya Roma, okijkuilo: “Sapanoa tepinati tla okikauayaj intepos kanin omoteuiayaj”. Ik non, soldados kuali okikitskijtokaj intepos.

19. ¿Tlen moneki tikchiuaskej tla tiknekij kuali tikkitskijtoskej ‘totlaneltokalis kemi se tépostli’?

¹⁹ Tla tiknekij kuali tikkitskijtoskej ‘totlaneltokalis kemi se tépostli’, moneki nochipa ma timonechikokan uan ma tiktematiltikan itoka Jehová uan iTekiuajkayo (Heb. 10:23-25). Noijki mojmostla ma tiktlajtoltikan Biblia uan ma tikiluikan Jehová ma techpaleui nochipa ma tikchiuakan tlen timomachtiaj (2 Tim. 3:16, 17). Non techpaleuis amitlaj ma techchiuili Satanás (Is. 54:17). Techpaleuis ‘totlaneltokalis kemi se tépostli’. Ijkon tiktekichiuiliskej Jehová uan tikinpaleuiskej tokniuan. Tla tikpiaj chikauak totlaneltokilis, tiktlaniliskej Satanás uan tikpaleuiskej Jesús noijki ma kitlanili uan akinmej kinyekana (Apoc. 17:14; 20:10).