¿Tlen kichiuas iTekiuajkayo toTajtsin Dios?
Jesús okinmilui imachtijkauan ma kitlajtlanikan iTekiuajkayo toTajtsin Dios. Porque okimatiaya Jehová amo okinekiaya ma titlajyouikan. Noijki okimatiaya san non Tekiuajkayotl uelis tlayektlalis. Pero ¿ken tlapaleuis nin Tekiuajkayotl?
¿TLEN YOKICHI ITEKIUAJKAYO TOTAJTSIN DIOS?
Yotikitakej tlen okijto Jesús panoskia. Non kiteititia iTekiuajkayo toTajtsin Dios yikajki iluikak uan tlanauatia Jesucristo.
Biblia kijtoua ijkuak opejki tlanauatia Jesús, okiualkixti Satanás uan amo kuali ejekamej ompa iluikak. Yejuan axkan katej nikan tlaltikpak, ik non, 1914 opejki okachi titlajyouiaj (Apocalipsis 12:7, 9).
Axkan okachi titlajyouiaj pero Jesús ueyi tekiua techpaleuia. ITlaixpantijkauan Jehová tetlapouiaj ipan nochi tlaltikpak. Ijkon miakej momachtiaj Biblia uan kichiuaj tlen ompa kijtoua (Isaías 2:2-4). Non kinpaleuia okachi kuali ma tekipanokan, kuali ma mouikakan iuan infamilia uan amo ma kixnekikan tomin. Biblia kinpaleuia ma yolpakikan. Noijki ma kichiuakan tlen moneki uan ijkon uelis kinnauatis iTekiuajkayo toTajtsin Dios.
¿TLEN SAN NIMAN KICHIUAS ITEKIUAJKAYO TOTAJTSIN DIOS?
Tekiuajkej ok tlanauatiaj nikan tlaltikpak maski Jesús yitlanauatijtok iluikak. Pero toTajtsin Dios okilui Jesús: “Xitlanauati intlajkotia akinmej mitskokoliaj” (Salmo 110:2). San niman kinmixpolos akinmej kikokoliaj uan ayakmo tlajyouiskej akinmej kitlakamatij toTajtsin Dios.
Ijkuakon iTekiuajkayo toTajtsin Dios kichiuas nin tlamantli:
Kinpojpolos religiones tlen san tlakajkayauaj. Biblia kinneskayotia nochi religiones tlen san tlakajkayauaj ken se “mekatanajsiwatl”. Axkan san tlakajkayauaj ijkuak tlamachtiaj akin toTajtsin Dios uan kintlajyouiltiaj oksekimej pero satepan ayakmo yetoskej. Miakej kintlajtlachialtis ken kinpojpoloskej (Apocalipsis 17:15, 16).
Kinmixpolos tekiuajkej. Nion se tekiua momakixtis (Apocalipsis 19:15, 17, 18).
Kinmixpolos akinmej amo yolkualmej. ¿Tlen kinpanos akinmej tlajtlakolchiuaj uan amo kitlakamatij toTajtsin Dios? “Akinmej amo yolkualmej kinmixpoloskej itech tlaltikpak” (Proverbios 2:22).
Kipojpolos Satanás uan amo kuali ejekamej. Satanás uan amo kuali ejekamej ayakmo tlakajkayauaskej (Apocalipsis 20:3, 10).
¿Tlen kinpanos akinmej kipaleuiaj iTekiuajkayo toTajtsin Dios?
¿KEN TECHPALEUIS ITEKIUAJKAYO TOTAJTSIN DIOS?
San ueyi tekiua Jesucristo techpaleuis ijkuak tlanauatis ipan tlaltikpak. Kipaleuiskej 144,000 tlen okinpejpenkej nikan tlaltikpak (Apocalipsis 5:9, 10; 14:1, 3). Ye kitas ma mochiua tlen kineki toTajtsin Dios ipan tlaltikpak. ¿Ken techpaleuis iTekiuajkayo toTajtsin Dios?
Ayakmo ikaj mokokos nion ikaj ixpoliuis. “Amikaj kijtos: ‘Nimokokoua’” uan “ayakmó yetos mikílistli” (Isaías 33:24; Apocalipsis 21:4).
Nochtin kuali yetoskej ika yolseuilistli. “Mokoneuan kipiaskej miak yolseuilistli”. Noijki “motlaliskej itlampa uvas uan itlampa higos uan amikaj kinmomojtis” (Isaías 54:13; Miqueas 4:4).
Nochtin kinpaktis inteki. “Tekitl tlen kichiuaskej notekipanojkauan sapanoua kinyolpaktis. Amo san nenka tekitiskej” (Isaías 65:22, 23).
Ayakmo itlaj kipanos tlaltikpak. “Kualtsin yetos kanin tlauaki uan kualtsin tlaxochitis kanin tlakuauak tlali” (Isaías 35:1).
Kinmachtiskej oksekimej tlen moneki kichiuaskej tla kinekiskej nochipa yoltoskej. “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3).
ToTajtsin Dios kineki xikseli nochi nin tlateochiuali (Isaías 48:18). Itech okse tlamachtil tikitaskej tlen tikchiuaskej tla tiknekij tikseliskej nochi nin tlateochiuali.