Axkan ma tiktemokan iTekiuajkayo toTajtsin Dios
Ximokuayejyeko moaltepe ejekakiauis uan tekiuajkej kijtouaj: “¡XIAKAN KANIN UELIS NANMOPALEUISKEJ!”. ¿Tlen tikchiuas? ¿Tiktemoti kanin timopaleuis?
Moneki tikmatiskej yiuits itlaj ken se ejekakiauitl. Jesús okijto panos se tlajyouilistli “satlawel temojti” (Mateo 24:21). Amo uelis oksekan tiaskej pero uelis tiktemoskej kanin timopaleuiskej. ¿Tlen moneki tikchiuaskej?
Ijkuak Jesús otlamachti ipan tepetl, okijto: “Moneki achto xikchiwakah tlan Dios nomechnawatia iwa xikchiwakah tlan Ye kimonekiltia” (Mateo 6:33). ¿Tlen okinekiaya kijtos Jesús?
“Achto xikchiwakah tlan Dios nomechnawatia”. Nin kijtosneki okachi tikpatioitaskej iTekiuajkayo toTajtsin Dios (Mateo 6:25, 32, 33). ¿Tleka moneki ijkon tikchiuaskej? Porque tejuan amo uelis tikpojpoloskej tlen techtlajyouiltia. San iTekiuajkayo toTajtsin Dios kiyektlalis ouijkayotl tlen tikixnamikij.
“Xikchiwakah tlan Ye kimonekiltia”. Nin kijtosneki tikintlakamatiskej itlanauatiluan toTajtsin Dios uan principios tlen katej itech Biblia. ¿Tleka? Titlajyouiskej tla san tikchiuaskej tlen tejuan tiknekij (Proverbios 16:25). Pero tikyolpaktiskej Jehová uan kuali tiyetoskej tla tikintlakamatij itlanauatiluan (Isaías 48:17, 18).
¿Tleka Jesús okijto: “Achto xikchiwakah tlan Dios nomechnawatia iwa xikchiwakah tlan Ye kimonekiltia”? Porque ye okimatiaya sekimej kineltokaskiaj kuali yetoskiaj tla kipiaskiaj miak tomin. Oksekimej kintekipachoskia tlen ika mopanoltiskej uan ayakmo kichiuaskiaj tlen kineki toTajtsin Dios (Mateo 6:19-21, 25-32).
Pero Jesús okijto akinmej kipaleuiskej iTekiuajkayo toTajtsin Dios kipiaskej tlen ika mopanoltiskej uan satepan okachi kinteochiuas (Mateo 6:33).
Imachtijkauan Jesús okichijkej tlen kineki toTajtsin Dios maski amo okitakej ken tlamis tlajyouilistli. Pero okajsikej kanin mopaleuiskej. ¿Ken omopaleuijkej?
Yejuan okitlakamatkej toTajtsin Dios uan non okinpaleui amo ma kipiakan ouijkayotl ken oksekimej. Okineltokayaj iTekiuajkayo ToTajtsin Dios uan otlaxikojkej ijkuak otlajyouijkej. ToTajtsin Dios okinmakak chikaualistli uan ijkon okixnamikej nochi ouijkayotl (2 Corintios 4:7-9).
¿TIKCHIUAS TLEN KINEKI TOTAJTSIN DIOS?
Tokniuan tlen okatkaj achto siglo okitlakamatkej Jesús uan okitematiltijkej iTlajtol toTajtsin Dios kanin ochantiayaj (Colosenses 1:23). ¿Axkan noijki kitematiltiaj iTlajtol toTajtsin Dios?
Kema. ITlaixpantijkauan Jehová kimatokej yitlamis tlen amo kuali, ik non, kichiuaj tlen Jesús otlanauati: “Kuali tlajtolmej itech Tekiuajkayotl motetlapouis itech nochi tlaltikpak para ma kimatikan nochi altepemej, ijkuakon nochi tlamis” (Mateo 24:14, TNM).
¿Tikchiuas tlen Jesús otlanauati? Xikchiua ken akinmej okatkaj achto siglo tlen ochantiayaj Macedonia itech altepetsintli Berea. Yejuan kuali okikakej tlen okintlapoui tlatitlanil Pablo, omomachtijkej iTlajtol toTajtsin Dios uan okitakej kox melauak tlen okinmilui Pablo. Ijkon miakej opejkej tlaneltokaj (Hechos 17:11, 12).
Tejuatsin noijki uelis ijkon tikchiuas. ToTajtsin Dios mitspaleuis tla tikchiuas tlen ye kineki uan satepan nochipa tikpias yolseuilistli.