¿Ken nechita Jehová?
1. ¿Tleka tikijtoaj Biblia ken se teskatl?
1 ¿Nochipa timoita itech teskatl? Nochtin timoitaj mojmostla, pampa tikmatiskej tlen uelis tikyektlaliskej pampa kuali timoitaskej. Uan Biblia uelis tiktekitiltiskej ken se teskatl. Tla tiktlajtoltiaj uelis tikitaskej ken toyelis, tlen kita Jehová (1 Sam. 16:7; Sant. 1:22-24). ITlajtol toTajtsin Dios “techajsikamatiltia tlan kuali iwa tlan amo kuali” (Heb. 4:12). Tla mojmostla tiktlajtoltiaj uan timokuayejyekoaj itech Biblia uelis okachi kuali titetlapouiskej. ¿Tleka? (Sal. 1:1-3.)
2. ¿Ken techpaleuia Biblia pampa tikitaskej ken toyelis?
2 Xiktekitilti Biblia ken se teskatl. Itech Biblia tikajsij inneskayo miakej tlakamej uan siuamej yolmelajkej ixpan Jehová, itech inneskayo tikitaj tlen kipaktia Jehová. Se neskayotl, ueyi tekiua David sapanoa okinekiaya ma moueyichiua itoka Jehová (1 Sam. 17:45, 46). Teotlajtojki Isaías ika miak yolchikaualistli otetlapoui maski uelis tlajyouiskia (Is. 6:8, 9). Kej Jesús sapanoa okitlasojtlaya iTajtsin, non okichiuaya ma kita tetlapouilistli ken itlaj tlen okiyolchikauaya, okiyolpaktiaya uan amo ken itlaj tlen tesotla (Juan 4:34). Tokniuan itech achto siglo ika miak yolchikaualistli otetlapouiayaj, otlaneltokayaj itech Jehová uan amo keman omosotlajkej (Hech. 5:41, 42; 2 Cor. 4:1; 2 Tim. 4:17). Techpaleuia timokuayejyekoskej itech inneskayo, pampa ijkon okachi kuali uelis titetlapouiskej.
3. ¿Tleka moneki totoka ma tikpatlakan tonemilis?
3 Xikyektlali tlen amo kuali tikchiua. Amo itlaj ipati tla timoitaj itech teskatl uan amo tikyektlaliaj tlamantli amo kuali tlen otikitakej. Uelis tiktlajtlaniliskej Jehová ma techpaleui pampa kuali ma timoitakan uan pampa ma tikyektlalikan tlen moneki (Sal. 139:23, 24; Luc. 11:13). Pampa ayakmo onka miak kauitl uan miakej uelis momakixtiskej, moneki totoka ma tikpatlakan tonemilis (1 Cor. 7:29; 1 Tim. 4:16).
4. ¿Tlen panoa ika tlakatl akin moita itech iTlajtol toTajtsin Dios uan kiyektlalia tlen okitak?
4 Okachi ipati toyelis uan amo ken timoitaj, pampa Jehová kita toyelis (1 Ped. 3:3, 4). ¿Tlen panoa ika tlakatl tlen moita itech iTlajtol toTajtsin Dios uan satepan kiyektlalia tlen amo kuali okitak? “Amo kilkawa tlan kikaki, [...] iwa kichiwa tlan kijtoa non tlanawátili, nochipa paktos ika tlan kichiwa” (Sant. 1:25). Nochtin uelis tiyolpakiskej uan okachi kuali titekitiskej pampa “tejwah tikateh kemi se teskatl non tiknextiah iweyilis n Toteko Dios” (2 Cor. 3:18).