Sepa ma tikinyoleuakan

1. ¿Keman peuas tikinyoleuaskej pampa ueyi nechikol?

¹ Melauak timochijchikauaskej uan tiktekitiltiskej tomin pampa tikintlakualchiuiliskej toyolikniuan noso tokalchanejkauan, uan noijki tikinyoleuaskej ika miak pakilistli. Noijki ijkon panoa ika toueyi nechikol, miakej tokniuan yomochijchikajkej pampa techchiuiliskej se tlakuali espiritual. Eyi semanas achto tikpiaskej toueyi nechikol, Jehová techkauilia ma tikinyoleuakan oksekimej tlaltikpaktlakamej pampa noijki ma monechikokan. ¿Tlen techpaleuis pampa tikinyoleuaskej ika yolpakilistli?

2. ¿Tlen techyolchikauas pampa ma tikinyoleuakan?

² Okachi tiknekiskej tikinyoleuaskej pampa ma monechikokan tla timokuayejyekoaj ken techpaleuis nochi tlakuali espiritual tlen Jehová techmakas itech nin ueyi nechikol (Is. 65:13, 14). Noijki moneki tikilnamikiskej sejse xiuitl ijkuak tikinyoleuaj tlaltikpaktlakamej tikinmajsij sekimej akinmej kinekij kiueyichiuaskej Jehová (xikita recuadro “Kuali tlapaleuia”). Sekimej tlaltikpaktlakamej akinmej tikinyoleuaskej monechikoskej touan. Maski san keski monechikoskej, nochi tlen tikchiuaskej kiueyichiuas Jehová uan kiteititis ye kineki kinselis miakej (Sal. 145:3, 7; Apoc. 22:17, TNM).

3. ¿Ken tikintemakaskej amatsitsintin?

³ Tokniuan tlayekankej kijtoskej ken motemakaskej amatsitsintin, uan tla uelis kinkauaskej inkalijtik akinmej amo kinmajsij noso kox kintemakaskej ijkuak tetlapouiaj itech ojtli. Sábados uan domingos tikintemakaskej revistas ijkuak tikitaskej kinekiskej kintlajtoltiskej. Ijkuak tlamis nin tekitl, melauak tiyolpakiskej tikmatiskej otikinyolejkej miakej tlaltikpaktlakamej pampa ma yakan itech nin ueyi nechikol kanin Jehová okiyektlali se ueyi tlakuali espiritual.

Kuali tlapaleuia

Yikipia seki xiuitl, se tokni siuatl ijkuak okinyoleuaya tlaltikpaktlakamej, omotlajtlaniaya kox ipati sapanoa mochijchikaua. Ye omokuayejyekoaya: “¿Touan monechikoskej nochtin akinmej nikinyolejtok?”. Itech ueyi nechikol, itech tonal sábado, ye okitak se tlakatl tlen poui itech tlaneltokalistli sij, uan opejki iuan motlapouia. Non tlakatl oyajki ueyi nechikol pampa okiyolejkej. Ye okinekiaya kimatis miak tlamantli, uan tokni siuatl okinankili nochi tlen ye otlajtlania. Non tlakatl okijto sapanoa kiyolpaktia tlapoualismej uan kitlajtlachialtia pampa nochtin kuali motlakentiaj uan kiteititiaj kuali inyelis. Satepan, noijki itech non tonal tokni siuatl noijki opejki iuan motlapouia se namiktilistli tlen ompa okatka. Yejuan noijki okiselijkej se yoleualistli uan oyajkej itech nin ueyi nechikol ika camión. Pampa sapanoa okinyolpakti, okijtojkej moyektlaliskej pampa yaskej tonal domingo. Non tokni siuatl okajsikamatki sapanoa ipati ma tikinyoleuakan tlaltikpaktlakamej.
Itech okse ueyi nechikol tlen yikin omochi, se tlakatl uan isiua, tlen tekitij ken precursores, opejkej motlapouiaj iuan se namiktilistli tlen kipia miak xiuitl. Nin namiktilistli okijto non achto ueyi nechikol kanin yejuan oyajkej. Nonmej tokniuan okitlajtlanijkej: “¿Akin onamechyole?”. Okijtojkej: “Se tonal ijkuak otimokuepkej tokalijtik otikajsikej se amatsintli tlen okitlalijkej itlampa tokaltlatsakuil”. Yejuan okitlajtoltijkej non amatsintli uan noijki otlajkuilojkej ikuitlapan. Oksekimej tokniuan okinmakakej tlakuali. Sapanoa okinyolpakti non ueyi nechikol, ik non, kuali omoyektlalijkej pampa yaskej okse tonal. Omokajkej ken uelis kintlajpalotiuij pampa okachi momachtiskej.