Tlamantli tlen tikpiaj techpaleuia pampa kuali titlamachtiskej
1. ¿Tleka akinmej kichiuaj ken Cristo yetoskiaj ken akinmej kinchijchiuaj kalmej?
1 Akin kinchijchiua kalmej kipia miak tlamantli pampa ika tekitis. Seki kintekitiltia ijkuak kichiuas itlaj tlen miak ipati uan okseki nochipa kintekitiltia. Akinmej okachi kimatij tekitiskej kipiaj ijtik se caja tlen ika tekitij, ninmej tlen okachi kuali kintekitiltiaj. Biblia techyoleua ma titekitikan uan ma ‘timochijchikawah ma tikchiwakah tlan kuali, ijkó [...] amo kipiaskej tlan ika pinawaskeh’ (2 Tim. 2:15). ¿Tlen tlamantli okachi ipati tikpiaj pampa ika titekitiskej? Itlajtol toTajtsin Dios, uan tiktekitiltiaj pampa tikinpaleuiskej oksekimej ma kichiuakan ken Cristo (Mat. 28:19, 20). Ik non, moneki timochijchikauaskej pampa kuali tiktekitiltiskej. Nochtin akinmej tikchiuaj ken Cristo moneki kuali tiktekitiltiskej okseki tlamantli tlen noijki techpaleuiaj pampa tikinmachtiskej tlaltikpaktlakamej ma kimatikan tlen melauak (Prov. 22:29).
2. ¿Tlen tlamantli tikpiaj pampa titlamachtiskej?
2 Tlamantli tlen tikpiaj techpaleuiaj ma titlamachtikan. Achto tikpiaj Biblia, ¿uan tlen okse tlamantli? Amochtli ¿Tlen melauak tlamachtia Biblia? Tlen okachi tiktekitiltiaj pampa tikinmachtiskej tlaltikpaktlakamej. Ijkuak yotlanki otikmachtijkej ika amochtli ¿Tlen melauak tlamachtia Biblia? satepan tikmachtiaj ika amochtli “Xiyetokan itech itlasojtlalis toTajtsin Dios” pampa kimatis ken moyekanas ika principios bíblicos itech inemilis. Ik non, moneki tikinmixmatiskej uan tikmatiskej ken tikintekitiltiskej ninmej amochmej. Amatlajkuilolmej noijki moneki yetoskej itech tocaja pampa ika titlamachtiskej. Amatlajkuilol Kuali tlajtolmej techmaka toTajtsin Dios techpaleuia pampa tikinpeualtiskej tlamachtilmej. Tla kanin titetlapouiaj tlaltikpaktlakamej amo kimatij kitlajtoltiskej amatlajkuilol nion tlajkuiloskej noso tlajtoaj okse tlajtoli uan amo katej miakej amatlajkuilolmej ika intlajtol, uelis tiktekitiltiskej amatlajkuilol Xikaki toTajtsin Dios noso Xikaki toTajtsin Dios uan tiyoltos nochipa. Okse tlapaleuilistli tlen tikpiaj ¿Akinmej kichiuaj itlanekilis Jehová itech ninmej tonalmej? nin amatlajkuilol kipaleuis akin momachtijtok ma kixmati ialtepe Jehová. Noijki videos techpaleuiaj ma tikinpaleuikan oksekimej ma kichiuakan ken Cristo, moneki kuali tikmatiskej ken kuali tikintekitiltiskej ninmej videos ¿Tleka moneki timomachtis Biblia? uan ¿Ken tikchiuaj tonechikoluan?
3. ¿Tlen timomachtiskej okachi tlayekapan itech Toteki itech Tekiuajkayotl?
3 Okachi tlayekapan itech Toteki itech Tekiuajkayotl, timomachtiskej ken kuali tiktekitiltiskej tlen tikpiaj ijtik tocaja pampa titlamachtiskej. Tla timochijchikauaj kuali tikintekitiltiaj, tikchijtokej tlen okijto Pablo: “Ximotlachili te monewia iwa kuali xikita tlan tiktemachtia, iwa ayik ximosojsotlawa. Tla ijkó tikchiwas, amo san te timomakixtis, yej noiwa momakixtiskeh akimeh mitskakiskeh” (1 Tim. 4:16).