Pampa okachi kuali titetlapouiskej: ma tikinmititikan akinmej tikinmachtiaj nochipa ma momachtikan

Tleka miak ipati. Pampa chikauak ma kipia itlaneltokilis akin tikmachtiaj, amo san moneki kimatis tlamantli tlen amo oui itech iTlajtol toTajtsin Dios (Heb. 5:12–6:1). Pampa timomachtiskej moneki timochijchikauaskej. Nin kijtosneki tikitaskej ken mouika tlen yitikmatij iuan tlen yikin timomachtiaj uan moneki tikitaskej ken techpaleuis (Prov. 2:1-6). Akin tikmachtiaj moneki kimatis ken uelis kintemos intlanankilis tlajtlanilmej tlen kineki kimatis itech amatlajkuilolmej tlen tikinpiaj. Tla ika nochi iyolo mochijchikaua kichiuas tlen momachtijtok, non kipaleuis kixnamikis ouijkayotl tlen kinpanoa akinmej kichiuaj ken Cristo (Luc. 6:47, 48).

Ken uelis tikchiuaskej:

Akin tikmachtiaj ma tikiluikan sapanoa miak ipati ma tiktlatlaujtikan Jehová ijkuak timomachtiskej (Juan 14:26; 1 Cor. 2:10).
Akin yikin peua tikmachtiaj moneki tikiluiskej ma moyektlali pampa iuan timomachtiskej. Xikititi ken uelis kintlapaluis tlajtolmej tlen okachi ipati.
Ma tikiluikan ma techilui tlen kajsikamati. Amo san ma tikchiuilikan tlajtlanilmej pampa ma tlanankili ijkon ken kajki itech amochtli noso san ma kitlajtolti.
Ma tikiluikan mojmostla ma kitlajtolti iTlajtol toTajtsin Dios. Xikititi amatl tlen kajki itech www.jw.org, kanin kitas keski tlaxelolmej kitlajtoltis itech Biblia. Moneki ma mochijchikaua mojmostla kitlajtoltis Biblia uan melauak kipaleuis tla ijkon kichiuas (Sal. 1:2, 3).
Xikititi akin tikmachtia ken kitekitiltis AMATLAJKUILOLMEJ ITECH INTERNET Watchtower noso Tlen ika momachtiaj iTlaixpantijkauan Jehová, tlen kajki itech www.jw.org/ncx, kanin kijtoa “Amatlajkuilolmej” pampa kinankilis se tlajtlanilistli. Xikpaleui ma kinmixmati símbolos tlen kipiaj amatlajkuilolmej tlen tikintekitiltiaj itech nechikolmej.

Xikchiua nin itech nochi metstli:

Ijkuak tiktlamis se tlamachtil noso se tlaxelol, xikilui ma mitsilui tlen tlamantli omomachti. Tla amo ikaj tikmachtia, xikijto ika seki tlajtolmej tlen otimomachti itech Biblia noso itech se párrafo itech revista Akin Tetlapouijtok. Nin mitspaleuis pampa okachi kuali tikajsikamatis tlen otiktlajtolti.