Kuali ma tiktekitiltikan amochtli Tlamachtia Biblia

Ijkuak akinmej tikinmachtiaj kajsikamatij tlen kijtoa Biblia uan itech innemilis peua kichiuaj tlen momachtiaj, san niman mota peua mochikaua intlaneltokilis (Sal. 1:1-3). Tla kuali tiktekitiltiaj tlen kiualika amochtli Tlamachtia Biblia, uelis tikinpaleuiskej ma moskalti intlaneltokilis.

Tlajtlanilmej tlen ika peua. Sejse tlamachtil kanin peua kipia tlajtlanilmej tlen monankiliskej itech non tlamachtil. Uelis tikinchiuiliskej nonmej tlajtlanilmej, pero amo pampa ma tlanankili, okachi kuali, pampa kinekis kimatis okachi itech non tlamachtil. Okse tlamantli tlen uelis tikchiuaskej, tikiluiskej ma tlanankili san ika seki tlajtolmej. Uelis techiluis itlaj tlen amo melauak, pero amo moneki san niman tikiluiskej amo kuali, pampa tlen tlanankilis techpaleuis ma tikmatikan tlen tikyekiluiskej ijkuak iuan timomachtijtoskej (Prov. 16:23; 18:13).

Okseki tlamachtilmej. Tla akin tikmachtiaj kuali okajsikamatki tlen omomachti, uelis tikiluiskej san iselti ma kitlajtolti okseki tlamachtilmej tlen kiualika non tlamachtil. Ijkuak oksepa tikmachtiskej, moneki tikinchiuiliskej seki tlajtlanilmej pampa tikitaskej kox okajsikamatki. Tla tikitaskej amo okajsikamatki, ma tikxelokan seki kauitl pampa iuan timomachtiskej okseki tlamachtilmej, uelis nochi noso san tlajko tlamachtil. Uelis tikintlajtoltiskej párrafos uan tikinchiuiliskej seki tlajtlanilmej tlen kuali itech otimokuayejyekojkej.

Recuadro kanin tlami tlamachtil. Kanin tlami se tlamachtil, katej intlanankilis tlajtlanilmej tlen katej kanin peua tlamachtil. Tla iuan tikojpauiaj tikmatiskej kox okajsikamatki tlen okachi ipati uan kox ueli iselti kijtoa tlen okajsikamatki. Tla iuan yotikintlajtoltijkej intlanankilis tlajtlanilmej uan tlaxelolmej itech Biblia, ma tikiluikan akin tikmachtiaj ika nonmej tlaxelolmej ma kijto tleka melauak tlen kajki itech non recuadro (Hech. 17:2, 3).