Xikchiuakan ken teotlajtojkej: Habacuc
1. ¿Tleka tikajsikamatij ken omomachiliaya teotlajtojki Habacuc?
1 Ijkuak tikitaj ken momiaktilijtok tlen amo kuali, uelis timomachiliaj ken Habacuc. Ye okitlajtlani Jehová: “¿Tleka tikchiua ma nikita tlen amo kuali? ¿Tleka tikkaua ma yeto tlajyouilistli?” (Hab. 1:3; 2 Tim. 3:1, 13). Tla timokuayejyekoaj itech tlen okijto Habacuc uan itech ineskayo pampa okatka yolmelauak, techpaleuis titlaxikoskej axkan ijkuak tikchiaj tonal ijkuak Jehová tlaixkomakas (2 Ped. 3:7).
2. ¿Ken uelis tiyetoskej tiyolmelajkej ken Habacuc?
2 Ma tiyetokan tiyolmelajkej. Habacuc amo san omokuayejyekoaya itech tlen opanotoka, ye oijsatoka uan okitekichiuilijtoka Jehová (Hab. 2:1). Jehová okilui Habacuc kichiuaskia tlen okijto ijkuak monekiskia uan nochtin akinmej yolmelajkej yoltoskiaj (Hab. 2:2-4). ¿Tlen kijtosneki nin pampa tejuan akinmej tikatej itech itlamian tonalmej? Okachi ipati ma tikneltokakan uits tonal ijkuak tlamis nochi tlen amo kuali uan amo miak ipati tikmatiskej keman uits. Tlaneltokilistli techpaleuis pampa tiijsatoskej uan okachi tikpatioitaskej titetlapouiskej (Heb. 10:38, 39).
3. ¿Tleka moneki ma tiktekichiuilijtokan Jehová ika pakilistli?
3 Tiyolpakij pampa tiktekichiuiliaj Jehová. Totlaneltokilis moyejyekos ijkuak Gog de Magog kitlajyouiltis ialtepe Jehová (Ezeq. 38:2, 10-12). Ijkuak mochiua se guerra, nochtin tlajyouiaj, hasta akinmej tlatlanij. Noijki miakej kipoloaj tlen kipiaj, amo onka tlakuali uan ayakmo kipiaj innemilis ken achto. ¿Ken timomachiliskej ijkuak ijkon panos? Habacuc okimatiaya yetoskia ouijkayotl, pero ye oyolpakiaya pampa okitekichiuiliaya Jehová (Hab. 3:16-19). Pakilistli tlen tikpiaj ijkuak tiktekichiuiliaj Jehová noijki techpaleuis ma titlaxikokan (Neh. 8:10; Heb. 12:2).
4. ¿Ken uelis tiyolpakiskej axkan uan satepan?
4 Jehová kinmachtijtos akinmej kinmakixtis ijkuak tlaixkomakas (Hab. 2:14). Akinmej kinyolitiskej noijki kixmatiskej Jehová. Ik non, axkan ma timochijchikauakan pampa nochtin tikintlapouiskej itech Jehová uan itech nochi tlen ye kichiua (Sal. 34:1; 71:17).