¿Ken tikmatij iTlajtol toTajtsin Dios amitlaj okipatilijkej?

Miakej kijtouaj yokipatilijkej tlen kijtoua iTlajtol toTajtsin Dios. Tlatitlanil Pedro okijto iTlajtol toTajtsin Dios “nochipa wejkawas” (1 Pedro 1:25). ¿Ken tikmatiskej amitlaj okipatilijkej?

ToTajtsin Dios kichiua nochipa ma yeto iTlajtol uan amitlaj ma kipatilikan. Yiuejkika akinmej okinchijchijkej copias amitlaj okipatilijkej. Okinpouayaj letras uan amitlaj okajxitiliayaj nion itlaj okikixtiliayaj. Pero noijki okatkaj tlajtlakolejkej, ik non, ualeua omotlapololtijkej ijkuak otlajkuilojkej pero amo okipatlakej tlen okijtouaya iTlajtol toTajtsin Dios.

¿KEN TIKMATISKEJ ITLAJTOL TOTAJTSIN DIOS KIJTOUA IJKON KEN YIUEJKIKA OKIJKUILOJKEJ?

Onka copias tlen yiuejkika okinmijkuilojkej. Tla ixtlamatkej kitaj itlaj amo kuali ijkuilitok itech se copia, kitaj ken ijkuilitok okseki copias (tla tikneki tikmatis okachi, xikalaki itech jw.org uan xiktemo tlamachtil “¿Se ha cambiado o manipulado la Biblia?”).

Ma tikitakan tlen ijkuilitok itech Rollos del mar Muerto tlen okinmajsikej 1947. Ompa ik mar Muerto, sekimej árabes tlen nemij kanin tlauaki okinmajsikej nonmej rollos itech seki cuevas. Yikipia kanaj dos mil xiuitl okinmijkuilojkej uan ompa ijkuilitok seki iTlajtol toTajtsin Dios. Ixtlamatkej okitakej tlen ijkuilitok itech nonmej rollos uan noijki okitakej tlen ijkuilitok axkan itech iTlajtol toTajtsin Dios. ¿Tlen okitakej?

Nonmej ixtlamatkej okitakej tlen kijtoua iTlajtol toTajtsin Dios ijkuilitok ken yiuejkika okijkuilojkej.a Nonmej rollos kiteititiaj amitlaj okipatilijkej iTlajtol toTajtsin Dios. Nin kiteititia ye okichi ma yeto iTlajtol uan amitlaj ma kipatilikan.

Nin techititia uelis tikneltokaskej tlen kijtoua iTlajtol toTajtsin Dios. Ik non, ma tikitakan tlen okijkuilojkej profetas ken iyelis.