Pablo “omotlasojkama inawak Dios iwa omoyolchika”

Ijkuak tokniuan tlen ochantiayaj Roma okimatkej Pablo ompa ajsiskia, sekimej okinamikitoj uan onejnenkej kanaj 64 kilómetros. ¿Ken okitak Pablo ijkuak tokniuan okiteititijkej okitlasojtlayaj? Ijkuak okinmitak, “omotlasojkama inawak Dios iwa omoyolchika” (Hech. 28:15). Maski Pablo nochipa okinyolchikauaya tokniuan, itech non tonal omonekiaya ye kiyolchikauaskiaj porque otsaktoka (2 Cor. 13:10).

Axkan tokniuan tlayekankej itech circuito, yauij kintlajpalotiuij tokniuan porque kinekij kinyolchikauaskej. Ualeua yejuan noijki sotlauaj, motekipachoaj uan moyolkokoaj ijkon ken kinpanoa nochtin itekipanojkauan Jehová. ¿Tlen uelis tikchiuaskej para ma yolpakikan tlayekanki itech circuito iuan isiua uan ijkon tinochtin timoyolchikauaskej? (Rom. 1:11, 12).

• 

  Ma timonechikokan para titetlapouitiuij. Ijkuak techtlajpaloki tokni tlayekanki itech circuito, kiyolchikaua ijkuak kita timochijchikauaj titetlapouitiuij non semana (1 Tes. 1:2, 3; 2:20). Ijkuak techtlajpaloki tokni, ximochijchikaua para titekitis ken precursor auxiliar. ¿Uelis titetlapouis iuan tokni noso iuan isiua? Noijki ¿uelis inmiuan titlamachtiti? Amo ximokuayejyeko ayamo miak xiuitl titetlapouia noso amo tikmati ken titetlapouis, yejuan kinpaktia tetlapouiskej iuan nochtin tokniuan.

• 

  Kuali ma tikinselikan. Uelis tikinkalotiskej noso tikinyoleuaskej touan ma tlakuatij, ijkon tikinmititiskej tikintlasojtlaj. Para tlakuaskej amo kinekij itlaj sapanoa oui (Luc. 10:38-42).

• 

  Ma tikkakikan uan ma tikchiuakan tlen techiluia. Tlayekanki itech circuito techtlasojtla uan techpaleuia kuali ma tiktekichiuilikan Jehová uan ualeua noijki moneki techyektlaliskej (1 Cor. 5:1-5). Tla tiyolyamankej uan titetlakamatij, yejuan noijki yolpakiskej (Heb. 13:17).

• 

  Ma tikinmiluikan tikintlasojkamatiliaj. Xikilui tlayekanki itech circuito iuan isiua ken mitspaleuia nochi tlen kichiuaj, noijki uelis tikinmiluis ika se carta (Col. 3:15).