¿Tikajsikamatij ken iyelis toTajtsin Dios?

¿Timokuayejyekoaj itech Jehová ijkuak tikitaj se xochitl kuajkualtsin, sitlalimej noso ijkuak tikitaj kanin ualchapantok atl? Tlen okichijchi Jehová techpaleuia ma tikajsikamatikan ken iyelis (Rom. 1:20). Tla timokuayejyekoaj itech Jehová ijkuak itlaj tikitaj, tikajsikamatiskej kipia chikaualistli, techtlasojtla, ixtlamatki, nochi kichiua ika melajkayotl uan kipaktia kitemakas tlen kipia (Sal. 104:24).

¿Tlen okichijchi Jehová uan nochipa tikitaj? Maski tichantij itech se ueyi altepetl uelis tikinmitaskej totomej noso kuajmej. Tla kuali tikitaj tlen Jehová okichijchi, non techpaleuis amo ma timoyolkokokan, amo san ma timotekipachokan uan okachi ma tikneltokakan nochipa techmaluis (Mat. 6:25-32). Tla tikinpia mokoneuan, xikinpaleui ma kajsikamatikan ken iyelis Jehová. Tla tiktlasojkamatiliaj nochi tlen okichijchi, non techpaleuis okachi kuali iuan ma timouikakan (Sal. 8:3, 4).

IJKUAK YOTIKITAK VIDEO NOCHI TLEN OKICHIJCHI TOTAJTSIN DIOS KITEITITIA UEYITITOK: TLAUILI UAN COLORES, XIKINNANKILI NINMEJ TLAJTLANILMEJ:

• ¿Tleka ueli tikinmitaj tlatlamantli colores?

• ¿Tleka sekimej colores mopapatlaj ijkuak tikinmitaj?

• ¿Tleka ualeua ijkuak tikitaj iluikak tlatlamantli mota?

• ¿Tlen colores kuajkualtsitsintin tikinmita kanin tichanti?

• ¿Tleka miak ipati ma tikitakan tlen Jehová okichijchi?