Página jw.org mitspaleuis xitetlapoui

Kanin peua página jw.org kajki seki tlamachtilmej uan videos tlen uelis kinpaleuis akinmej kinekij kixmatiskej toTajtsin Dios (Hech. 13:48). Ompa tikinmajsi noticias iuan tlen miakej kintekipachoua.

¿Ken uelis mitspaleuis kanin peua jw.org para titetlapouis?

• Nochipa xikita tlen kajki itech jw.org. Xikita tlamachtilmej tlen ompa kajki uan ximokuayejyeko ken uelis mitspaleuis para titetlapouis (para tikitas okseki tlamachtilmej san xikpacho kanin kijtoua “Okseki”). Nonmej tlamachtilmej mitspaleuis okachi kuali xitetlapoui.

• Xipeua xitetlapoui ika tlamachtilmej uan videos tlen katej kanin peua página jw.org. Tla ijkon tikchiua, mitspaleuis xikajsikamati tlen kintekipachoua miakej.

• Xikinmititi página jw.org. Xikinmilui tlen tlamachtilmej uelis kinpaleuis uan xikinmachti noijki matlatemokan.

• Xikintitlanili se enlace. Sekimej amo kinekij touan motlapouiskej pero kinpaktia tlatemoskej itech página jw.org. Ikinon tla tikita ikaj kineki okachi kimatis, xiktitlanili se enlace para makita página jw.org, se tlamachtil noso se video.