Ma timouikakan ika yolseuilistli uan amo ma titlaixnekikan

1. ¿Tlen okipanok ifamilia José?

YIUEJKIKA okatka se tlakatl itoka Jacob tlen okintlasojtlaya ikoneuan. Pero okachi okitlasojtlaya se ikone tlen omotokayotiaya José uan okipiaya 17 xiuitl. ¿Tlen okichijkej oksekimej ikoneuan? Ochauatikej uan okikokolijkej José maski amitlaj okichi. Pero ikniuan okinemakakej ken se tlakeuali uan okiluijkej intajtsin se yolkatl okimikti. Yejuan ochauatikej uan okiyolkokojkej intajtsin uan infamilia ayakmo okatka ika yolseuilistli (Gén. 37:3, 4, 27-34).

2. Ijkon ken kijtoua Gálatas 5:19-21, ¿tleka amo kuali ma titlaixnekikan?

² Biblia kijtoua akinmej kixnekij tlen oksekimej kipiaj,b poui itech nochi tlen ‘kiyoltilana inkuerpo’ uan amo kinpaleuia ma kiselikan tlen iTekiuajkayo toTajtsin Dios techmakas (xiktlajtolti Gálatas 5:19-21). Akinmej kixnekij tlen oksekimej kipiaj, san tekokoliaj, moteuiaj uan mokualaniaj.

3. ¿Tlen timomachtiskej?

³ Tlen okichijkej ikniuan José kiteititia tla titlaixnekij, ayakmo kuali timouikaskej iuan oksekimej nion tofamilia. Tejuan amo keman tikchiuaskej ken ikniuan José pero ma tikilnamiktokan tinochtin titlajtlakolejkej uan tikchiuaj tlen amo kuali (Jer. 17:9). Ik non, ualeua tikixnekij tlen oksekimej kipiaj. Ma tikitakan tlen okichijkej sekimej itekipanojkauan toTajtsin Dios tlen techpaleuis ma tikmatikan tleka ualeua tikixnekij tlen oksekimej kipiaj. Satepan tikitaskej tlen tikchiuaskej uan ijkon amo titlaixnekiskej uan ma tiyetokan ika yolseuilistli.

¿TLEKA UALEUA TITLAIXNEKIJ?

4. ¿Tleka akinmej ochantiayaj Filistea okixnekiayaj tlen okipiaya Isaac?

⁴ Ijkuak ikaj kipia miak tlamantli. Se tlakatl tlen omotokayotiaya Isaac okipiaya miak tomin pero akinmej ochantiayaj Filistea okixnekiayaj tlen okipiaya (Gén. 26:12-14). Okitsakej kanin okikixtiaya atl uan ijkon ayakmo okipiaya kanin kinmatlitis iyolkauan (Gén. 26:15, 16, 27). Axkan miakej kichiuaj ijkon ken akinmej ochantiayaj Filistea. San tlaixnekij uan amo kinekij ma kipiakan tlen oksekimej yikipiaj.

5. ¿Tleka teopixkej okichauatilijkej Jesús?

⁵ Ijkuak ikaj okachi kitlasojtlaj. Teopixkej judíos ochauatiayaj porque sekimej okitlasojtlayaj Jesús (Mat. 7:28, 29). ToTajtsin Dios okiualtitlanki Jesús uan amo otlakajkayauaya ijkuak otlamachtiaya. Pero teopixkej san tlen amo okijtojkej uan ijkon amo ma kineltokilikan tlen otlamachtiaya (Mar. 15:10; Juan 11:47, 48; 12:12, 13, 19). ¿Tlen techmachtia tlen okichijkej? Amo ma tichauatikan ijkuak oksekimej tokniuan okachi kintlasojtlaj porque kipiaj kuali inyelis. Ma timochijchikauakan ma tikpiakan toyelis ken yejuan (1 Cor. 11:1; 3 Juan 11).

6. ¿Ken okiteititi Diótrefes ochauatiaya?

⁶ Ijkuak se tokni kiluiaj okachi ma tlapaleui itech tlanechikol. Itech achto siglo okatka se tlakatl tlen omotokayotiaya Diótrefes. Ye okinchauatiliaya akinmej okiyekanayaj tlanechikol. ‘Okiwilitaya tlanawatijtos’, ik non, okiteneuaya tlatitlanil Juan uan oksekimej tlayekankej (3 Juan 9, 10). Tejuan xamo amo tikchiuaj ken Diótrefes. Pero xamo peuas tichauatiskej ijkuak se tokni kiluiaj okachi ma tlapaleui itech tlanechikol. Xamo porque tejuan tiknekij tikchiuaskej non tekitl uan timokuayejyekouaj noijki kuali tikchiuaskej.

7. ¿Tlen techpanos tla titlaixnekij?

⁷ Ijkuak tikixnekij tlen oksekimej kipiaj yetoskia ken amo kuali xiuitl. Ijkuak peua moneluayotia itech toyolo, oui tikuiuitlaskej. San kichiuas ma tichauatikan, ma timoueyinekikan uan ma titlaixnekikan. Tla ijkon tikchiuaskej ayakmo titetlasojtlaskej uan ayakmo titeiknomatiskej. Ik non, amo ma tikkauilikan ma moskalti itech toyolo uan san niman ma tikuiuitlakan. ¿Tlen techpaleuis amo ma titlaixnekikan?

MA TIYETOKAN TIYOLYAMANKEJ UAN MA TIYOLPAKIKAN SAN IKA TLEN TIKPIAJ

8. ¿Tlen techpaleuis amo ma titlaixnekikan?

⁸ Amo titlaixnekiskej tla tiyolyamankej uan tiyolpakij san ika tlen tikpiaj. Ijkon toyolo amo kichiuas ma titlaixnekikan. Amo timokuayejyekoskej okachi topati uan amo tiknekiskej nochi ma techmakakan porque technamiki (Gál. 6:3, 4). Tla tiyolpakij san ika tlen tikpiaj, amo timokuayejyekoskej okachi tikmatij tikchiuaskej seki tlamantli (1 Tim. 6:7, 8). Kuali timomachiliskej uan tiyolpakiskej ijkuak ikaj itlaj kiselia.

9. Ijkon ken kijtoua Gálatas 5:16 uan Filipenses 2:3, 4, ¿ken techpaleuis iespíritu santo toTajtsin Dios?

⁹ Moneki tikiluiskej Jehová ma techpaleui ika iespíritu santo amo ma titlaixnekikan uan ma tiyetokan tiyolyamankej uan ma tiyolpakikan (xiktlajtolti Gálatas 5:16; Filipenses 2:3, 4). Iespíritu santo toTajtsin Dios techpaleuia ma tikitakan tlen timokuayejyekouaj uan tleka ijkon timokuayejyekouaj. Noijki techpaleuis ayakmo ma timokuayejyekokan tlen amo kuali (Sal. 26:2; 51:10). Ma tikitakan tlen okipaleui Moisés uan Pablo amo ma tlaixnekikan.

10. ¿Tlen okimatki Moisés uan tlen okichi? (Xikita ixko revista).

¹⁰ Moisés okinyekanki israelitas pero amo keman omokuayejyeko san ye uelis nochi kichiuaskia. Se tonal, Jehová ayakmo nochi okimakak iespíritu santo Moisés porque noijki okinmakak oksekimej tlayekankej tlen ochantiayaj ik kanin okatka mantajkali. Satepan Moisés okimatki ome tlayekankej amo omonechikotoj uan noijki okiselijkej espíritu santo uan okijtouayaj okatkaj profetas. ¿Tlen okichi Moisés ijkuak Josué okilui ma kinmilui ayakmo ijkon ma kichiuakan? Ye amo ochauatik ijkuak Jehová okinpejpenki nonmej tlakamej. Ye oyolpakik ijkuak Jehová okintlali ma yetokan profetas (Núm. 11:24-29). ¿Tlen techmachtia tlen okichi Moisés?

11. ¿Ken uelis kichiuaskej tlayekankej ken Moisés?

¹¹ Axkan ma tikijtokan se tlayekanki kipaktia kiyekanas tlamachtil ika revista Akin Tetlapouijtok. Pero se tonal kiluiaj ma kimachti okse tokni ken kiyekanas non tlamachtil. Tla yolyamanki ken Moisés, amo chauatis uan yolpakis ijkuak kimachtis tokni.

12. ¿Ken kiteititiaj miakej tokniuan yolyamankej uan yolpakij san ika tlen kipiaj?

¹² Axkan ma tikitakan tlen kinpanoua miakej tokniuan tlen yikipiaj miak xiuitl. Sekimej tlayekankej yikipiaj miak xiuitl kinyekanaj oksekimej tlayekankej. Pero ijkuak kajxitiaj ochenta xiuitl ayakmo kichiuaj non tekitl. Noijki tlayekankej itech circuito ijkuak kajxitiaj setenta xiuitl ayakmo kichiuaj non tekitl uan kiseliaj okse tekitl. Ijkon kichiuaj porque yolyamankej. Noijki miakej betelitas kinmiluiaj kox uelis tlapaleuitiuij kanin okachi moneki. Nochtin ninmej tokniuan amo chauatij porque oksekimej kichiuaj tekitl tlen yejuan okichiuayaj.

13. ¿Tleka uelis chauatiskia Pablo?

¹³ Pablo noijki okatka yolyamanki uan oyolpakiaya san ika tlen okipiaya. Amo okikauili iyolo ma kichiua ma tlaixneki. Ye otetlapoui uan okijto: “Innawak n oksikimeh tlatematiltijkeh okachi amitla nopati, iwa nion amo nechnamiki manechnotsakah nitlatematilti” (1 Cor. 15:9, 10). Doce tlatitlanilmej okatkaj iuan Jesús pero Pablo opejki kitekichiuilia toTajtsin Dios satepan ijkuak Jesús yokimiktijkej uan okiyolitijkej. Satepan toTajtsin Dios okitlali ‘makinmatiltiti itlajtol akimeh amo judíojteh’ pero ye amo opouik iuan doce itlatitlaniluan Jesús (Rom. 11:13; Hech. 1:21-26). Ye oyolpakiaya san ika tlen okipiaya uan amo okinchauatili doce itlatitlaniluan Jesús.

14. ¿Tlen tikchiuaskej tla tiyolyamankej uan tiyolpakij san ika tlen tikpiaj?

¹⁴ Tla tiyolyamankej uan tiyolpakij san ika tlen tikpiaj, tikchiuaskej ken Pablo uan tikintlakaitaskej oksekimej tokniuan tlen noijki kitekichiuiliaj Jehová (Hech. 21:20-26). Jehová yokintlali sekimej tokniuan ma techyekanakan itech tlanechikol. Jehová kinmita tlayekankej ken “se tlatliokólili” maski tlajtlakolejkej (Efes. 4:8, 11). Tla tikintlakamatij uan tikintlakaitaj tlayekankej, kuali timouikaskej iuan Jehová uan tinochtin timouikaskej ika yolseuilistli.

“MATIKTEMOKAH NOCHI TLAN TECHMAKA YOLSEWÍLISTLI”

15. ¿Tlen techpaleuis amo ma titlaixnekikan?

¹⁵ Uelis tiyetoskej ika yolseuilistli tla amo titlaixnekij. Ik non, amo ma tikkauilikan toyolo ma kichiua ma titlaixnekikan. Noijki amitlaj ma tikijtokan tlen uelis kichiuas oksekimej ma tlaixnekikan. Tla ijkon tikchiuaj, tiktlakamatij Jehová ijkuak techiluia “matiktemokah nochi tlan techmaka yolsewílistli, iwa matimosepampalewikah para okachi mamoskalti totlaneltokalis” (Rom. 14:19). ¿Ken tikinpaleuiskej oksekimej amo ma tlaixnekikan uan ken timouikaskej ika yolseuilistli?

16. ¿Ken uelis tikinpaleuiskej oksekimej amo ma tlaixnekikan?

¹⁶ Tlen tikchiuaj uelis kinpaleuis oksekimej noso kinmijtlakos. Akinmej amo kitekichiuiliaj Jehová kinekij ma timoueyinekikan (1 Juan 2:16). Pero non san kichiua okachi ma tlaixnekikan. ¿Tlen tikchiuaskej para oksekimej amo ma tlaixnekikan? Amo ma tikijtojtinemikan tlen tikpiaj noso tlen tikmokouiskej. Amo ma tikijtojtinemikan tlen tekitl tikpiaj itech tlanechikol. Porque oksekimej tokniuan peuas tlaixnekiskej tla tikijtojtinemiskej tlen tikchiuaj. Pero tla techtekipachoua tlen oksekimej kinpanoua uan tikitaj tlen kuali kichiuaj, tiyolpakiskej, timouikaskej ika yolseuilistli uan san sekan tiyetoskej iuan tokniuan.

17. ¿Tlen okichijkej ikniuan José uan tleka?

¹⁷ Ma timochijchikauakan uan ijkon ayakmo titlaixnekiskej. Oksepa ma tikitakan tlen okinpanok ikniuan José. Satepan okajsitoj José ompa Egipto. José amo san niman okinmilui ikniuan akin okatka ye. Achto okinyejyeko porque okinekiaya kimatis kox yokipatlakej inyelis. Otlanauati ma kintlakualchiuilikan uan okachi ma kitlatekilikan Benjamín (Gén. 43:33, 34). Pero nion se okijto tleka Benjamín okachi okitlatekilijkej. Ikniuan José okintekipachouaya tlen kipanoskia Benjamín uan Jacob (Gén. 44:30-34). Yejuan ayakmo otlaixnekiayaj uan nochtin infamilia oksepa omouikayaj ika yolseuilistli (Gén. 45:4, 15). Tejuan noijki tla amo titlaixnekij, titlapaleuiskej ma yetokan ika yolseuilistli tofamilia uan noijki tokniuan.

18. Ijkon ken kijtoua Santiago 3:17, 18, ¿tlen panos tla tinochtin timouikaskej ika yolseuilistli?

¹⁸ Jehová kineki ma timouikakan ika yolseuilistli uan amo ma titlaixnekikan. Pero moneki timochijchikauaskej porque axkan otimomachtijkej tinochtin uelis titlaixnekiskej (Sant. 4:5). Axkan miakej tlaixnekij uan uelis techijtlakoskej. Ik non, moneki ma tiyetokan tiyolyamankej, ma timotlasojkamatikan uan ma tiyolpakikan san ika tlen tikpiaj. Ijkon tinochtin timouikaskej ika yolseuilistli uan tikpiaskej kuali toyelis ijkon ken axkan otimomachtijkej (xiktlajtolti Santiago 3:17, 18).