Sekimej techtlajtlaniaj

¿San Gálatas 5:22, 23 kijtoua tlen poui itech espíritu Santo?

Itech Gálatas 5:22, 23 moijtoua chiknaui tlamantli tlen moneki tikchiuaskej. Ompa kijtoua: “Ijkuak n Espíritu kiyakana se tlakatl, ye ni tlan kichiwah: tetlasojtla, kipia pakílistli, kipia yolsewílistli, nochi kixikoa, kuali tlakatl, teiknomati, tlaneltokak, yolyamanki, kuali monawatia”. Pero amo san nin poui itech espíritu santo.

Ma tikitakan tlen okijto tlatitlanil Pablo itech achto versículos: “Akimeh kichiwah tlan kinyoltilana inkuerpo: momekatijtinemih, kichiwah tlan pitsotik, kichiwah tlan teixpolo, kinweyiliah diosmeh non san kinmachijchiwah, tetlajchiwiah, tekokoliah, kichiwah mamokuakualanikah oksikimeh, chawatih, kualankamikih, kichiwah itla san para makinmitakah, kinxexeloah n tokniwah, kinmachtiah tlan amo milák, xikojmikih, tlawankeh, fiero mopaktiah itech ilwimeh, iwa kinchiwah oksikimeh tlajtlákolteh kemi ninteh” (Gál. 5:19-21). Pablo amo okijto nochi tlajtlakoli tlen kichiuaj “akimeh kichiwah tlan kinyoltilana inkuerpo” ijkon ken kijtoua Colosenses 3:5. Noijki itech Gálatas 5:22, 23 amo okijto nochi tlen poui itech espíritu santo.

Ijkon tikajsikamatij porque tlen kijtoua Gálatas mouika iuan tlen Pablo okinmijkuilili tokniuan tlen okatkaj Éfeso: “Itlawil Dios techyolpatla, iwa kichiwa matitetlasojtlakah, matikijtokah tlan milák iwa matiyetokah timilajkameh” (Efes. 5:8, 9). ‘Titetlasojtlaskeh, tikijtoskeh tlan milák iwa tiyetoskeh timilajkameh’ poui itech “itlawil Dios” pero noijki poui itech iespíritu santo.

Pablo noijki okilui Timoteo ma kichiua nin chikuase tlamantli: “Ximilajkanemi, ximotemakti inawak Dios iwa kuali xitlaneltoka, xitetlasojtla, xikxiko nochi tlan tipanos, iwa ayik ximoweyitlali” (1 Tim. 6:11). Tlen nikan moijtoua san eyi tlamantli poui itech espíritu santo: “Kuali xitlaneltoka, xitetlasojtla [...] iwa ayik ximoweyitlali”. Pero Timoteo noijki omonekiaya kiyekanas espíritu santo uan ijkon kichiuaskia okseki tlamantli tlen okijto Pablo: “Ximilajkanemi, ximotemakti inawak Dios iwa [...] xikxiko nochi tlan tipanos” (xikita Colosenses 3:12; 2 Pedro 1:5-7).

Nin kiteititia Gálatas 5:22, 23 amo kijtoua nochi tlen moneki tikchiuaskej. Espíritu santo techpaleuis ma tikchiuakan chiknaui tlamantli tlen kijtoua Gálatas 5:22, 23. Pero onka okseki tlamantli tlen techpaleuis ma tikpiakan chikauak totlaneltokilis uan ma tikpiakan “tonemilis chipawak iwa yekmilajka” (Efes. 4:24).