¿Ken techpaleuis tla timotlatlaujtiaj?

Se siuatl tlen motokayotia Pamela sapanoua omokokouaya, ik non, omopajtito. Uan noijki okilui toTajtsin Dios ma kipaleui ma tlaxiko. ¿Okikakili toTajtsin Dios?

Pamela okijto: “Ijkuak onikpiaya cáncer uan onikonitoka pajtli, ualeua onimomojtiaya. Pero onimoyolseuiaya ijkuak oniktlatlaujtiaya toTajtsin Dios uan ijkon onikmatiaya tlen omonekiaya nikchiuas. Maski ayamo okachi nipajti, kuali nimomachilia ijkuak nimotlatlaujtia. Ijkuak ikaj nechtlajtlania ken nika, ne nikiluia: ‘Amo kuali nika pero niyolpaki”.

Amo moneki itlaj ma techpano para timotlatlaujtiskej. Tinochtin titlajyouiaj uan moneki ikaj ma techpaleui. Ik non, ¿techkakis toTajtsin Dios tla tiktlatlaujtiaj?

Biblia kijtoua: “Xikmaka Jehová motlamamal uan ye mitspaleuis. Amo kikauas ma uetsi akin yolmelauak” (Salmo 55:22). Tlen kijtoua nin texto sapanoua techyolchikaua. ¿Ken techpaleuis tla timotlatlaujtiaj? Ijkuak timotlatlaujtiaj ken toTajtsin Dios kineki, ye techpaleuia ma titlaxikokan ijkuak titlajyouiaj (xikita kanin kijtoua “Techpaleuis tla timotlatlaujtiaj”).

Techpaleuis tla timotlatlaujtiaj

Timoyolseuiskej

“Nochipa xikilikah n Toteko tlan nonkinekih keman nonmotiotsajtsiliah. [...] Iyolsewilis Dios, non amaka weleti kajsikamati, [kimaluis] nomoyolo iwa nomotlayejyekolis por Cristo Jesús” (Filipenses 4:6, 7). Tla tikiluiaj toTajtsin Dios nochi tlen techtekipachoua, ye techyolseuis uan tikmatiskej tlen tikchiuaskej maski titlajyouijtokej.

ToTajtsin Dios techpaleuis ma tiyetokan tiixtlamatkej

“Tla seme de nomejwah amo kipia ixtlamatílistli, makitlajtlanili Dios. Ye nomechmakas miak ixtlamatílistli iwa amo nomechixtokilis” (Santiago 1:5). Ijkuak titlajyouiaj, ualeua amo tikmatij tlen tikchiuaskej. Pero tla tiktlatlaujtiaj toTajtsin Dios ma techpaleui para tiyetoskej tiixtlamatkej, techpaleuis ma tikilnamiktokan tlen kijtoua Biblia uan tikchiuaskej tlen moneki.

Timoyolchikauaskej

“Para nochi tlamantli nikpia chikaualistli itech akin nechmaka chikaualistli” (Filipenses 4:13, TNM). Ken Jehová ye akin kipia miak chikaualistli, ye uelis techyolchikauas para tikmatiskej tlen tikchiuaskej uan para titlaxikoskej ijkuak titlajyouiskej (Isaías 40:29). Biblia kijtoua Jehová “nochipa techyolchikawa”. Ik non, ye uelis techyolchikauas “ijkuak titlaijyowiah” (2 Corintios 1:3, 4).