¿Keman okijto Jesús pojpoliuis tlen amo kuali?

XIMOKUAYEJYEKO ITECH OME TLAMANTLI TLEN JESÚS OKIJTO:

“Xiijsatokah nomejwah, porke amo nonkimatih tlan tonati nion tlan ora” (MATEO 25:13).

“Yika nomejwah xiijsatokah, xiyektlachixtokah [...], porke mach nonkimatih kemania kalakiki non tonati” (MARCOS 13:33).

Akinmej nikan tichantij amo tikmatij keman pojpoliuis tlen amo kuali. Pero toTajtsin Dios okitlali “tonati iwa n ora” ijkuak kipojpolos nochi tlen amo kuali (Mateo 24:36). ¿Kijtosneki non amo uelis tikmatiskej keman ijkon panos? Amo. Jesús okijto imachtijkauan tikitaskiaj seki tlamantli tlen kiteititiskia ijkon panoskia.

SEKI TLAMANTLI TLEN TIKITASKIAJ

Seki tlamantli tlen kiteititiskia “yitlamis nochi tlen onka itech tlaltikpak”, Jesús okijto: “Se país momakas iwa n ok se, iwa se altepetl momakas iwa n ok se. Yetos [apistli], iwa sentetl tlalolinis” (Mateo 24:3, 7). Noijki okijto yetos “kokólistli” (Lucas 21:11). ¿Panotok tlen okijto Jesús?

Miakej sapanoua tlajyouiaj porque onka guerras, amo kipiaj tlen kikuaskej, tlalolini uan mokokouaj. Itech 2004 otlalolinki ompa océano Índico uan opanok se tsunami uan omikej 225,000. Itech eyi xiuitl ipan nochi tlaltikpak omikej kanaj 6,9 millones ika kokolistli COVID-19. Jesús okijto non kiteititiskia yitlamis tlen amo kuali.

ITLAMIAN TONALMEJ

Biblia kijtoua ijkuak panoskia itlamian tonalmej tikmatiskiaj ayakmo miak poliui para tlamis tlen amo kuali (2 Pedro 3:3, 4). 2 Timoteo 3:1-5, kijtoua miakej amo kichiuaskiaj tlen toTajtsin Dios kipaktia (xikita recuadro “Tlen achto panos ijkuak ayamo pojpoliuis ‘tlaltíkpaktli’”). ¿Tejuatsin yotikitak miakej san intech motekipachouaj, moteuiaj, kinekij kipiaskej miak tomin uan kinchiuiliaj tlen amo kuali oksekimej? Tla ijkon panotok, non kiteititia yitlamis tlen amo kuali.

¿Hasta keman tiyetoskej itech itlamian tonalmej? Biblia kijtoua amo uejkauas uan toTajtsin Dios kinmixpolos “akimeh kijtlakoah n tlaltíkpaktli” (Apocalipsis 11:15-18; 12:12).

TLALTIKPAK MOCHIUAS SE XOCHITLALI

ToTajtsin Dios yokitlali “tonati iwa n ora” ijkuak kipojpolos nochi tlen amo kuali (Mateo 24:36). Pero ye “amo kineki aka mamoixpolo” (2 Pedro 3:9). Ik non, ye techkauilia ma tikixmatikan uan ma tiktlakamatikan porque ye kineki techmakixtis uan ma tichantikan itech xochitlali.

ToTajtsin Dios miakej techmachtijtok ken kineki ma tiyetokan ijkuak peuas ualtlanauatis ika iTekiuajkayo. Jesús okijto motematiltiskia itech nochi tlaltikpak tlen kichiuas iTekiuajkayo toTajtsin Dios (Mateo 24:14). TiiTlaixpantijkauan Jehová titetlapouiaj uan titlamachtiaj sapanoua miak horas ipan nochi tlaltikpak. Jesús okijto miakej itech nochi tlaltikpak ijkon tetlapouiskiaj.

Yotikitakej ayakmo poliui miak tekiuajkej ayakmo tlanauatiskej. Pero uelis timomakixtiskej uan tichantiskej itech xochitlali. Itech okse tlamachtil tikitaskej tlen uelis tikchiuaskej tla tiknekij tichantiskej ijkuak ijkon tlayetos.