¿Uelis tikpejpenas ken tikneki tiyetos satepan?

Yikipia kanaj tres mil quinientos xiuitl akinmej okiueyichiuayaj Jehová ye okinmilui tlen omonekiaya kichiuaskej para kuali yetoskiaj satepan: “Oniktlali moixpan yolilistli uan mikilistli, tlateochiualistli uan tlauijuikaltilistli uan moneki tikpejpenas yolilistli para tiyoltos te uan moxuiuan” (Deuteronomio 30:19).

Tla yejuan okinekiayaj kuali yetoskej satepan, omonekiaya kuali kipejpenaskej tlen kichiuaskej. Tejuan noijki moneki kuali tikpejpenaskej. Biblia techiluia tlen moneki tikchiuaskej para kuali tiyetoskej satepan: “Xiktlasojtla Jehová moDios, xikkaki itlajtol” (Deuteronomio 30:20).

¿KEN UELIS TIKTLASOJTLAS JEHOVÁ UAN TIKKAKIS ITLAJTOL?

XIMOMACHTI TLEN KIJTOUA BIBLIA: Tla tikneki tiktlasojtlas Jehová, achto moneki timomachtis Biblia uan ijkon tikmatis ken iyelis. Tla timomachtis tikmatis ye techtlasojtla uan kineki kuali xiyeto. Noijki kineki iuan ximotlapoui porque ye kineki mitspaleuis (1 Pedro 5:7). Tla timochijchikaua tikixmatis, Biblia kijtoua mouan mouikas (Santiago 4:8).

XIKCHIUA TLEN TIMOMACHTIA: Tla tikneki tikkakis toTajtsin Dios, moneki tikchiuas tlen ye kijtoua uan non kajki itech Biblia. Ijkuak ijkon tikchiuas mitspanos tlen kijtoua Josué 1:8: “Kuali tias itech moojui uan ijkon timoyekanas ika ixtlamatilistli”.