“Senmiaktikeh tlaltikpaktlakah” kiueyichiuaj toTajtsin Dios uan kitlasojkamatiliaj Cristo

1. ¿Tlen okipanok se telpochtli ijkuak okikak se tlamachtil itech 1935?

SE TOKNI uan isiua omomachtiayaj Biblia, ijkuakon ayamo okintokayotiayaj iTlaixpantijkauan Jehová. Okinpiayaj eyi itelpokauan uan ome ichpokauan, kuali okinmachtijkej ma kitekichiuilikan Jehová uan ma kichiuakan ken Jesús. Se intelpoch tlen okipiaya 18 xiuitl omoapolakti itech 1926. Sejse xiuitl ijkuak okilnamikiayaj imikilis Jesús, non tokni okikuaya pan uan okoniaya vino. Ijkon okichiuayaj nochtin tlen noijki okinmixmatiayaj ken akinmej omomachtiayaj Biblia. Pero okse tlamantli omokuayejyeko ijkuak okikak se tlamachtil tlen omotokayotiaya: “Senmiaktikeh tlaltikpaktlakah”. Okipanolti tokni Joseph Rutherford itech se ueyi nechikol tlen omochi ompa Washington, Estados Unidos itech 1935. ¿Tlen okajsikamatkej tokniuan itech non ueyi nechikol?

2. ¿Tlen okiyekijto tokni Rutherford ijkuak otlamachti?

² Itech non tlamachtil tokni Joseph Rutherford okiyekijto akinmej yetoskiaj “sa tekitl miekej tlakaj” (Itlajtol totajtzin Dios [NHY]) noso “senmiaktikeh tlaltikpaktlakah” ijkon ken kijtoua Apocalipsis 7:9. Achto omokuayejyekouayaj yejuan noijki yaskiaj iluikak pero amo okatkaj ken tlapejpenalmej porque amo okachi okitlakamatiayaj toTajtsin Dios. Tokni Rutherford ika Biblia okiyekijto akinmej pouij itech “senmiaktikeh tlaltikpaktlakah” toTajtsin Dios amo okinpejpenki para yaskiaj iluikak, yejuan pouiskiaj iuan “oksikimeh ichkameh”b tlen iaxkauan Cristo, panoskej itech ueyi tlajyouilistli uan nochipa yoltoskej nikan tlaltikpak (Apoc. 7:14). Jesús okijto: “Noiwa nikimpia oksikimeh ichkameh, non amo kateh ijtik nin korral. Iwa moneki nikualinwikas noiwa. Yejwah nechtenkakiskeh, iwa nochteh yetoskeh sansikah, iwa yetos san se tlájpixki” (Juan 10:16). “Oksikimeh ichkameh”, kijtosneki yejuan iTlaixpantijkauan Jehová tlen kitlasojtlaj ika nochi inyolo uan kineltokaj nochipa chantiskej itech se xochitlali nikan tlaltikpak (Mat. 25:31-33, 46). Ma tikitakan ken okipaleui tokni tlen okipiaya 18 xiuitl uan oksekimej tokniuan ijkuak non okajsikamatkej (Sal. 97:11; Prov. 4:18).

MIAKEJ TOKNIUAN OKAJSIKAMATKEJ SEKI TLAMANTLI

3, 4. ¿Tlen okajsikamatkej miakej tokniuan itech xiuitl 1935 uan tleka?

³ Itech non ueyi nechikol ijkuak tokni Rutherford okitemakak se tlamachtil, opanok itlaj kualtsin, tokni nochtin okinmilui: “Ximoketsakan nochtin akinmej nankineltokaj nochipa nanchantiskej nikan tlaltikpak”. Se tokni okijto omonechikojkej kanaj 20,000 uan kanaj tlajko omoketskej. Tokni okijto: “¡Nikan katej ‘senmiaktikeh tlaltikpaktlakahʼ!”. Omomatlaxkalojkej uan oyolpakej. Akinmej ompa okatkaj okajsikamatkej amo yaskiaj iluikak nion Jehová okinpejpenki ika iespíritu santo para ma yetokan tlapejpenalmej. Mostlatika omoapolaktijkej 840 uan miakej opouiayaj itech “oksikimeh ichkameh”.

⁴ Ik non, sapanoua miakej tokniuan ayakmo okikuayaj pan nion okoniayaj vino itech iCena toTeko, telpochtli tlen itech otimotlapouijkej noijki ayakmo ijkon okichiuaya. Miakej omomachiliayaj ken se tokni tlen okijto: “Itech xiuitl 1935 ijkuak otikilnamikej imikilis Jesús san ye non tonal onikua pan uan onikonik vino porque onikajsikamatki Jehová amo onechpejpenki ika espíritu santo para ma nikneki nias iluikak. Ne oniknekiaya nichantis nikan tlaltikpak uan oniknekiaya nitlapaleuis para tlaltikpak ma yeto se xochitlali” (Rom. 8:16, 17; 2 Cor. 1:21, 22). Ijkuakon opejki momiaktiliaj “senmiaktikeh tlaltikpaktlakah” uan kinpaleuiaj tlapejpenalmej tlen ok katej nikan tlaltikpak.

5. ¿Ken kinmita Jehová akinmej ayakmo kikuaj pan nion konij vino?

⁵ ¿Ken okinmitak Jehová akinmej ayakmo okikuajkej pan nion okonikej vino desde 1935? ¿Ken kita Jehová ijkuak se tokni kikua pan uan koni vino pero satepan kajsikamati amo okipejpenki? (1 Cor. 11:28). Sekimej okikuayaj pan uan okoniayaj vino porque okineltokayaj yaskiaj iluikak. Pero tla kajsikamatij toTajtsin Dios amo okinpejpenki, ayakmo ijkon kichiuaj uan ok kitekichiuiliaj Jehová ika nochi inyolo. Ijkon ye kinselis para ma pouikan itech “oksikimeh ichkameh”. Maski ayakmo kikuaj pan nion konij vino, ok monechikouaj ijkuak tikilnamikij imikilis Jesús, kitlasojkamatiliaj ye uan Jehová tlen yokichijkej topatka.

KICHIAJ SEKI TLAMANTLI KUALTSIN

6. ¿Tlen kinnauatia Jesús ma kichiuakan ángeles?

⁶ Yiuits ueyi tlajyouilistli, ik non, moneki kuali timomachtiskej tlen kijtoua Apocalipsis capítulo 7. Ompa tlajtoua itech tokniuan tlapejpenalmej uan “senmiaktikeh tlaltikpaktlakah” tlen poui itech “oksikimeh ichkameh”. Jesús okinnauati ángeles ma ‘kitsakuilijtokah n ejekatlʼ tlen teixpolos uan ijkon kichijtoskej hasta ijkuak Jehová kichiuas nochtin tlapejpenalmej ma yakan iluikak (Apoc. 7:1-4). Ken tlapejpenalmej nochipa kitekichiuilijtoskej Jehová, yetoskej tekiuajkej uan teopixkej iuan Cristo ompa iluikak (Apoc. 20:6). Ijkuak 144,000 yiyetoskej iluikak, Jehová, Jesús uan ángeles yolpakiskej.

7. Ijkon ken kijtoua Apocalipsis 7:9, 10, ¿akinmej okinmitak Juan uan tlen okichijtokaj? (Xikita dibujo tlen kajki itech página 1).

⁷ Ijkuak Juan okinmitak 144,000 teopixkej uan tekiuajkej, noijki okinmitak “senmiaktikeh tlaltikpaktlakah” tlen momakixtiskej itech Armagedón. Okachi miakej “senmiaktikeh tlaltikpaktlakah” uan amo tikmatij keski ompa pouij (xiktlajtolti Apocalipsis 7:9, 10). Yejuan “tlakentitokeh ika intlakeh istak” uan amo keman omosokiotijkej ika tlen kiyekana Satanás uan kintlakamatij ika nochi inyolo Jehová uan Jesús (Sant. 1:27). Chikauak kijtouaj okinmakixtijkej Jehová uan Jesús, ye Ichkatsin Dios. “Itech inmawah kipixtokeh siki soyatl”, ijkon kiteititiaj kiseliaj Jesús ken ueyi tekiua tlen Jehová okitlali (noijki xikita Juan 12:12, 13).

8. ¿Tlen kichiuaskej nochtin akinmej katej iluikak ijkon ken kiteititia Apocalipsis 7:11, 12?

⁸ Xiktlajtolti Apocalipsis 7:11, 12. ¿Tlen okichijkej akinmej katej iluikak? Juan okitak nochtin oyolpaktokaj uan okiueyichiuayaj Jehová ijkuak okinmitakej “senmiaktikeh tlaltikpaktlakah”. Jehová uan nochtin akinmej katej iluikak yolpakiskej ijkuak kinmitaskej nochtin akinmej panoskej itech ueyi tlajyouilistli.

9. Ijkon ken kijtoua Apocalipsis 7:13-15, ¿tlen kichijtokej “senmiaktikeh tlaltikpaktlakah”?

⁹ Xiktlajtolti Apocalipsis 7:13-15. Juan okijto akinmej pouij itech “senmiaktikeh tlaltikpaktlakah” “yejwah yokimpakeh intlakenwah iwa okinmistayaltijkeh ika iesso n Ichkatsi”. Non kijtosneki kipiaj chipauak intlalnamikilis uan Jehová kinselia (Is. 1:18). Yejuan omotemakakej ixpan Jehová uan omoapolaktijkej, tlaneltokaj itech imikilis Jesús uan kuali mouikaj iuan Jehová (Juan 3:36; 1 Ped. 3:21, TNM). Ik non, yetoskiaj ken katej ixpan toTajtsin Dios uan kitekichiuilijtokej “tlajka iwa n yuak”, ika nochi tlen ye yokitlali para ma kiueyichiuakan nikan tlaltikpak. Yolpakij kintlapouiaj uan kinmachtiaj oksekimej ma kichiuakan ken Cristo porque kipatioitaj kipaleuiskej iTekiuajkayo toTajtsin Dios (Mat. 6:33; 24:14, TNM; 28:19, 20).

10. ¿Tlen kineltokaj akinmej pouij itech “senmiaktikeh tlaltikpaktlakah” uan tlen kitaskej?

¹⁰ Akinmej pouij itech “senmiaktikeh tlaltikpaktlakah” kineltokaj toTajtsin Dios kinmaluis ijkuak panos ueyi tlajyouilistli porque Biblia kijtoua ye kajki itech itrono “inwah yetos iwa kimpalewijtos”. Noijki mochiuas tlen yiuejkika kichixtokej akinmej pouij itech “oksikimeh ichkameh”, toTajtsin Dios “kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli, porke nochi tlan yowejka okatka, nochi yotlatlajtlanki” (Apoc. 21:3, 4).

11, 12. (1) Ijkon ken kijtoua Apocalipsis 7:16, 17, ¿tlen kiseliskej akinmej pouij itech “semiaktkeh tlaltikpaktlah”? (2) Itech iCena toTeko, ¿tlen uelis kichiuaskej akinmej pouij itech “oksikimeh ichkameh” uan tleka?

¹¹ Xiktlajtolti Apocalipsis 7:16, 17. Axkan sekimej iTlaixpantijkauan Jehová tlajyouiaj porque amo kipiaj tlen kikuaskej, amo kipiaj tomin, onka guerras uan okseki ouijkayotl. Oksekimej tokniuan tsaktokej porque kitekichiuiliaj Jehová. Pero akinmej pouij itech “senmiaktikeh tlaltikpaktlakah” yolpakij porque kimatij ijkuak tlamis nochi tlen amo kuali, nochipa kipiaskej tlen kikuaskej uan tlen ika momachtiskej. Noijki ijkuak Jehová kipojpolos nochi tlen kiyekantok Satanás, kinmaluis itekipanojkauan. Ijkuak panos ueyi tlajyouilistli, Jesús “kinwikas kan améyali non kichiwa se mayolito”. Kualtsin kinpanos “senmiaktikeh tlaltikpaktlakah”, axkan sapanoua miakej chantij nikan tlaltikpak pero xamo san yejuan amo keman ixpoliuiskej (Juan 11:26).

¹² Nochtin akinmej pouij itech “oksikimeh ichkameh” kintlasojtlamatiliaj Jehová uan Jesús nochi tlen kinmakaskej. Maski Jehová amo okinpejpenki ma yakan iluikak, kintlasojtla ijkon ken tlapejpenalmej. Nochtin yejuan uelis kiueyichiuaskej toTajtsin Dios uan kitlasojkamatiliskej Cristo, ijkon kichiuaj ijkuak kilnamikij imikilis.

MA TIKUEYICHIUAKAN TOTAJTSIN DIOS UAN MA TIKTLASOJKAMATILIKAN CRISTO

13, 14. ¿Tleka tinochtin moneki timonechikoskej para tikilnamikiskej imikilis Jesús?

¹³ Axkan ayakmo miakej kikuaj pan uan konij vino. Ma tikijtokan tla kanaj omonechikojkej 1,000 san se kikua pan uan koni vino. Non kiteititia miakej tlen yauij ijkuak tikilnamikij imikilis Jesús, amo kikuaj pan nion konij vino porque kineltokaj chantiskej nikan tlaltikpak. Pero, ¿tleka yauij? Yetoskia ken yaskiaj ijkuak monamiktia se inyolikni. Yauij porque ijkon kiteititiaj kitlasojtlaj uan kinekij ma yolpaki ye uan isiua. Noijki ijkon kichiuaj akinmej pouij itech “oksikimeh ichkameh”, monechikouaj ijkuak kilnamikij imikilis Jesús porque kitlasojtlaj uan noijki kintlasojtlaj tlapejpenalmej. Noijki kiteititiaj motlasojkamatij porque Jesús topatka omikik uan ijkon uelis yoltoskej nochipa nikan tlaltikpak.

¹⁴ Noijki monechikouaj ijkuak kilnamikij imikilis Jesús porque ye ijkon otlanauati. Ijkuak ye okichi iCena iuan iapóstoles okijto: “Ijkí xikchiwakah para nonnechilnamikiskeh” (1 Cor. 11:23-26). Ik non, “oksikimeh ichkameh” ok kilnamiktoskej ijkuak omikik Jesús hasta ijkuak ayakmo yetoskej tlapejpenalmej nikan tlaltikpak. Noijki kinyoleuaj oksekimej ma monechikokan para noijki ma kilnamikikan imikilis Jesús.

15. ¿Ken uelis tikueyichiuaskej toTajtsin Dios uan tiktlasojkamatiliskej Cristo ijkuak tikilnamikiskej imikilis?

¹⁵ Ijkuak tikilnamikiskej imikilis Cristo, uelis titlakuikaskej uan timotlatlaujtiskej ijkon tikueyichiuaskej Jehová, tikteititiskej tiktlasojtlaj uan tiktlasojkamatiliaj ye uan Jesús. Tlamachtil tlen kitemakaskej nin xiuitl itoka: “Ma tiktlasojkamatikan tlen toTajtsin Dios uan Cristo topatka yokichijkej”. Ijkuak tikkakiskej non tlamachtil okachi tiktlasojkamatiliskej Jehová uan Jesús. Ijkuak kipanoltiskej pan uan vino tikilnamikiskej non kijtosneki itlalnakayo uan ieso Cristo. Noijki tikilnamikiskej Jehová okitekauili Jesús ma kimiktikan para ijkon tejuan uelis tiyoltoskej (Mat. 20:28). Nochtin akinmej kitlasojtlaj Jehová uan Jesús kilnamikiskej imikilis.

XIKTLASOJKAMATILI JEHOVÁ TLEN YOMITSILUI MITSMAKAS

16. ¿Ken kinmita Jehová tlapejpenalmej uan akinmej pouij itech “oksikimeh ichkameh”?

¹⁶ Jehová kinpatioita tlapejpenalmej uan noijki akinmej pouij itech “oksikimeh ichkameh”. Nochtin kintlasojtla, ijkon tikmatij porque okitemakak ikone para kinmakixtis tlapejpenalmej uan oksekimej. Ome grupos amo san sekan yetoskej pero nochtin moneki kitlakamatiskej Jehová ika nochi inyolo uan noijki Cristo (Sal. 31:23). Ma tikilnamiktokan maski tiyetoskej titlapejpenalmej noso amo, Jehová tinochtin techpaleuia ika iespíritu santo.

17. ¿Tlen kichixtokej tlapejpenalmej?

¹⁷ Ijkuak tlapejpenalmej nesij, amo mokuayejyekouaj yaskej iluikak. Jehová kitlalia itech inyolo ma kinekikan. Yejuan mokuayejyekouaj tlen toTajtsin Dios kinmakas uan nochipa kijtouaj ijkuak motlatlaujtiaj, san mochixtokej para yaskej iluikak. Maski amo kimatij tlen kijtosneki yetoskej espíritus, kinektokej yetoskej inauak Jehová, Jesús, ángeles uan oksekimej tlapejpenalmej. Noijki kineltokaj tlapaleuiskej itech iTekiuajkayo toTajtsin Dios (Filip. 3:20, 21; 1 Juan 3:2).

18. ¿Tlen kinekij kichiuaskej akinmej pouij itech “oksikimeh ichkameh”?

¹⁸ Jehová okitlali itech inyolo akinmej pouij itech “oksikimeh ichkameh” ma kinekikan nochipa yoltoskej nikan tlaltikpak (Ecl. 3:11). Kinekij ma ajsi non tonal uan ijkon tlapaleuiskej ma yeto se xochitlali nikan tlaltikpak, kinchijchiuaskej kalmej uan tlatokaskej. Nochipa chikajtoskej uan kuali yetoskej iuan infamilias (Is. 65:21-23). Kinekij tlaixmatitiuij itech nochi tlaltikpak, kinekij yaskej kanin tepeyo, kuajyo uan noijki kanin kajki ueyi atl. Kinekij okachi kixmatiskej nochi tlen Jehová okichijchi. Pero okachi yolpakij porque mojmostla okachi mouikaskej iuan Jehová.

19. ¿Tlen uelis tikchiuaskej ijkuak tikilnamikiskej imikilis Cristo uan keman tikilnamikiskej?

¹⁹ Jehová yokinmilui nochtin itekipanojkauan nochi tlen kinmakas (Jer. 29:11). Ijkuak tikilnamikiskej imikilis Cristo tinochtin uelis tikueyichiuaskej Jehová uan tiktlasojkamatiliskej Jesús porque uelis nochipa tiyoltoskej. Akinmej tikchiuaj ken Cristo tikpatioitaj tonal ijkuak tikilnamikij imikilis. Itech sábado 27 de marzo 2021 tikilnamikiskej imikilis Jesús ijkuak yokalak tonaltsin uan amitlaj techtsakuilis. Oksekimej tokniuan noijki kilnamikiskej maski kintlajyouiltiaj noso tsaktokej. Nochtin tokniuan uan akinmej touan momachtijtokej, xiyolpakikan non tonal. Jehová, Jesús uan tlapejpenalmej tlen yikatej iluikak, kinyolpaktis ijkon tikchiuaskej.