“¡Axkan sapanoua nechpaktia nitetlapouis!”

AYAKMO ONECHPAKTI NIKTEKICHIUILIS JEHOVÁ

Pero ijkuak onikpiaya kanaj 13 xiuitl, ayakmo kuali onimouikaya iuan Jehová. Onikitak akinmej inmiuan onimomachtiaya okichiuayaj nochi tlen okinekiayaj uan ne oniknekiaya noijki ijkon nikchiuas. Onikmachiliaya tlen onechiluiaya notatajuan uan tlen kijtoua Biblia amo onechkauiliaya ma nikchiua tlen oniknekiaya uan ayakmo onechpaktiaya niktekichiuilis Jehová. Amo keman onimokuayejyeko amo kajki Jehová pero amo onikmachiliaya kox ok iuan onimouikaya.

Onitetlapouiaya pero san tepitsin, san para oksekimej ma kitakan. Maski onitetlapouiaya, amo keman onimoyektlaliaya, ik non, amo onikmatiaya tlen nikijtos. Amo onikpiaya akin oksepa niktlapouiti nion nikmachtis. Nochi non okichi ayakmo ma nechpakti nitetlapouis. Onimokuayejyekouaya: “¿Akin uelis tetlapouijtos sejse semana uan sejse metstli?”.

Ijkuak onikpiaya 17 xiuitl oniknekiaya nichantis noselti, ik non, onichantito Australia. Notatajuan omotekipachojkej pero omokuayejyekojkej ok niktekichiuiliskia Jehová.

Ompa Australia okachi ayakmo oniktekichiuili Jehová. San ualeua onimonechikouaya uan onimouikaya iuan oksekimej tlen omonechikouayaj pero mostlatika oyayaj mijtotitiuij uan otlakoniayaj. Ijkuak nimokuayejyekoua tlen onikchi, nikita maski onimonechikouaya, onechpaktiaya nikchijtinemis ken akinmej amo kitekichiuiliaj Jehová pero amo kanaj kuali onimomachiliaya.

IKAJ ONECHPALEUI

Kanaj ome xiuitl satepan, onikixmatki se tokni tlen okichi ma nimokuayejyeko tlen onikchijtoka. Onichantiaya iuan makuili tokniuan siuamej uan otikinyolejkej touan ma mokalotikan tlayekanki itech circuito uan isiua tlen omotokayotiaya Tamara. Ijkuak tokni okichiuaya seki tlamantli para tokniuan, Tamara touan omotlapouiaya uan sapanoua otiixuetskayaj. Onechtlajtlachialti Tamara okitlasojtlaya Jehová pero noijki oyolpakiaya uan kualtsin okipiaya iyelis.

Tamara okipaktiaya tlen kijtoua Biblia uan noijki tetlapouis uan oksekimej okinekiayaj noijki ijkon kichiuaskej. Oyolpakiaya kitekichiuilis Jehová pero ne amo onechpaktiaya. Onechpaleui tlen okichiuaya uan onechilnamikti itlaj miak ipati: Jehová kineki tinochtin ma tiktekichiuilikan ika pakilistli (Sal. 100:2).

OKSEPA ONECHPAKTI NITETLAPOUIS

Oniknekiaya niyolpakis ken Tamara pero omonekiaya nikpatlas nonemilis. Oniuejka kanaj eyi xiuitl uan opejki nikchiua achto seki tlamantli. Opejki nimomachtia para nitetlapouis uan ualeua onimochiuaya precursora auxiliar. Ijkon ayakmo okachi onimomojtiaya. Oniyolpakiaya porque okachi oniktekitiltiaya Biblia. Satepan miak metstli onimochi precursora auxiliar.

Opejki nimouika iuan tokniuan tlen okipiayaj tlatlamantli xiuitl, kuali omouikayaj iuan Jehová uan oyolpakiayaj okitekichiuiliayaj. Tlen okichiuayaj onechpaleui ma nimomachti uan ma nikita tlen onikchijtoka. Opejki nechpaktia nitetlapouis uan onimochi precursora regular. Sapanoua oniyolpakik uan kuali onimomachiliaya iuan tokniuan.

ONIKAJSIK AKIN IUAN NIYETOS PRECURSORA

Ijkuak opanok se xiuitl, onikixmatki Alex, ye yolkuali, kitlasojtla Jehová uan kipaktia tetlapouis. Okatka siervo ministerial uan yokipiaya chikuase xiuitl ken precursor. Noijki otetlapouito itech miakej altepemej kanin okachi omonekiaya motetlapouis ompa Malaui. Ompa okinmixmatki sekimej misioneros tlen okiyolchikajkej uan okipaleuijkej okachi ma kitekichiuili Jehová.

Itech 2003 Alex uan ne otimonamiktijkej uan san sekan okachi tiktekichiuiliaj Jehová. Yotimomachtijkej miak tlamantli uan noijki Jehová yotechteochi.

OKACHI OTECHTEOCHI JEHOVÁ

Itech 2009 otechtitlankej ken misioneros ompa Timor Oriental. Nin altepetl kajki ik Indonesia. Otimotlajtlachialtijkej ijkuak otechtitlankej, otiyolpakej pero noijki otimomojtiayaj. Ijkuak opanok makuili metstli otiajsitoj ompa Dili.

Ompa omonekiaya timomachtiskej seki tlamantli: tlen okichiuayaj, ken otlajtouayaj, tlen okikuayaj uan okseki tlamantli. Ijkuak otitetlapouiayaj, otikinmixmatiayaj akinmej amitlaj okipiayaj, akinmej amo omomachtitoj escuela uan akinmej okintlajyouiltiayaj. Noijki otikinmixmatkej akinmej omoyolkokouayaj noso omokokouayaj porque okintlajyouiltijkej noso opanok se guerra.a

¡Miakej otechkakiayaj ijkuak otitetlapouiayaj! Se tonal onikixmatki se takotsin tlen itoka María uan okipiaya 13 xiuitl. Ye sapanoua omoyolkokouaya. Yokipiaya seki xiuitl oixpoliuik inantsin uan san ualeua okitaya itajtsin. Amo okimatiaya tlen kichiuas uan miakej konemej ken ye ijkon okatkaj. Se tonal ochokak uan onechilui ken omomachiliaya. Pero amo okachi onikasijkamatki tlen onechiluiaya porque amo kuali onikmatiaya itlajtol. Ik non, onimotlatlaujti uan onikilui Jehová ma nechpaleui para nikyolchikauaskia. Oniktlajtoltili seki textos uan ijkon onikyolchika. Onikitak tlen kijtoua Biblia okipaleui ma kipatla iyelis uan ken omotlakentiaya. Satepan omoapolakti uan noijki kinmachtia oksekimej. Axkan tokniuan omochijkej ken infamilia uan sapanoua kitlasojtlaj.b

Jehová kiteochijtok tlen kichiuaj tokniuan ompa Timor Oriental. Itech majtlatli xiuitl tlen opanok yikin okachi miakej yomoapolaktijkej pero miakej yitlapaleuiaj ken precursores, siervos ministeriales uan tlayekankej. Oksekimej tlapaleuiaj kanin kintlajtolkopaj amatlajkuilolmej. Oniyolpakiaya nikinkakis tokniuan itech nechikolmej uan onechpaktiaya nikinmitas ijkuak oixuetskayaj. Onikitak ijkuak sekimej opejki okachi kitekichiuiliaj Jehová.

SAPANOUA NIYOLPAKI

Okse tlamantli otikatkaj ompa Timor Oriental, amo ken nikan Australia. Pero ijkuak ompa onikatka, sapanoua oniyolpakiaya. Ualeua otiayaj itech se autobús tsikitsin kanin oyayaj miakej tlen tiankisko okikouayaj michin tlen youaki uan okseki tlamantli. Ualeua otitlamachtiayaj tekalijtik kanin sapanoua otonaya, amo okipiayaj piso uan okinpiayaj kaxtilmej. Maski ompa otitlajyouijkej, onimokuayejyekouaya: “¡Nechpaktia nikan niyetos!”.

Ijkuak nimokuayejyekoua tlen yonikchi, nikintlasojkamatilia notatajuan porque onechmachtijkej akin Jehová uan onechpaleuijkej ijkuak onikatka niichpochtli. Onechpaleuijkej ijkon ken kijtoua Proverbios 22:6. Notatajuan yolpakij porque Alex uan ne tiktekichiuiliaj Jehová. Itech 2016 opejki titlapaleuiaj itech circuito non kiyekana Betel de Australasia.

Achto amo onechpaktiaya nitetlapouis pero axkan sapanoua nechpaktia. Yonikitak tla tiknekij tiyolpakiskej, moneki tiktekichiuiliskej Jehová ika nochi toyolo maski san tlen techpanos. 18 xiuitl yiniktekichiuilijtok Jehová iuan Alex uan sapanoua niyolpaki. Axkan nikajsikamati tlen David okilui Jehová: “Nochtin akinmej mitstemouaj para tikinmaluis yolpakiskej [...] akinmej kitlasojtlaj motoka yolpakiskej” (Sal. 5:11).