Jehová techpaleuis ma titlaxikokan

1, 2. ¿Tlen kinpanoua miakej tokniuan?

APÓSTOL Pablo okiyole Timoteo kuali ma kitekichiuili toTajtsin Dios uan okiteititi tejuan noijki ijkon moneki tikchiuaskej (2 Tim. 4:5). Tinochtin noijki timochijchikauaj tiktekichiuiliskej Jehová pero ualeua oui. Miakej tokniuan ok moneki moyolchikauaskej para amo momojtiskej ijkuak tetlapouiskej (2 Tim. 4:2). Sekimej tokniuan chantij kanin tekiuajkej amo kinkauiliaj ma tetlapouikan, ik non, ijkuak tetlapouitiuij tekiuajkej uelis kinmitaskej uan uelis kintsakuatiuij.

² Miakej tokniuan kintlajyouiltiaj miak tlamantli uan non uelis kichiuas ma mosotlauakan. Miakej tekipanouaj miak horas para kinmakaskej infamilia tlen ika mopanoltiskej. Kinekiskiaj okachi tetlapouiskej pero itlamian semana sapanoua sotlauaj. Oksekimej noijki kinekiskiaj okachi tetlapouiskej pero mokokouaj noso yikipiaj miak xiuitl. Sekimej amo uelij kisaj inkalijtik uan oksekimej nochipa mochijchikauaj para amo mokuayejyekoskej amitlaj inpati. Se tokni tlen chanti Oriente Medio uan itoka Mary,b okijto: “Nochipa nikmachilia amitlaj nopati, ijkuakon nimochijchikaua para amo ijkon nimomachilis. Satepan nikajsikamati amo omonekiaya ijkon nimokuayejyekojtos uan omonekiaya nitetlapouijtoskia”.

3. ¿Tlen timomachtiskej?

³ Maski san tlen techtlajyouiltis, Jehová techpaleuis ma titlaxikokan uan ijkon uelis tiktekichiuilijtoskej. Itech nin tlamachtil tikitaskej ken techpaleuia Jehová pero achto tikitaskej ken okipaleui Pablo uan Timoteo. Maski otlajyouijkej ok okitekichiuilijkej Jehová.

JEHOVÁ TECHYOLCHIKAUA PARA MA TITETLAPOUIKAN

4. ¿Tlen okipanok Pablo?

⁴ Pablo sapanoua otlajyoui, omonekiaya moyolchikauas ijkuak okiuitekej, okimojmotlakej uan okitsakej (2 Cor. 11:23-25). Noijki okijto omonekiaya mochijchikauas para amo mokuayejyekos amitlaj ipati (Rom. 7:18, 19, 24). Noijki okitlatlaujti toTajtsin Dios ma kipaleui porque yetoskia ken okipiaya se uitstli itech itlalnakayo (2 Cor. 12:7, 8).

5. ¿Tlen okichi Pablo maski otlajyoui?

⁵ Maski Pablo otlajyoui Jehová okipaleui uan ijkon okitekichiuili. Ma timokuayejyekokan tlen okichi Pablo. Ijkuak okitsakej itech kali kanin omokaloti, okintlapouiaya itech toTajtsin Dios tlayekankej judíos uan xamo noijki akinmej okinpaleuiayaj tekiuajkej (Hech. 28:17; Filip. 4:21, 22). Noijki okintlapoui ‘soldados non [okimaluijtokah] n palacioʼ (Hech. 28:30, 31; Filip. 1:13). Ijkuak ijkon okipanok Pablo toTajtsin Dios okitekitilti para ma kinmijkuilo cartas tlen okinpaleui tokniuan tlen ochantiayaj itech achto siglo. Noijki axkan tejuan techpaleuiaj nonmej cartas. Tlen okijkuilo apóstol Pablo okinpaleui tokniuan uan ‘omoyolchikajkeh otetlapowijkeh de itlajtol Dios iwa hasta ayakmo omomojtijkehʼ (Filip. 1:14). Maski amo ueli okachi otetlapouiaya omochijchika ijkon kichiuas uan okijto tlen okipanok okipaleui para ma kintlapoui oksekimej (Filip. 1:12).

6. ¿Tlen okipaleui apóstol Pablo kuali ma kitekichiuili Jehová ijkon ken kijtoua 2 Corintios 12:9, 10?

⁶ Pablo okimatiaya ueli otetlapouiaya porque Jehová okipaleuiaya uan okiyolchikauaya, ik non, okijto ichikaualis toTajtsin Dios “motenextia itech non amo chikawakeh” (xiktlajtolti 2 Corintios 12:9, 10). Maski okitlajyouiltijkej Pablo, Jehová okipaleui ika iespíritu santo para kuali kitekichiuiliskia.

7. ¿Tlen okipanok Timoteo uan tlen okipaleui ma kitekichiuilijto Jehová?

⁷ ToTajtsin Dios noijki okipaleui Timoteo para ma kitekichiuilijto. Ma tikitakan ken okipaleui. Ijkuak ye oyajki iuan Pablo otetlapouitoj itech okseki altepemej uan ijkuak ye okilui ma kintlajpaloti tokniuan uan ma kinyolchikaua (1 Cor. 4:17). Xamo Timoteo omokuayejyekouaya amo uelis kichiuaskia tlen okilui Pablo. Xamo, ik non, ye okilui amikaj omonekiaya kijtos amitlaj ipati (1 Tim. 4:12, TNM). Biblia kijtoua Timoteo nochipa omokokouaya, non yetoskia ken nochipa kipiaskia se uitstli itech itlalnakayo (1 Tim. 5:23). Pero Timoteo okimatiaya toTajtsin Dios uelis kipaleuiskia ika iespíritu santo, ijkon uelis tetlapouiskia uan uelis kinpaleuiskia tokniuan (2 Tim. 1:7).

JEHOVÁ TECHPALEUIA PARA NOCHIPA MA TIKTLAKAMATIKAN

8. ¿Tlen otechmakak Jehová?

⁸ Jehová techmaka ichikaualis para uelis nochipa tiktekichiuiliskej (2 Cor. 4:7). Ma tikitakan naui tlamantli tlen Jehová techmaka para ma titlaxikokan uan para nochipa ma tiktlakamatikan. Techkauilia ma tiktlatlaujtikan, otechmakak Biblia, tokniuan uan techkauilia ma titetlapouikan.

9. ¿Ken techpaleuia timotlatlaujtiskej?

⁹ Techkauilia ma tiktlatlaujtikan. Itech Efesios 6:18 Pablo okijto: “Nochipa ximotiotsajtsilijtokah”. Tla ijkon tikchiuaj, toTajtsin Dios techyolchikauas para ma titlaxikokan. Se tokni tlen itoka Jonnie uan chanti Bolivia okitak ken Jehová okipaleui ijkuak otlajyoui. Itatajuan uan isiua omokokojkej uan okitaya oui kinmaluis. Inantsin oixpoliuik, itajtsin uan isiua amo san niman opajtikej. Ye okijto: “Ijkuak onimoyolkokouaya onikiluiaya Jehová ken onimomachiliaya”. Jehová okipaleui ma tlaxiko. Noijki itech non altepetl se tlayekanki tlen itoka Ronald okimatki inantsin okipiaya cáncer, opanok se metstli uan oixpoliuik. ¿Tlen okipaleui para ma tlaxiko? Ye okijto: “Ijkuak niktlatlaujtia Jehová nikiluia nochi tlen nikmachilia uan nikmati san ye ueli nechajsikamati”. Ualeua amo tikmatij tlen tikijtoskej ijkuak timotlatlaujtiaj pero Jehová techyoleua iuan ma timotlapouikan (Rom. 8:26, 27).

10. Ijkon ken kijtoua Hebreos 4:12, ¿tleka moneki tiktlajtoltiskej Biblia uan itech timokuayejyekoskej?

¹⁰ Otechmakak Biblia. Ijkon ken Pablo tejuan noijki uelis techyolchikauas uan techyolseuis tla tiktlajtoltiaj Biblia (Rom. 15:4). Ijkuak tiktlajtoltiaj seki textos uan itech timokuayejyekouaj, Jehová uelis kitekitiltis iespíritu santo para tikajsikamatiskej ken techpaleuis itech tonemilis (xiktlajtolti Hebreos 4:12). Tokni Ronald tlen itech yotimotlapouijkej okijto: “Niyolpaki porque mojmostla niktlajtoltia Biblia, nimokuayejyekoua ken iyelis Jehová uan ken kintlasojtla itekipanojkauan uan non nechyolchikaua ma nitlaxikojto”.

11. ¿Ken okipaleui tlen kijtoua Biblia se tokni tlen otlajyouijtoka?

¹¹ Tla timokuayejyekouaj tlen kijtoua iTlajtol toTajtsin Dios, tlen techtlajyouiltia tikitaskej ken moneki. Ma tikitakan tlen okipanok se tokni tlen oixpoliuik inamik. Se tlayekanki okilui ma kitlajtolti amochtli Job porque non kipaleuiskia. Ijkuak okitlajtolti okiteneuak Job porque amo kuali omokuayejyeko. Ye okijto: ¡Tleka amo kuali tlen timokuayejyekoua Job! Ijkuakon okitak ye noijki omokuayejyekouaya ken ye. Non okipaleui ma kajsikamati omonekiaya okse tlamantli mokuayejyekos uan non okipaleui ma tlaxiko porque oixpoliuik inamik uan omoyolkokouaya.

12. ¿Ken kintekitiltia Jehová tokniuan para ma techyolchikauakan?

¹² Jehová techpaleuia ika tokniuan. Jehová noijki techyolchikaua ika tokniuan. Pablo okintlajkuilili sekimej tokniuan uan okinmilui yokinekiaya kinmitas para inmiuan moyolchikauas (Rom. 1:11, 12). Tokni Mary tlen itech yotimotlapouijkej itech párrafo ome kipaktia yetos iuan tokniuan. Ye okijto: “Jehová okintekitilti tokniuan para ma nechpaleuikan uan yejuan amo okimatiayaj tlen onechpanotoka pero onechyolchikajkej, sekimej onechtlapouijkej uan oksekimej onechtlajkuililijkej. Sekimej tokniuan onechiluijkej tlen okinpanok uan tlen okichijkej uan ijkon otlaxikojkej. Tlayekankej nechpaleuiaj ma nikita tokniuan tlen inmiuan nimonechikoua nechtlasojtlaj”.

13. ¿Ken uelis timoyolchikauaskej iuan tokniuan ijkuak timonechikouaj?

¹³ Uelis timoyolchikauaskej iuan tokniuan ijkuak timonechikouaj. Uelis tikinmiluiskej tikintlasojtlaj uan tikintlasojkamatiliaj porque tikitaj mochijchikauaj kitekichiuiliaj Jehová. Ma tikitakan tlen okichi se tlayekanki tlen itoka Peter. Se tonal ijkuak ayamo opeuaya nechikol okilui se tokni tlen inamik amo iTlaixpantijka Jehová: “Techyolchikaua nochipa touan timonechikoua iuan chikuase mokoneuan uan yejuan nochipa kuali tlanankiliaj”. Ijkuak ijkon okilui tokni, ochokak uan okilui: “Ijkon oniknekiaya ikaj ma nechyolchikaua axkan”.

14. ¿Ken techpaleuia ijkuak titetlapouiaj?

¹⁴ Ijkuak titetlapouiaj. Timoyolchikauaj ijkuak titetlapouiaj maski techkakij noso amo (Prov. 11:25). Ijkon yokitak se tokni tlen itoka Stacy. Ijkuak okikixtijkej se ifamiliar itech tlanechikol sapanoua omoyolkoko. Omokuayejyekouaya tla achto okachi kipaleuiskia amo kikixtiskiaj. San non omokuayejyekojtoka pero okse tlamantli omokuayejyeko porque nochipa otetlapoui. Omochijchika kintlapouis akinmej omonekiaya ikaj kinpaleuis. Okijto “Ijkuak ijkon onitlajyouijtoka Jehová onechkauili ma nikmachti ikaj tlen san niman opejki kitekichiuilia uan non sapanoua onechyolchika. Nikita nimoyolchikaua ijkuak nitetlapouia”.

15. ¿Tlen techmachtia tlen okijto Mary?

¹⁵ Xamo ikaj kijtos amo okachi ueli kitekichiuilia Jehová pero tikyolpaktiskej tla tiktekichiuiliaj ika nochi toyolo. Tokni tlen itoka Mary uan itech yotimotlapouijkej okijto ijkuak okitekichiuilito Jehová itech okse tlanechikol kanin tlajtouaj okse tlajtoli uan okimachiliaya amo ueli otlapaleuiaya. Okijto: “Ijkuak onimonechikouaya onitlanankiliaya itlaj tlen amo oui noso san oniktlajtoltiaya se versículo uan ijkuak onitetlapouiaya san oniktemakaya se amatsintli”. Okitak oksekimej kuali otlajtouayaj non tlajtoli pero ye amo oueliaya. Okitak omonekiaya mokuayejyekos okse tlamantli porque Jehová uelis kitekitiltiskia ma kitekichiuili maski amo kuali otlajtouaya non tlajtoli. Ye okijto: “Tlen kijtoua Biblia amo oui se kajsikamatis uan non kinpaleuia oksekimej”.

16. ¿Tlen techpaleuis ma titlaxikokan maski amo tiuelij tikisaj tokalijtik?

¹⁶ Tla tikatej tokalijtik uan amo ueli tikisaj, Jehová kipatioita ijkuak titetlapouiaj. Uelis tikintlapouiskej akinmej techmaluiaj noso tepajtijkej. Amo ma timosotlauakan tla tikatej tokalijtik uan amo ueli tikisaj. Xamo timoyolkokoskej tla tikitaj ken otitetlapouiayaj uan axkan ayakmo ijkon tikchiuaj. Pero tla tikitaj ken techpaleuijtok Jehová, non techpaleuis ma titlaxikokan maski san tlen tlajyouilistli tikpiaskej uan nochipa tiyolpakiskej.

17. Ijkon ken kijtoua Eclesiastés 11:6, ¿tleka moneki titetlapouijtoskej maski amo tikitaj ikaj san niman kitekichiuilia Jehová?

¹⁷ Tlen titetlapouiaj yetoskia ken xinachtli, amo tikmatij akin ajsis itech iyolo uan uelis kitekichiuilis Jehová (xiktlajtolti Eclesiastés 11:6). Se tokni tlen itoka Barbara uan kipia 80 xiuitl tetlapouia ika teléfono uan ika carta. Itech se sobre okitlali se revista Akin Tetlapouijtok tlen okiski 1 de marzo 2014, kipia se tlamachtil tlen itoka “¿Que ha hecho Dios por usted?”. Non carta oajsito inmak se tlakatl uan isiua tlen ayakmo okatkaj iTlaixpantijkauan Jehová. Miak uelta okitlajtoltijkej revista, tlakatl okimachili ken Jehová okitlapouijtoskia. Opejkej monechikouaj uan satepan oksepa omochijkej iTlaixpantijkauan Jehová. Opanok 27 xiuitl para ijkon kichiuaskiaj. Timokuayejyekouaj ken omomachili tokni Barbara ijkuak non opanok ¡Ijkon opanok san ika se carta!

18. ¿Tlen moneki tikchiuaskej para Jehová techpaleuis ma titlaxikokan?

¹⁸ Jehová techmaka miak tlamantli para uelis titlaxikoskej. Ma tiktekitiltikan nochi tlen yotechmakak. Techkauilia ma tiktlatlaujtikan, otechmakak Biblia, tokniuan uan techkauilia ma titetlapouikan. Tla ijkon tikchiuaj, tikteititiskej ye ueli uan kineki techpaleuis. Ma tikchiuakan tlen toTajtsin Dios kineki, ijkon ye ‘techpaleuis akinmej ixpan tikpiaj ajsitok toyolo’ (2 Crón. 16:9).