¿Tleka miakej tekokoliaj?

Axkan miakej tekokoliaj, ¿tleka ijkon kichiuaj? Moneki achto tikajsikamatiskej tlen kijtosneki ijkuak ikaj tekokolia uan tleka miakej peuaj tekokoliaj.

¿Tlen kijtosneki ijkuak ikaj tekokolia?

Ijkuak ikaj tekokolia kijtosneki sapanoua tetlauelita, amo tetlasojtla uan nochipa ijkon kichijtok.

¿TLEKA MIAKEJ PEUAJ TEKOKOLIAJ?

Miakej peuaj tekokoliaj porque kinpanoua miak tlamantli. Miakej amo kinkokoliaj porque itlaj kichiuaj, kinkokoliaj maski amitlaj kichiuaj. Xamo kinmitaj amo yolkualmej uan mokuayejyekouaj amo keman kipatlaskej tlen kichiuaj. Noso mokuayejyekouaj amitlaj inpati, mokuayejyekouaj kinchiuiliskej itlaj tlen amo kuali noso yejuan intlajtlakol tla panoua itlaj amo kuali. Miakej tekokoliaj porque okinchiuilijkej tlen amo kuali noso okintlajyouiltijkej.

¿TLEKA OKSEKIMEJ NOIJKI PEUAJ TEKOKOLIAJ?

Ualeua miakej kikokoliaj ikaj maski amo kixmatij. Xamo ikaj peuas mokuayejyekos ijkon ken akin tekokolia porque kita kitlasojtlaj uan kitlakaitaj. Ijkuak ijkon mokuayejyekouaj, miakej peuaj tekokoliaj.

Ijkuak tikajsikamatij ken san niman miakej peuaj tekokoliaj, tikajsikamatij tleka miakej ijkon kichiuaj. Para amo tikchiuaskej oksekimej ma tekokolikan, ma tikitakan akin achto opejki tekokolia. Biblia kijtoua akin ijkon okichi.

BIBLIA KIJTOUA AKIN ACHTO OPEJKI TEKOKOLIA

Nikan mota se círculo ika flechas tlen kiteititia ken peuaj tekokoliaj. 1. Miakej kijtouaj tlen amo melauak porque sekimej ijkon kinchiualtiaj, redes sociales uan tlen panoua itech noticias. 2. Amo kinmixmatij akinmej oksekan inmialtepe, akinmej ixchipajkej noso amo kimatij tlen kineltokaj. 3. Kinmojtia ijkuak itlaj mopatla, itlaj kipoloskej uan itlaj tlen amo kixmatij. 4. Tekokoliaj, ik non, techikoitaj uan tetlajyouiltiaj.

AMO OPEJKEJ ACHTO TEKOKOLIAJ AKINMEJ KATEJ TLALTIKPAK.Ompa iluikak se ángel opejki tekokolia uan okixnamik toTajtsin Dios, okitokayotijkej Satanás noso Diablo. Ijkuak okixnamik toTajtsin Dios yetoskia ken otemikti. Ye tlakajkayaua uan “teta de nochteh non tlakajkayawah”. Ik non, onka tlen amo kuali uan miakej tekokoliaj (Juan 8:44; 1 Juan 3:11, 12). Biblia kijtoua amo yolkuali, kualankamiki uan techtlajyouiltia (Job 2:7; Apocalipsis 12:9, 12, 17).

TOTATAJUAN OKICHIJKEJ MA TITEKOKOLIKAN. Adán okichi ken Satanás, ik non, tinochtin titlajtlakolejkej uan tikchiuaj tlen amo kuali (Romanos 5:12). Caín okatka ikone Adán, okikokoli ikni tlen omotokayotiaya Abel uan okimikti (1 Juan 3:12). Maski tinochtin titetlasojtlaj uan titeiknomatij, tinochtin titlajtlakolejkej. Ik non, miakej kichiuaj tlen kinekij, tenexikolitaj uan moueyinekij, non kichiua ma tekokolikan (2 Timoteo 3:1-5).

AKIN TECHIKOITA TEKOKOLIA. Miakej kichiuaj tlen amo kuali uan tetlajyouiltiaj, ik non, miakej tekokoliaj. Biblia kijtoua: “Nochteh n tlaltikpaktlakah non amo kineltokah Dios kinnawatijtok n satanás”. Ik non, miakej techikoitaj, tlauijuikaltiaj, tepinauiaj uan kijtlakouaj tlen kipiaj oksekimej (1 Juan 5:19).

Biblia amo san kijtoua akin opejki tekokolia, noijki kijtoua tlen panos satepan.