Sekimej Techtlajtlaniaj

¿Tlen kijtoua Biblia ijkuak itlaj tiksentlaliskej?

Ijkuak ikaj itlaj kisentlalia (juramento) kijtosneki melauak itlaj kichiuas uan kijtoua ixpan toTajtsin Dios. Ikaj uelis kijtos noso kijkuilos.

Sekimej mokuayejyekouaj amo uelis itlaj kisentlaliskej porque Jesús okijto: “Amitla xiksentlalikah. [...] San xikijtokah tla ‘ejéʼ [noso kema], ‘ejéʼ, noso tla ‘amóʼ, ‘amó’, porke nochi tlan amo milák nonkajxitiliskeh, walewatok itech amokualitlakatl” (Mat. 5:33-37). Jesús okimatiaya tlanauatil tlen okijkuilo Moisés, ompa okijtouaya ualeua israelitas omonekiaya itlaj kisentlaliskiaj uan noijki sekimej itekipanojkauan Jehová itlaj okisentlalijkej (Gén. 14:22, 23; Éx. 22:10, 11). Noijki okimatiaya Jehová ijkon okichi (Heb. 6:13-17). Jesús amo okijto amo keman itlaj ma tiksentlalikan. Ye okijto amo san ma tikajauilmatikan ijkuak itlaj tiksentlaliaj nion ma tikijtokan tikchiuaskej tlen amitlaj ipati. Jehová kineki nochipa ma tikchiuakan tlen tikijtouaj.

Ik non, ¿tlen tikchiuas tla mitsiluiaj itlaj xiksentlali? Achto, ximokuayejyeko tla uelis tikchiuas, tla tikita amo uelis tikchiuas, okachi kuali amo xikijto. Biblia kijtoua: “Okachi kuali amo xikijto itlaj tikchiuas tla satepan amo ijkon tikchiuas” (Ecl. 5:5). Satepan xikintemo principios tlen mitspaleuiskej tikmatis kox kuali tlen otiksentlali uan satepan xikchiua tlen yotimomachti. ¿Tlen principios mitspaleuiskej?

Seki tlamantli tlen tiksentlaliaj Jehová kinekij ijkon ma tikchiuakan. Ijkuak tokniuan monamiktiaj, kijtouaj motlasojtlaskej, momaluiskej uan motlakaitaskej. Ijkon kijtoua ixpan toTajtsin Dios uan ixpan oksekimej tokniuan. (Xamo oksekimej tlen monamiktiaj amo ijkon kijtouaj pero ixpan toTajtsin Dios noijki itlaj kisentlaliaj). Ijkuak yomonamiktijkej moneki mochijchikauaskej para nochipa san sekan ma yetokan, ijkon ken kijtoua Biblia (Gén. 2:24; 1 Cor. 7:39). Jehová kiyolpaktia tlen kijtouaj kichiuaskej akinmej monamiktiaj.

ToTajtsin Dios amo kipaktia seki tlamantli ma tiksentlalikan. Akinmej kichiuaj ken Cristo amo kisentlaliaj moteuitiuij para kipaleuiskej inmialtepe uan amo kijtouaj ayakmo kineltokaskej toTajtsin Dios. Tla ijkon kichiuaskiaj, kitlakaitaskiaj tlen toTajtsin Dios tlanauatia. Akinmej kichiuaj ken Cristo amo kichiuaj ken oksekimej, amo mokajkalakiaj ijkuak oksekimej mokualaniaj nion ijkuak moteuiaj (Juan 15:19; Is. 2:4; Sant. 1:27).

Ma tikitakan kox amo kikuejsos totlalnamikilis ijkuak itlaj tiksentlaliskej. Ualeua tokniuan moneki kuali mokuayejyekoskej tlen Jesús okijto: “Xikmakakah n César tlan iaxka n César, iwa xikmakakah Dios tlan iaxka n Dios” (Luc. 20:25).

Ma tikijtokan se tokni kineki chantiti itech okse altepetl noso kineki kipias pasaporte uan para kipias moneki itlaj kisentlalis. Pero amitlaj kisentlalis tla kixnamiki tlen kijtoua Biblia uan kikuejsos itlalnamikilis. Ik non, xamo tekiuajkej kikauiliskej ma kipatla tlen okijto.

Maski tikpatlaskej tepitsin itlaj tlen otiksentlalijkej, uelis tikchijtoskej ijkon ken kijtoua Romanos 13:1 kijtoua: “Nochteh n tlakah moneki makintlakitakah n tekiwajkeh”. Ik non, xamo se tokni uelis kijtos amo tlajtlakoli tlen kisentlalis porque toTajtsin Dios ijkon tlanauatia ma tikchiuakan.

Totlalnamikilis techiluis kox kuali noso amo ijkuak techiluiskej itlaj ma tikitskikan para itlaj tiksentlaliskej. Yiuejkika romanos uan escitas ijkuak itlaj okisentlaliayaj okikitskiayaj inmiespadas uan noijki okijtouayaj tlen okichiuaya se teotsin, non okiteititiaya melauak kichiuaskiaj tlen okijtojkej. Griegos okajkokuiayaj inma para itlaj kisentlaliskiaj porque okineltokayaj se teotsin okinmitaya, okinkakiaya uan ye kinmixkomakaskia.

Akin kitekichiuilia Jehová para itlaj kisentlalis amo kikitskia se tlamantli tlen kiueyichiua ialtepe uan itlaj kineskayotia. Pero, ¿tla kajki iuan tekiuajkej uan kiluiaj ma kitlali ima ipan Biblia para ma kiteititi kichiuas tlen okijto? Xamo uelis kipejpenas ijkon kichiuas porque yiuejkika itekipanojkauan Jehová ika itlaj okiteititijkej ijkuak itlaj okisentlalijkej (Gén. 24: 2, 3, 9; 47:29-31). Tla ijkon tikpejpenaj tikchiuaskej, ma tikilnamikikan tikiluijtokej Jehová tlen tikchiuaskej. Ik non, ijkuak itlaj techtlajtlaniskej ma tikijtokan tlen melauak.

Tinochtin tiknekij kuali timouikaskej iuan Jehová, ik non, tla itlaj tiksentlaliskej, achto ma timotlatlaujtikan uan kuali ma timokuayejyekokan tlen tikijtoskej. Tiknekij tiktlakamatiskej tlen kijtoua Biblia uan tiknekij tikitaskej kox amo kikuejsos totlalnamikilis. Tla itlaj tiksentlaliaj, ma tikchiuakan tlen otikijtojkej (1 Ped. 2:12).