Sekimej techtlajtlaniaj
¿Tlen kijtosneki ijkuak Jesús okijto “amo xikmolikah Ne onikwalík yolsewílistli”?
Jesús otlamachti moneki kuali timouikaskej iuan oksekimej. Pero se tonal okinmilui imachtijkauan: “Amo xikmolikah Ne onikwalík yolsewílistli. Amó, yej Ne onikwalík tlanetéwili. Ne oniwala para n tepiltsi kixnamikis ita, n teichpoch kixnamikis ina, iwa n montli kixnamikis imona” (Mat. 10:34, 35). ¿Tlen okinekiaya kijtos Jesús?
Jesús amo okinekiaya kinxelos familias pero okimatiaya sekimej ijkon kinpanoskia. Akinmej kinekij mochiuaskej imachtijkauan uan moapolaktiskej, moneki kimatiskej xamo infamilia amo kinpaktis. Xamo ikaj kitas oui kichiuas ken Cristo tla inamik noso isiua noso okse ifamiliar kualani.
Biblia kinmiluia nochtin akinmej kichiuaj ken Cristo moneki ‘moyekwikaskeh ika yolsewílistli iwan nochtehʼ (Rom. 12:18). Pero sekimej familias xamo kitaj ken se espada tlen otlamachti Jesús. Ijkon panoua ijkuak ika kiselia tlen ye otlamachti uan ifamilia amo kipaktia mamomachti uan xamo hasta kualani. Ifamilia mochiua ‘ikokolikniwahʼ porque momachtia Biblia (Mat. 10:36).
Imachtijkauan Jesús tlen chantij iuan infamiliares tlen kipiaj okse religión ualeua kixnamikij seki tlamantli uan moneki kiteititiskej okachi kitlasojtlaj Jehová uan Jesús. Xamo kinmiluiaj mailuichiuakan ijkon ken yejuan kinmachtiaj itech inreligión. Ijkuakon tokniuan moneki kiteititiskej akin moneki kiyolpaktiskej. Jesús okijto: “Akin kitlasojtla ita noso ina okachi ke Ne, amo makimoli nika íwa” (Mat. 10:37). Jesús amo okijto amo moneki matikintlasojtlakan totatajuan. Ye okiteititi tlen okachi moneki tikpatioitaskej. Tla se tofamiliar amo techkauilia matiktekichiuilikan Jehová, ok tiktlasojtlaj pero tikajsikamatij okachi moneki tiktlasojtlaskej Jehová.
Sapanoua techyolkokoua ijkuak se tofamiliar amo techkauilia matiktekichiuilikan Jehová. Pero tikilnamikij tlen okijto Jesús: “Akin amo kinekis kiselis tlaijyowílistli itech inemilis iwa amo kinekis nowan yas, [amo] keman yetos noaxka” (Mat. 10:38). Ik non, tla tiknekij tikchiuaskej ken Jesús, matikmatokan titlajyouiskej uan xamo tofamilia amo techkauilis matiktekichiuilikan Jehová. Ijkuak kitaskej tikchiuaj tlen kuali xamo okse tlamantli mokuayejyekoskej uan kinekiskej momachtiskej tlen kijtoua Biblia (1 Ped. 3:1, 2).