Telpochtli uan ichpochtli tla yotimoapolakti okachi xiktekichiuili Jehová

1. ¿Tlen yokipejpenkej kichiuaskej miakej telpochmej?

SEJSE xiuitl miakej tokniuan telpochmej moapolaktiaj. ¿Yikin otimoapolakti? Jehová uan tokniuan sapanoua yolpakij, tla ijkon yotikchi (Prov. 27:11). Ximokuayejyeko nochi tlen yotikchi. Xamo miak xiuitl timomachtijtok Biblia uan tikneltoka melauak iTlajtol toTajtsin Dios, axkan tikixmati uan tiktlasojtla akin iaxka tlen ijkuilitok itech Biblia. Sapanoua tiktlasojtla Jehová, ik non, otikpejpenki ixpan timotemakas uan otimoapolakti. ¡Tiyolpakij porque kuali tlen otikpejpenki!

2. ¿Tlen tikitaskej?

² Xamo ijkuak ayamo otimoapolaktiaya otitlajyoui. Pero satepan xamo okachi titlajyouis. Satanás kitemos ayakmo ximouika iuan Jehová uan ayakmo xiktekichiuili (Efes. 4:14). Amo xikkauili mamitstlanili. ¿Tlen mitspaleuis nochipa xiktekichiuili Jehová uan xikchiua tlen otikijto ijkuak otimoapolakti? Moneki ‘timoskaltis itech motlaneltokalis’ (Heb. 6:1). Axkan tikitaskej ken uelis tikchiuas.

¿TLEN UELIS TIKCHIUAS PARA OKACHI KUALI TIMOUIKAS IUAN JEHOVÁ?

3. ¿Tlen moneki kichiuaskej nochtin tokniuan ijkuak yomoapolaktijkej?

³ Ijkuak ikaj moapolaktia moneki kichiuas tlen apóstol Pablo okinmilui tokniuan tlen ochantiayaj Éfeso. Ye okinyole “noiwa matimoyekchikawakah kemi se tlakatl yekmilajka, ijkó timoskaltiskeh iwa timotlamitiweh kemi Cristo” (Efes. 4:13). Yetoskia ken okinmilui ‘mamoskaltikan’. Pablo okijto matimoskaltikan ijkon ken moskaltia se chokotsin. Ijkuak ikaj ok konetl kiyolpaktia itatajuan uan kitlasojtlaj pero amo nochipa yetos konetl, porque satepan moneki kikauas tlen okichiuaya ‘ijkuak okatka chokotsi’ (1 Cor. 13:11). Noijki tejuan, ijkuak timoapolaktiaj moneki ok itlaj tikchiuaskej. Matikitakan seki tlamantli tlen techpaleuis.

4. ¿Tlen mitspaleuis okachi xiktlasojtla Jehová? (Filipenses 1:9).

⁴ Okachi xiktlasojtla Jehová. Maski yitiktlasojtla Jehová uelis okachi tiktlasojtlas. ¿Tlen mitspaleuis? Apóstol Pablo okijto ken uelis ijkon tikchiuaskej itech Filipenses 1:9 (xiktlajtolti). Apóstol Pablo okitlajtlanili Jehová makinpaleui tokniuan tlen ochantiayaj Filipos makipiakan “okachi miak tlasojtlálistli”. Non kijtosneki uelis okachi tiktlasojtlaskej toTajtsin Dios. Techpaleuis tla ‘tikpiah okachi ixtlamatílistli iwa tlalnamikílistli’, ijkuak okachi tikixmatij Jehová okachi tiktlasojtlaj uan techpaktia nochi tlen kichiua. Tiknekij tikyolpaktiskej uan amo tikyolkokoskej. Timochijchikauaj para tikmatiskej uan tikchiuaskej tlen ye kineki.

5, 6. ¿Tlen noijki mitspaleuis okachi xiktlasojtla Jehová?

⁵ Tla okachi tikixmatij Jesús techpaleuis okachi matiktlasojtlakan Jehová porque ye okichi ijkon ken iTajtsin (Heb. 1:3). Uelis okachi tikixmatiskej Jesús tla timomachtiaj naui Evangelios. ¿Mojmostla tiktlajtoltia Biblia? Tla amo ijkon tikchiua, uelis axkan tipeuas. Ijkuak tiktlajtoltis xikita tlen okijto uan tlen okichiuaya Jesús, ye okipaktiaya yetos inmiuan oksekimej hasta konemej okinmonapaloltiaya (Mar. 10:13-16). Noijki imachtijkauan okinpaktiaya iuan yetoskej uan okiluiayaj tlen omokuayejyekouayaj (Mat. 16:22). Jesús okichi ijkon ken iTajtsin, ye kineki iuan matimotlapouikan. Ik non, uelis tikiluiskej nochi tlen tikpiaj itech toyolo. Kuali tikmatij ye techkakis porque techtlasojtla uan kitekipachoua tlen techpanoua (1 Ped. 5:7).

⁶ Jesús okinmiknomatiaya oksekimej. Apóstol Mateo okijto: “Ijkuak Jesús okimitak n tlakah, okimiknoma ken sa tlawel osotlawatokah iwa oyetokah inselti kemi ichkameh non amo kipiah tlajpixki non kinyakanas” (Mat. 9:36). ¿Ken kinmita Jehová sekimej? Jesús okijto iTajtsin “amo kineki mapoliwi nion se de ninteh pípilteh” (Mat. 18:14). ¡Sapanoua tiyolpakij porque tikmatij Jehová sapanoua techtlasojtla! Tla okachi tikixmatij Jesús, okachi tiktlasojtlaskej Jehová.

7. ¿Ken mitspaleuis tla timouika inmiuan tokniuan tlen kuali mouikaj iuan Jehová?

⁷ Kox onka okseki tlamantli tlen mitspaleuis okachi xiktlasojtla Jehová uan xiktekichiuili. ¿Tlen mitspaleuis? Ximouika inmiuan tokniuan tlen kuali mouikaj iuan Jehová. Tikitas nonmej tokniuan nochipa yolpakij porque okipejpenkej kitekichiuiliskej Jehová. Xikinmilui mamitsiluikan tlen yokinpanok uan ijkuak tikpejpenas itlaj tikchiuas uelis inmiuan timotlapouis uan yejuan mitspaleuiskej. Biblia kiteititia nochi kuali kisa ijkuak ikaj techiluia tlen uelis tikchiuaskej (Prov. 11:14).

8. ¿Tlen uelis tikchiuas tla ayakmo tikneltoka tlen tlamachtia Biblia?

⁸ Ximomachti tleka tikneltoka seki tlamantli. Ken otikitakej itech párrafo ome, Satanás kitemos ayakmo ximouika iuan Jehová uan ayakmo xikneltoka tlen kijtoua Biblia. Xamo tikkakis miakej kineltokaj evolución, amo melauak tlen kijtouaj porque Jehová otlachijchi. Xamo achto amo ijkon otimokuayejyekouaya pero ken yititelpochtli xamo ijkon mitsmachtiaj. Xamo tikneltoka tlen kijtouaj pero xikilnamiki yejuan amo kitaj nochi tlen onka kiteititia ikaj otlachijchi. Xikilnamiki tlen kijtoua Proverbios 18:17: “Akin achto kijtoua tlen opanok kineltokiliaj, pero satepan uits okse uan kitlajtlania tlen melauak opanok”. ¿Tlen techmachtia non texto? Amo xikneltoka nochi tlen mitsmachtiaj. Moneki ximomachti Biblia uan amatlajkuilolmej. Ximotlapoui inmiuan tokniuan tlen okineltokayaj evolución uan xikintlajtlani tlen okinpaleui makineltokakan onka akin techtlasojtla uan okichijchi nochi tlamantli. Tla ijkon tikchiua, mitspaleuis ximokuayejyeko tleka tikneltoka seki tlamantli.

9. ¿Tlen mitsmachtia tlen okipanok Melissa?

⁹ Se tokni tlen itoka Melissa okipaleui momachtis onka akin otlachijchi.b Ye okijto: “Akinmej techmachtiaj evolución mokaki melauak tlen kijtouaj. Onimomojtiaya nimomachtis tleka nikneltoka seki tlamantli. Onikijtouaya xamo ayakmo nitlaneltokas tla nimomachtiskia pero onimokuayejyeko Jehová amo kineki matiktekichiuilikan porque ijkon otechmachtijkej, ik non, okachi onimomachti. Oniktlajtolti amochtli ¿Existe un Creador que se interese por nosotros? Uan amatlajkuilolmej Obra de un Creador uan El origen de la vida. Cinco cuestiones dignas de análisis. Non sapanoua onechpaleui. Nimokuayejyekoua tleka ayamo ijkon onimomachtijtoka”.

10, 11. ¿Tlen mitspaleuis para amo titlajtlakolchiuas? (1 Tesalonicenses 4:3, 4).

¹⁰ Amo xikchiua tlen amo kuali. Telpochmej uan ichpochmej sapanoua kinekij ikaj iuan motekaskej uan xamo mitsiluiskej xiauilnemi. Satanás kineki xikchiua tlen mitsyoltilana. ¿Tlen mitspaleuis para amo titlajtlakolchiuas? (xiktlajtolti 1 Tesalonicenses 4:3, 4). Ijkuak tiktlatlaujtia Jehová xikilui ken timomachilia uan xikilui mamitspaleui (Mat. 6:13). Xikilnamiki Jehová kineki mitspaleuis uan amo san kita tlen amo kuali tikchiua (Sal. 103:13, 14). Biblia noijki mitspaleuis. Ijkon okipanok Melissa tlen otimomachtijkej itech párrafo 9, ye omokuayejyekouaya tlen amo kuali. Ye okijto: “Onechpaleui opejki mojmostla niktlajtoltia Biblia para ayakmo ijkon nimokuayejyekos. Ken nonemilis iaxka Jehová, nikneki ye nouan mayeto nochipa” (Sal. 119:9).

¹¹ Amo moselti tika, xikinmilui motatajuan tlen mitspanotok. Xamo oui tikinmiluis seki tlamantli pero mitspaleuis tla ijkon tikchiuas. Melissa okijto: “Oniktlatlaujti Jehová manechpaleui para amo manimomojti uan satepan onikilui notajtsin tlen onechpanotoka. Kuali onimomachili, onikmatiaya Jehová okiyolpaktiaya tlen onikchiuaya”.

12. ¿Tlen mitspaleuis kuali xikpejpena tlen tikchiuas?

¹² Ximoyekana ika principios bíblicos. Satepan moselti tikpejpenas tlen tikneki tikchiuas pero axkan ayamo tikmati tlen tikchiuas itech monemilis. ¿Tlen mitspaleuis amo xitlajtlakolchiua uan ijkon ayakmo timouikas iuan Jehová? (Prov. 22:3). Se tokni tlen itoka Kari kilnamiki tlen okipaleui para kuali kipejpenas tlen kichiuas. Ye okitak tokniuan tlen kuali mouikaj iuan Jehová amo moneki kipiaskej se tlanauatil tlen nochipa makijto tlen moneki kichiuaskej. Kari okijto: “Amo san omonekiaya nikchiuas tlen kijtoua tlanauatil, omonekiaya nikajsikamatis ken kita Jehová seki tlamantli”. Ijkuak tiktlajtoltis Biblia, ximotlajtlani: “¿Ken mokuayejyekoua Jehová? ¿Onka se principio tlen nechpaleuis manikchiua tlen kuali? ¿Ken nechpaleuis tla ijkon nikchiua?” (Sal. 19:7; Is. 48:17, 18). Tla tiktlajtoltia Biblia uan timokuayejyekoua principios tlen tikinmajsij, okachi kuali tikpejpenas tlen tikchiuas uan tikyolpaktis Jehová. Ijkuak okachi kuali tikajsikamatis ken mokuayejyekoua Jehová, amo moneki tikpias nochipa se tlanauatil kanin makijto tlen moneki tikchiuas. Ijkon tikteititis kuali timouika iuan Jehová.

13. ¿Ken uelis mitspaleuiskej akinmej inmiuan timouika? (Proverbios 13:20).

¹³ Ximouika inmiuan akinmej kitlasojtlaj Jehová. Ijkon ken otimomachtijkej itech párrafo 7, tla kuali tikinpejpena akinmej inmiuan timouikas mitspaleuiskej ximouika iuan Jehová (xiktlajtolti Proverbios 13:20). Xikita tlen okipanok tokni Sara, ye ayakmo oyolpakiaya kitekichiuilis Jehová pero itlaj okipaleui. Sara okijto: “Onikinmajsik akinmej inmiuan nimouikas ijkuak okachi omonekiaya. Sejse semanas onimomachtiaya iuan okse tokni revista Akin Tetlapouijtok uan okse noyolikni onechyole manitlanankili ijkuak timonechikouaj. Noyolikniuan onechpaleuijkej okachi manimomachti uan manimotlatlaujti. Yolik okachi opejki nimouika iuan Jehová uan oksepa opejki niyolpaki”.

14. ¿Tlen okichi tokni Julien para mouikas inmiuan oksekimej tokniuan?

¹⁴ ¿Tlen uelis tikchiuas para timouikas inmiuan oksekimej? Se tokni tlen itoka Julien uan axkan tlayekanki okijto: “Ijkuak onikatka nitelpochtli onimouikaya inmiuan akinmej onitetlapouiaya. Yejuan oyolpakiayaj uan onechpaleuijkej noijki maniyolpaki. Onimokuayejyeko okachi niktekichiuilis Jehová. Noijki san onimouikaya inmiuan telpochmej, omonekiaya nimouikas inmiuan oksekimej tokniuan. Ijkuak oniajsito Betel opejki kuali nimouika inmiuan oksekimej. Yejuan onechpaleuijkej kuali manikpejpena tlen ika nimoyolpaktis uan non okachi onechpaleui manimouika iuan Jehová”.

15. ¿Tlen okilui Pablo amo makichiua Timoteo? (2 Timoteo 2:20-22).

¹⁵ ¿Tlen tikchiuas tla timouika iuan se tokni tlen kichiua tlen amo kuali? Apóstol Pablo okimatiaya sekimej tokniuan itech achto siglo amo kuali omouikayaj iuan Jehová, ik non, okilui Timoteo amo inmiuan mamouika (xiktlajtolti 2 Timoteo 2:20-22). Timochijchikauaj timouikaskej iuan Jehová uan tikpatioitaj. Ik non, amikaj matikauilikan makichiua ayakmo matiktekichiuilikan (Sal. 26:4).

XIMOKUAYEJYEKO TLEN OKACHI UELIS TIKCHIUAS PARA TIKTEKICHIUILIS JEHOVÁ

16. ¿Tlen uelis tikchiuas para okachi tiktekichiuilis Jehová?

¹⁶ Ximokuayejyeko ken okachi tiktekichiuilis Jehová. ¿Tlen uelis tikchiuas? Xikchiua ken Cristo uan ximouika iuan Jehová (Efes. 3:16). Mojmostla xiktlajtolti Biblia uan moselti ximomachti (Sal. 1:2, 3). Mojmostla xiktlatlaujti Jehová ika nochi moyolo. Xamo moneki kuali tikpejpenas tlen ika timoyolpaktis uan amo san ximotonalpolo (Efes. 5:15, 16). Jehová sapanoua yolpakis tla timochijchikaua okachi kuali iuan timouikas.

17. ¿Tleka okachi tiyolpakis tla tikinpaleuia oksekimej tokniuan?

¹⁷ Ijkuak tikinpaleuia oksekimej tokniuan, okachi tikchiua ken Cristo. Jesús okijto: “Okachi yolpaki akin itlaj kitemaka uan amo ijkuak itlaj kiselia” (Hech. 20:35, TNM). Tiyolpakis tla timochijchikaua tikinpaleuia oksekimej tokniuan. ¿Ken uelis tikchiuas? Uelis tikinpaleuis tokniuan tlen inmiuan timonechikouaj tlen yikipiaj miak xiuitl noso mokokouaj, uelis tikintlakouitij noso tikinpaleuis makalakikan itech incomputadoras, incelulares, tabletas noso okseki tlamantli. Tla titelpochtli uan yotimoapolakti, ximochijchikaua para titlapaleuis ken siervo ministerial (Filip. 2:4). Noijki tikteititis tikintlasojtlaj oksekimej tla tikintlapouiaj tlen kichiuas iTekiuajkayo toTajtsin Dios (Mat. 9:36, 37). Uan tla tiuelis ximochijchikaua okachi xiktekichiuili Jehová.

18. ¿Ken mitspaleuis tla timochijchikaua okachi tiktekichiuilis Jehová?

¹⁸ Tla timochijchikaua okachi tiktekichiuilis Jehová, mitspaleuis xikchiua okseki tlamantli. Tla timochiuas precursor uelis tias Tlamachtil para ma tetlapouikan Tekiuajkayotl, Betel noso kanin kinchijchiuaj kalmej para timonechikoskej. Se precursora tlen itoka Kaitlyn okijto: “Ijkuak onimoapolakti uan opejki nitetlapouia inmiuan tokniuan tlen okachi okitekichiuiliayaj Jehová onechpaleui okachi iuan manimouika. Tlen okichiuayaj onechyolini okachi manimomachti Biblia uan kuali manitlamachti”.

19. ¿Tlen tikselis tla okachi tiktekichiuilia Jehová?

¹⁹ Tla timochijchikaua okachi tiktekichiuilis Jehová, ye mitsteochiuas. Ijkuak ok titelpochtli kuali xikpejpena tlen tikchiuas (1 Juan 2:17). Amo titlajyouis porque kuali otikpejpenki, tiyolpakis uan kuali tiyetos (Prov. 16:3). Tlen tikchiuas kinyolchikauas tokniuan telpochmej uan tlen yikipiaj miak xiuitl (1 Tim. 4:12). Ken timouika iuan Jehová uan mitsselia timoyolseuijtos uan tiyolpakis (Prov. 23:15, 16).