Tikchiuaskej tlen kuali: Matikpejpenakan tlen tikchiuaskej
Tlen tikpejpenaskej tikchiuaskej uelis techpaleuis matiyolpakikan noso matitlajyouikan. Ikinon Jehová kineki matiktlakamatikan porque ye kimati tlen okachi kuali techpaleuis.
Jehová kineki matiyolpakikan uan matimoyolseuikan.
“Ne Jehová nimoDios, ne akin nimitsmachtia para kuali xiyeto, akin kichiua xinejnemi itech ojtli kanin moneki tias. ¡Oh, tla melauak tikinkakis notlanauatiluan! Moyolseuilis yetos ken se aueyatl uan momelajkayo ken olas tlen kipia ueyi atl” (Isaías 48:17, 18).
San Jehová kimati tlen okachi kuali tikchiuaskej porque ye otechchijchi. Ye kineki matiktlakamatikan porque kimati ijkon kuali tiyetoskej uan tiyolpakiskej. Ijkon kuali tikpejpenaskej tlen tikchiuaskej, tiyolpakiskej uan timoyolseuiskej.
Jehová amo technauatia matikchiuakan itlaj sapanoua oui.
“Nin tlanauatil tlen axkan nimitsmakatok amo sapanoua oui, uelis tikchiuas” (Deuteronomio 30:11).
Jehová amo technauatia matikchiuakan itlaj sapanoua oui. Pero tla tiknekij tiktlakamatiskej moneki tikpatlaskej ken timokuayejyekouaj uan tlen tikchiuaj. Ye otechchijchi ikinon kimati uelis ijkon tikchiuaskej. Ijkuak okachi tikixmatij Jehová amo tikitaj oui tikchiuaskej “tlen technauatia” (1 Juan 5:3).
Jehová yokijto kinpaleuis akinmej kinekij kitlakamatiskej.
“Ne, Jehová nimoDios, nikkitskijtok moyekma, Akin mitsiluia: ‘Amo ximomojti. Ne nimitspaleuis’” (Isaías 41:13).
Jehová techpaleuia matikchiuakan tlen ye technauatia. Ye techpaleuia ika iTlajtol, techyolchikaua uan techpaleuia matikchiakan tlen satepan kichiuas.
Miakej yokitakej ken yokinpaleui tlen kijtoua Biblia. ¿Noijki tikneki mamitspaleui tlen kijtoua Biblia? ¿Tikneki okachi tikmatis? Xikalaki itech jw.org uan ximomachti amatlajkuilol Tiyoltos uan tiyolpakis uan amitlaj tiktlaxtlauas. Ompa tikajsis nin eyi tlamachtil:
¿Ken uelis mitspaleuis tlen kijtoua Biblia?
Biblia techyolchikaua
¿Uelis tikneltokaskej tlen kijtoua Biblia?
Ijkuak okachi timomachtis Biblia tikitas maski yiuejkika omoijkuilo uelis nochipa techpaleuis (Salmo 111:8). Okachi kuali tiyetoskej tla tikchiuaskej tlen kijtoua Biblia. ToTajtsin Dios amo technauatia moneki tiktlakamatiskej (Deuteronomio 30:19, 20; Josué 24:15). Ye techkauilia matikpejpenakan kox tiktlakamatiskej noso amo.