¿Uelis tiyolpakiskej axkan ijkuak tikchiaj Jehová matlayektlali?

Jehová kineki matimochiakan uan matikchixtokan maajsi tonal ijkuak ye tlayektlalis. ¿Tleka Jehová kineki ijkon matikchiuakan? Uan ¿tlen techpaleuis amo matimoyolkokokan nion amo matimosotlauakan?

JEHOVÁ KINEKI MATIMOCHIAKAN

Biblia kijtoua: “Pero Jehová kichixtok namechpaleuis uan kiteititis namechiknomati. Porque Jehová ye se Dios tlen nochi kichiua ika melajkayotl uan yolpakij akinmej kichixtokej” (Is. 30:18). Isaías ijkon okinmilui judíos tlen okatkaj yoltlakuauakej (Is. 30:1). Pero ijkuakon noijki okatkaj judíos tlen otetlakamatiayaj. Nonmej tlajtolmej sapanoua okinyolchika uan axkan tejuan noijki techyolchikaua.

Pero ¿tleka miak ipati matimochiakan? Porque Jehová noijki mochixtok. Jehová yokitlali tlen tonal uan tlen hora kipojpolos nochi tlen amo kuali. Pero kichixtok ijkon kichiuas (Mat. 24:36). Ijkuakon motas Satanás san tlakajkayaua ijkuak okijto amo melauak tlen kichiua Jehová uan akinmej kitekichiuiliaj. Jehová kipojpolos Satanás uan nochtin akinmej kipaleuiaj. Pero yokijto ‘kinmiknomatis’ akinmej kitekichiuiliaj.

Xamo axkan Jehová amo kipojpolos nochi tlen techtlajyouiltia pero techiluia uelis tiyolpakiskej. Isaías okijto uelis tiyolpakiskej tla tikchiaj Jehová matlayektlali (Is. 30:18). ¿Tlen techpaleuis? Matikitakan naui tlamantli.

¿KEN UELIS TIYOLPAKISKEJ IJKUAK TIMOCHIAJ?

Matikitakan tlen kuali techpanoua. Ijkuak David okatka okinmitaya miakej okichiuayaj tlen amo kuali (Sal. 37:35). Pero ye okijkuilo: “Amitlaj xikijto ixpan Jehová uan ximochia. Amo mamitskualanikan oksekimej nion tlen mokuayejyekouaj kichiuaskej akinmej amo yolkualmej” (Sal. 37:7). ¿Ken okichi David? David okilnamiktoka Jehová kimakixtiskia. Noijki okipatioitak ken Jehová okipaleui (Sal. 40:5). Tejuan amo timosotlauaskej tla tikitaj nochi tlen yotechmakak Jehová. Non techpaleuis matikchiakan Jehová matlayektlali.

Nochipa matikueyichiuakan Jehová. Xamo David okijkuilo Salmo 71 kanin okilui Jehová: “Pero ne ok nimochixtos uan mojmostla okachi nimitsueyichiuas” (Sal. 71:14). ¿Ken okiueyichiuaya Jehová? Ye okintlapouiaya oksekimej akin Jehová uan noijki okitlakuikiliaya (Sal. 71:​16, 23). Tejuan noijki uelis ijkon tikchiuaskej uan tikueyichiuaskej toTajtsin Dios. Uelis ijkon tikueyichiuaskej Jehová uan tikijtoskej akin ye ijkuak tikintlapouiaj toyolikniuan, tofamiliares uan noijki ijkuak tiktlakuikiliaj. Ikinon ijkuak titlakuikaskej kuali matikkakikan tlen kijtoua tlakuikali uan ken techyolchikaua. Tla ijkon tikchiuaskej tiyolpaktoskej uan tikmatiskej timochiaskej.

Matimajxilikan tiyetoskej inuan tokniuan. Ijkuak David otlajyouijtoka okilui Jehová: “Inmixpan akinmej amo mitskauaj nimochias itech motoka” (Sal. 52:9). David okipaktiaya yetos inuan itekipanojkauan Jehová uan non okiyolchika. Tejuan noijki uelis tiyetoskej inuan tokniuan ijkuak timonechikouaj, ijkuak titetlapouiaj noso ijkuak tikchiuaj okseki tlamantli (Rom. 1:​11, 12).

Okachi matikneltokakan tlen tikchiaj tikseliskej. Salmo 62:5 kijtoua: “San ichtaka nikchia toTajtsin Dios porque nikmati ye nechpaleuis”. Miak ipati matikneltokakan melauak tikseliskej tlen tikchiaj. Okachi ipati ijkon matikchiuakan tla tikitaj ok uejkauas tlamis tlen amo kuali. Uelis uejkika timochiaskej pero moneki tikneltokaskej Jehová kichiuas tlen yokijto. ¿Tlen techpaleuis okachi matitlaneltokakan? Matimomachtikan tlen kijtoua Biblia, matikinmitakan profecías, matikitakan ken mouika nochi tlen ompa ijkuilitok uan ken techpaleuia okachi matikixmatikan Jehová (Sal. 1:​2, 3). Noijki matiktlatlaujtikan Jehová matechmaka iespíritu santo para kuali iuan matimouikakan uan matimochiakan matechmaka yolilistli tlen amo keman tlamis (Jud. 20, 21).

Matitlaneltokakan ijkon ken David okichi porque Jehová kinmita akinmej kimatij mochiaskej uan ye nochipa kintlasojtlas (Sal. 33:​18, 22). Ikinon tla tiknekij tiyolpakiskej ijkuak tikchiaj Jehová matlayektlali, matikitakan tlen kuali techpanoua, nochipa matikueyichiuakan Jehová, matimajxilikan tiyetoskej inuan tokniuan uan okachi matikneltokakan tikseliskej tlen tikchiaj.