Okachi matikneltokakan ialtepe Jehová

1. ¿Ken okinyekanayaj tokniuan achto siglo?

JEHOVÁ kineki kuali makichiuakan tlen kinnauatia itekipanojkauan (1 Cor. 14:33). Matikitakan tleka ijkon tikijtouaj. Jehová kineki matitetlapouikan kuali tlajtoli ipan nochi tlaltikpak (Mat. 24:14). Ikinon okitlali Jesús makiyekana non tekitl uan ye kita nochi kuali mamochiua. Achto siglo okatkaj apóstoles ompa Jerusalén uan tlayekankej okipejpenayaj tlen kichiuaskej uan satepan okinmatiltiayaj akinmej omonechikouayaj (Hech. 15:2; 16:4). Noijki okintlalijkej tlayekankej itech tlanechikolmej para makinmiluikan tokniuan tlen okijtouayaj apóstoles uan tlayekankej (Hech. 14:23). Tokniuan otetlakamatiayaj ikinon akinmej “omonechikouayaj okachi otlaneltokayaj uan sejse tonal omomiaktiliayaj” (Hech. 16:5).

2. ¿Ken kiyekana ialtepe Jehová uan ken techmaka tlen ika momachtiskej desde 1919?

² Axkan Jehová ok kiluia ialtepe ken mochiuas seki tlamantli. 1919 Jesús opejki kinyekana sekimej tlapejpenalmej para makitakan ken moneki titetlapouiskej uan matechmakakan tlen ika momachtiskej (Luc. 12:42).a Jehová kiteochiua nochi tlen yejuan kichijtokej (Is. 60:22; 65:​13, 14).

3, 4. (1) Xikyekijto ken techpaleuia ijkuak techiluiaj ken moneki tikchiuaskej seki tlamantli. (2) ¿Tlen timomachtiskej?

³ Amo uelis tikchiuaskiaj tlen Jesús otechnauati tla amikaj techiluiskia tlen moneki tikchiuaskej (Mat. 28:​19, 20). San kanin titetlapouiskiaj tla amikaj techyekanaskia. Xamo miak uelta titetlapouiskiaj san kanin tiknekiskiaj pero amo keman titetlapouiskiaj kanin ok poliui. ¿Ken techpaleuia ijkuak techiluiaj ken moneki tikchiuaskej seki tlamantli?

⁴ Axkan noijki Jesús kiluia ialtepe toTajtsin Dios ken moneki kichiuas seki tlamantli. Kichiua ijkon ken ijkuak okatka nikan tlaltikpak. Axkan timomachtiskej tlen okichi Jesús uan tikitaskej ialtepe Jehová noijki ijkon kichiua. Noijki tikitaskej tlen moneki tikchiuaskej tla tiknekij tikteititiskej tikneltokaj Jehová kiyekana ialtepe.

IALTEPE JEHOVÁ KICHIUA IJKON KEN JESÚS OKICHI

5. ¿Ken kichiua ialtepe Jehová ijkon ken Jesús okichi? (Juan 8:28).

⁵ Jesús kichiua ijkon ken iTajtsin okimachti uan noijki ijkuak kijtoua ken mochiuas seki tlamantli. Ialtepe Jehová kichiua ijkon ken Jesús okichi, techyekana uan techmachtia ika iTlajtol toTajtsin Dios (xiktlajtolti Juan 8:28; 2 Tim. 3:​16, 17). Noijki nochipa techilnamiktia matiktlajtoltikan Biblia uan matikchiuakan tlen timomachtiaj. ¿Ken techpaleuis tla ijkon tikchiuaskej?

6. ¿Ken techpaleuia ijkuak timomachtiaj Biblia?

⁶ Sapanoua techpaleuiaj amatlajkuilolmej ijkuak timomachtiaj Biblia. Ijkon tikitaj ken mouika tlen techmachtia Biblia iuan tlen technauatia ialtepe Jehová. Non techpaleuia okachi matikneltokakan tlen techiluia ialtepe Jehová (Rom. 12:2).

7. ¿Tlen okitematilti Jesús uan tlen tikchiuaj akinmej tipouij itech ialtepe Jehová?

⁷ Jesús okitematilti “kuali tlajtoli tlen kijtoua toTajtsin Dios ualtlanauatis ipan tlaltikpak” (Luc. 4:​43, 44). Noijki okinnauati idiscípulos matetlapouikan (Luc. 9:​1, 2; 10:​8, 9). Axkan tinochtin tlen tipouij itech ialtepe Jehová titetlapouiaj maski san kanin tichantij noso maski tikpiaj miak tekitl.

8. ¿Tlen tikpatioitaj tikchiuaskej?

⁸ Tikpatioitaj tikinmatiltiskej oksekimej tlen kichiuas iTekiuajkayo toTajtsin Dios. Pero amo nochtin uelis ijkon kichiuaskej. Matikitakan tleka ijkon tikijtouaj. Jesús amo okinkauili ejekamej makitematiltikan akin okatka ye (Luc. 4:41). Axkan noijki akin kineki touan tetlapouis moneki kipias inemilis ijkon ken Jehová kipaktia. ¿Ken tikteititiaj tikpatioitaj titetlapouiskej? Timochijchikauaj titetlapouiskej maski san kanin tiyetoskej porque tiknekij tikinmatiltiskej oksekimej tlen tlamachtia Biblia ijkon ken Jesús otlamachti (Mat. 13:​3, 23; 1 Cor. 3:6).

9. ¿Tlen kichiua ialtepe toTajtsin Dios para kitematiltis itoka?

⁹ Jesús okitematilti itoka toTajtsin Dios. Se tonal ijkuak okitlatlaujti iTajtsin okilui: “Onikinmatilti motoka” (Juan 17:26). Akinmej tipouij itech ialtepe Jehová timochijchikauaj tiktematiltiskej itoka toTajtsin Dios ijkon ken Jesús okichi. Timopaleuiaj ika Traducción del Nuevo Mundo tlen yokitlajtolkopkej nochi noso san tlajko kanaj ika 270 tlajtolmej. Ijkuak okitlajtolkopkej okitlalijkej itoka toTajtsin Dios kanin moneki ijkon ken yiuejkika okijkuilojkej. Amatlajkuilol tlen mitspaleuis timomachtis iTlajtol toTajtsin Dios páginas 1 hasta 13 kijtoua tleka oksepa okitlalijkej itoka toTajtsin Dios. Noijki ompa kijtoua tleka Escrituras Griegas Cristianas moneki makipia 237 uelta itoka toTajtsin Dios.

10. ¿Tlen techmachtia tlen okipanok se siuatl tlen chanti Myanmar?

¹⁰ Tejuan noijki tiknekij miakej makimatikan itoka toTajtsin Dios ijkon ken okichi Jesús. Se tokni tlen chanti ompa Myanmar okititi itoka toTajtsin Dios se siuatl tlen kipia 67 xiuitl. Siuatl sapanoua okipakti tlen okilui tokni uan opejki choka. Okijto: “Amo onikmatiaya itoka toTajtsin Dios. [...] Sapanoua miak ipati tlen otechmachti”. Nin kiteititia uelis kinpatilis innemilis akinmej yolkualmej ijkuak kimatij tlen itoka toTajtsin Dios.

NOCHIPA MATIKTEITITIKAN TIKNELTOKAJ IALTEPE JEHOVÁ

11. ¿Ken kiteititiaj tlayekankej kineltokaj ialtepe Jehová? (Noijki xikinmita fotos).

¹¹ ¿Ken uelis kiteititiskej tlayekankej kineltokaj ialtepe Jehová? Uelis ijkon kichiuaskej ijkuak san niman kintlajtoltiaj cartas tlen kinualtitlanilia ialtepe Jehová uan kichiuaj tlen ompa kijtoua. Ompa kijtoua ken tlamachtiskej uan ken motlatlaujtiskej ijkuak timonechikouaj. Noijki ompa kijtoua ken moneki kinmaluiskej tokniuan. Tokniuan kimachiliaj Jehová kintlasojtla uan kinmaluia ijkuak tlayekankej kichiuaj tlen kinnauatia ialtepe Jehová.

12. (1) ¿Tleka moneki matikintlakamatikan akinmej techyekanaj? (Hebreos 13:​7, 17). (2) ¿Tleka moneki matikitakan tlen kuali kichiuaj akinmej techyekanaj?

¹² Matikintlakamatikan tlayekankej ika nochi toyolo ijkuak itlaj technauatiskej. Tla ijkon tikchiuaskej yejuan amo kitaskej oui kichiuaskej inteki. Biblia kijtoua matikintlakamatikan uan matikinkauilikan matechyekanakan (xiktlajtolti Hebreos 13:​7, 17). Pero ualeua tikitaj oui tikintlakamatiskej porque tlayekankej noijki tlajtlakolejkej. Matikilnamiktokan akinmej techkokoliaj kinekij san matikitakan tlen amo kuali kichiuaj tlayekankej. Yejuan kinekij ayakmo matikneltokakan ialtepe Jehová. ¿Tlen uelis tikchiuaskej tla amo tiknekij matechkajkayauakan akinmej techkokoliaj?

NOCHIPA MATIKNELTOKAKAN IALTEPE JEHOVÁ

13. ¿Tlen kijtouaj akinmej techkokoliaj?

¹³ Akinmej techkokoliaj kijtouaj amo kuali tlen kichiua ialtepe Jehová. Biblia kijtoua Jehová kineki matiyetokan tichipauakej, matikchiuakan tlen kuali uan matikueyichiuakan ken ye kipaktia. Noijki kijtoua moneki makikixtikan itech tlanechikol akin kichiua tlen pitsotik uan amo moyolkopa (1 Cor. 5:​11-13; 6:​9, 10). Tejuan tiktlakamatij non tlanauatil ikinon akinmej techkokoliaj kijtouaj amo titetlasojtlaj, amitlaj techpaktia uan timoueyinekij.

14. ¿Akin kichiua makijtokan tlen amo melauak itech ialtepe toTajtsin Dios?

¹⁴ Matikilnamiktokan akin kichiua matechkokolikan. Satanás “intaj akinmej tlakajkayauaj” ikinon kichiua oksekimej makijtokan tlen amo melauak kichiua ialtepe toTajtsin Dios (Juan 8:44; Gén. 3:​1-5). Ijkon okichi achto siglo. Ikinon amo techtlajtlachialtia ijkuak oksekimej kijtouaj tlen amo melauak.

15. ¿Tlen okintoktijkej Jesús uan idiscípulos?

¹⁵ IKone toTajtsin Dios amo keman otlajtlakolchi uan okinchiuaya milagros. Pero Satanás okichi sekimej makijtokan tlen amo melauak. Ijkon okichijkej teopixkej tlen otlayekanayaj. Yejuan okinmiluijkej oksekimej Jesús okinkixtiaya ejekamej porque ‘Diablo okimakaya chikaualistli’ (Mar. 3:22). Satepan ijkuak okixkomakatokaj Jesús, teopixkej tlen otlayekanayaj okijtojkej Jesús okiuijuikalti toTajtsin Dios. Noijki okintlatlaluijkej akinmej ompa okatkaj makimiktikan Jesús (Mat. 27:20). Ijkuak idiscípulos Cristo opejkej tetlapouiaj, akinmej okinkokoliayaj okinkuesojkej oksekimej para “makintlauelitakan” uan makintlajyouiltikan (Hech. 14:​2, 19). Revista Akin Tetlapouijtok 1 de diciembre 1998 okiyekijto tlen kijtoua Hechos 14:2 uan okijto: “Judíos tlen okinmixnamikiayaj tokniuan amo okinkakej. Pero noijki okichijkej oksekimej tlen amo judíos makinkokolikan tokniuan”.

16. ¿Tlen moneki matikilnamiktokan tla oksekimej kijtouaj tlen amo melauak?

¹⁶ Satanás nochipa tlakajkayaua. Ikinon axkan ok kinkajkayaua “nochtin tlen chantij tlaltikpak” (Apoc. 12:9). Ijkuak tikinkakij oksekimej kijtouaj tlen amo melauak kichiua ialtepe Jehová uan akinmej techyekanaj, matikilnamiktokan tlen okintoktijkej Jesús uan idiscípulos. Axkan mochijtok tlen kijtoua Biblia porque techtlajyouiltiaj uan kijtojtinemij tikchiuaj tlen amo kuali (Mat. 5:​11, 12). Amo tikinneltokiliaj akinmej techkokoliaj porque yitikmatij akin kineki techkajkayauas ikinon timomaluiaj. ¿Tlen moneki tikchiuaskej para timomaluiskej?

17. ¿Tlen moneki tikchiuaskej tla oksekimej kinekij techkajkayauaskej? (2 Timoteo 1:13; noijki xikita recuadro “¿Tlen moneki tikchiuaskej tla ikaj techiluia itlaj tlen amo melauak opanok?”).

¹⁷ Amo matikinkakikan akinmej tlakajkayajtinemij. Apóstol Pablo okiyekijto tlen moneki tikchiuaskej tla sekimej kinekij techkajkayauaskej. Itech 1 Timoteo 1:​3, 4 okinnauati tokniuan “amo makinkakikan akinmej tlakajkayajtinemij”. Noijki apóstol Pablo okilui Timoteo: “Amo xikkaki tlen amo melauak” (1 Tim. 4:7). Matikijtokan se chokotsin kajsi itlaj ipan tlali, xamo san niman kinekis kikuas. Pero akin yomoskalti amo ijkon kichiuas porque kimati sokio uan uelis mokokos. Ikinon tejuan amo tikinkakij akinmej san tlakajkayajtinemij uan san tikkakij “kuali tlajtoli” tlen melauak (xiktlajtolti 2 Timoteo 1:13).

18. ¿Ken uelis tikteititiskej tikneltokaj ialtepe Jehová?

¹⁸ Yotimomachtijkej eyi tlamantli tlen techititia ialtepe Jehová kichiua ijkon ken Jesús okichi. Pero noijki kichiua okseki tlamantli. Ijkuak timomachtiskej Biblia matikitakan ken ialtepe Jehová kichiua ijkon ken Jesús okichi. Matikinpaleuikan tokniuan makineltokakan ialtepe toTajtsin Dios. Matikilnamikikan Jehová kiyekana ialtepe para kichiuas tlen ye kineki. Ikinon nochipa matikneltokakan uan matiktekichiuilikan toTajtsin Dios (Sal. 37:28). Tipakij uan tikpatioitaj tipouij itech ialtepe Jehová porque timotlasojtlaj uan nochipa timopaleuiaj.