Sekimej techtlajtlaniaj

Salmo 12:7 kijtoua: “Tejuatsin tikinmaluis”. ¿Tlen kijtosneki nin tlajtoli? ¿Kijtosneki “akinmej tlajyouiaj” tlen kijtoua versículo 5 noso kijtosneki iTlajtol Jehová tlen kijtoua versículo 6?

Kijtosneki akinmej tlajyouiaj ijkon ken kiteititiaj okseki versículos.

Salmo 12:​1-4 David okijto “tlakamej tlen tetlakamatij ayakmo katej”. Matikitakan tlen kijtosneki versículos tlen katej itech Salmo 12:​5-7.

Versículo 5 kijtoua toTajtsin Dios kinmakixtis nochtin “akinmej tlajyouiaj”.

Versículo 6 noijki kijtoua: “ITlajtol Jehová chipauak, yetoskia ken plata tlen okichipajkej”. Akinmej tikchiuaj ken Cristo tikneltokaj tlen kijtoua nin tlajtoli (Sal. 18:30; 119:140).

Matikitakan tlen kijtoua okse versículo. Salmo 12:7 kijtoua: “Jehová, tejuatsin tikinmaluis. Tejuatsin tikinmaluis sejse desde axkan uan nochipa ijkon tikchiuas”. ¿Tlen kijtosneki tlajtoli “tikinmaluis”?

Itech versículo 6 ijkuilitok “iTlajtol Jehová” uan satepan ijkuilitok versículo 7 kanin kijtoua “tikinmaluis”. Ikinon sekimej xamo mokuayejyekouaj kijtosneki toTajtsin Dios kimaluia iTlajtol. Tejuan tikmatij toTajtsin Dios miak uelta yokimalui iTlajtol porque miakej amo kinpaktia matiktlajtoltikan uan kinekij kipojpoloskej (Is. 40:8; 1 Ped. 1:25).

Pero noijki melauak tlen kijtoua versículo 5. Jehová yokinpaleui uan yokinmakixti akinmej tlajyouiaj uan nochipa ijkon kichiuas (Job 36:15; Sal. 6:4; 31:​1, 2; 54:7; 145:20).

¿Ken tikmatij tlen kijtosneki versículo 7?

Okseki versículos kiteititiaj nikan kijtosneki akinmej tlajyouiaj.

Salmo 12:​1, 2 kijtoua miakej okinkajkayauayaj akinmej yolkualmej. Satepan Jehová kijtoua kinmixkomakas akinmej kijtouaj tlen amo kuali. Salmo kijtoua toTajtsin Dios kipaleuis ialtepe porque iTlajtol chipauak.

Versículo 7 kijtoua “tejuatsin tikinmaluis” uan “tikinmaluis sejse”. Kijtosneki kinmaluis akinmej kintlajyouiltiaj.

Nin versículo itech Escrituras Hebreas ijkuak kijtoua “tikinmaluis” kijtosneki kinmaluis personas. Noijki itech Escrituras Hebreas tlen okitlajtolkopkej ika griego kitekitiltia ome uelta itech versículo 7 tlajtoli “tejuan”. Non kijtosneki ijkuak kintlajyouiltiaj akinmej kitlakamatij toTajtsin Dios. Noijki itech versículo 7 uan 8 kijtoua Jehová “kinmaluis sejse” akinmej kitlakamatij para amitlaj makintoktikan akinmej amo yolkualmej (Sal. 12:​7, 8). Itech Escrituras Hebreas tlen okitlajtolkopkej ika arameo, kanin peua versículo 7 kiteititia kijtosneki personas. Ompa kijtoua: “Tejuatsin TOTEKO tikinmaluis akinmej yolkualmej, te tikinmaluis desde axkan para amitlaj makintoktikan akinmej amo yolkualmej uan nochipa ijkon tikchiuas”. Nochi tlen yotikitakej kiteititia Salmo 12:7 amo kijtosneki toTajtsin Dios kimaluia iTlajtol.

Ikinon nin versículo kinyolchikaua akinmej kitlakamatij toTajtsin Dios porque kijtosneki kinpaleuis.