Matimotlasojkamatikan porque tikinpiaj tokniuan tlen techyekanaj

1. ¿Ken yokiteititi Jesús techtlasojtla?

AMIKAJ tetlasojtla ijkon ken Jesús kichiua. Ijkuak okatka nikan tlaltikpak ye okinchi milagros uan ijkon miakej okinpaleui (Luc. 9:​12-17). Noijki otechititi techtlasojtla ijkuak topatka omotemakak (Juan 15:13). Ye yokiteititi techtlasojtla desde ijkuak okiyolitijkej. Okijto ijkon kichiuaskia uan yokilui iTajtsin matechmaka iespíritu santo para techmachtis uan techyolseuis (Juan 14:​16, 17; 16:13). Noijki Jesús techmachtia ijkuak timonechikouaj para matitlamachtikan ipan nochi tlaltikpak (Mat. 28:​18-20).

2. ¿Akinmej okintemakak Jesús ken “tetliokolil”? (Efesios 4:​7, 8).

² Pero Jesús yokichi okseki tlamantli tlen kiteititia techtlasojtla. Apóstol Pablo okijkuilo ijkuak Jesús otlejkok iluikak ye “okintemakak tlakamej ken se tetliokolil” (xiktlajtolti Efesios 4:​7, 8). Pablo okiyekijto Jesús okintemakak nonmej tlakamej matlapaleuikan itech tlanechikolmej (Efes. 1:​22, 23; 4:​11-13). Axkan nonmej tlakamej tlen katej ken “tetliokolil” tlapaleuiaj ken siervos ministeriales, tlayekankej uan tlayekankej itech circuito.a Pero matikilnamiktokan yejuan noijki tlajtlakolejkej uan motlapololtiaj (Sant. 3:2). Jesús otechinmakak nonmej tokniuan para matechpaleuikan ikinon sapanoua tikinpatioitaj.

3. Xikyekijto tleka moneki tikinpaleuiskej tokniuan tlen Jesús otechinmakak.

³ Jesús otechinmakak nonmej tokniuan para matechyolchikauakan (Efes. 4:12). Pero tinochtin uelis tikinpaleuiskej kuali makichiuakan inteki. Para tikajsikamatiskej tleka miak ipati ijkon matikchiuakan, matikijtokan sekimej kichijchijtokej se kali kanin timonechikouaj. Sekimej kichijchiuaj pero oksekimej tlapaleuiaj ijkuak tetlamakaj, kinuikaj kanin moneki noso kinmakaj okseki tlamantli. Tejuan noijki uelis tikinpaleuiskej siervos ministeriales, tlayekankej uan tlayekankej itech circuito ijkuak itlaj tikchiuaj noso itlaj tikijtouaj. Matikitakan ken techpaleuia nochi tlen kichiuaj nonmej tokniuan. Noijki tikitaskej ken tikintlasojkamatiliskej tlen kichiuaj uan ken tiktlasojkamatiliskej Jesús porque otechinmakak nonmej tokniuan.

‘TECHPALEUIAJ’ SIERVOS MINISTERIALES

4. ¿Ken otlapaleuiayaj siervos ministeriales itech achto siglo?

⁴ Itech achto siglo sekimej tokniuan okintlaliayaj matlapaleuikan ken siervos ministeriales (1 Tim. 3:8). Xamo yejuan okatkaj ‘akinmej otlapaleuiayaj’ ijkon ken okijto Pablo itech 1 Corintios 12:28. Yejuan okichiuayaj seki tekitl uan ijkon tlayekankej san otlamachtiayaj uan okinmaluiayaj tokniuan. Xamo siervos ministeriales otlapaleuiayaj ijkuak okinchiuayaj icopias iTlajtol toTajtsin Dios. Noso okikouayaj tlen omonekiaya para kinchijchiuaskej copias.

5. ¿Ken tlapaleuiaj axkan siervos ministeriales?

⁵ ¿Ken tlapaleuiaj axkan siervos ministeriales? (1 Ped. 4:10). Xamo yejuan kimaluiaj tomin tlen tiktemakaj itech tlanechikol, kitaj kanin titetlapouiskej, kintlajtlanij toamatlajkuiloluan uan techinmakaj, noijki tlapaleuiaj itech audio uan video, kinseliaj tokniuan ijkuak timonechikouaj uan noijki tlapaleuiaj ijkuak kiyektlaliaj kali kanin timonechikouaj. Nochi tlen yejuan kichiuaj techpaleuia kuali matiyetokan (1 Cor. 14:40). Sekimej siervos ministeriales noijki tlamachtiaj ijkuak timonechikouaj tlajko semana uan itlamian semana. Ualeua noijki kinpaleuiaj tokniuan akinmej kiyekanaj se grupo. Noso se tlayekanki uelis kiluis se siervo ministerial iuan makintlajpaloti tokniuan.

6. ¿Tleka tikpatioitaj ken tlapaleuiaj siervos ministeriales?

⁶ ¿Tleka tikpatioitaj ken tlapaleuiaj siervos ministeriales? Matikitakan tlen okijtojkej sekimej tokniuan. Se tokni tlen chanti Bolivia uan itoka Beberly,b okijto: “Nikintlasojkamatilia tlen kichiuaj siervos ministeriales porque nechpaleuia kuali manimomachili ijkuak timonechikouaj. Nechpaleuia manitlakuika, manitlanankili, manikinkaki tlamachtilmej, manikinmita videos uan fotos. Yejuan techmaluiaj uan kinpaleuiaj tokniuan tlen monechikouaj por videoconferencia. Ijkuak tlami nechikol tlachipauaj, kololouaj tomin tlen tiktemakaj uan techinmakaj toamatlajkuiloluan. Sapanoua nikintlasojkamatilia nochi tlen kichiuaj”. Matikitakan tlen okijto okse tokni itoka Leslie tlen chanti ompa Colombia uan inamik tlapaleuia ken tlayekanki. Ye okijto: “Siervos ministeriales sapanoua kipaleuia nonamik. Okachi kipiaskia miak tekitl tla yejuan amo kipaleuiskiaj. Ikinon nikintlasojkamatilia porque tlapaleuiaj ika nochi inyolo”. Tejuan noijki timotlasojkamatij (1 Tim. 3:13).

7. ¿Ken uelis tikintlasojkamatiliskej siervos ministeriales porque techpaleuiaj? (Noijki xikita foto).

⁷ Xamo tikintlasojkamatiliaj siervos ministeriales porque techpaleuiaj. Pero Biblia kijtoua: “Xikteititikan nanmotlasojkamatij” (Col. 3:15). Matikitakan ken kiteititia motlasojkamati se tlayekanki itoka Daavid uan chanti Finlandia. Ye okijto: “Ijkuak nikneki niktlasojkamatilis se siervo ministerial, nikijkuililia se amatsintli noso niktitlanilia se mensaje. Ompa nikijkuililia se texto uan nikiluia ken yonechyolchika noso ken yonechpaleui tlen kichiua”. Pascal uan Jael kiteititiaj motlasojkamatij ijkuak kitlatlaujtiaj Jehová makinpaleui siervos ministeriales. Yejuan okijtojkej: “Tiktlasojkamatiliaj Jehová porque techpaleuiaj siervos ministeriales tlen katej kanin timonechikouaj. Noijki tiktlatlaujtiaj Jehová makinpaleui”. Jehová kikaki ijkuak timotlatlaujtiaj inpatka uan tinochtin techpaleuia (2 Cor. 1:11).

TLAYEKANKEJ KICHIUAJ MIAK TEKITL

8. ¿Tleka Pablo okijto sapanoua otekipanouayaj tlayekankej tlen okatkaj achto siglo? (1 Tesalonicenses 5:​12, 13).

⁸ Itech achto siglo tlayekankej sapanoua otlapaleuiayaj itech tlanechikol (xiktlajtolti 1 Tesalonicenses 5:​12, 13; 1 Tim. 5:17). Yejuan okinyekanayaj tlanechikolmej, otlamachtiayaj uan san sekan okitayaj ken kichiuaskej seki tlamantli miak ipati. Noijki okinyekiluiayaj tokniuan tlen omonekiaya kichiuaskej uan ijkon okinmaluiayaj (1 Tes. 2:​11, 12; 2 Tim. 4:2). Noijki yejuan omochijchikauayaj okachi tlaneltokaskej uan kinmaluiskej infamilias (1 Tim. 3:​2, 4; Tito 1:​6-9).

9. ¿Tlen tekitl kichiuaj tlayekankej?

⁹ Axkan noijki tlayekankej kichiuaj miak tekitl. Yejuan tetlapouiaj kuali tlajtoli (2 Tim. 4:5). Techyekanaj ijkuak titetlapouiaj, kitaj kanin titetlapouiskej, techmachtiaj ken titetlapouiskej uan ken kuali titlamachtiskej. Yejuan amo techikoitaj uan teiknomatij ijkuak ikaj kiyektlaliaj. Ijkon kichiuaj ijkuak ikaj tlajtlakolchiua porque kipaleuiaj oksepa mamouika iuan Jehová. Noijki mochijchikauaj kinmaluiskej tokniuan para amikaj matlajtlakolchiua (1 Cor. 5:​12, 13; Gál. 6:1). Yejuan techmaluiaj ken yetoskiaj tlajpixkej (1 Ped. 5:​1-3). Kuali moyektlaliaj para techmachtiskej, mochijchikauaj kuali techixmatiskej uan techtlajpalouaj para techyolchikauaskej. Sekimej tlayekankej tlapaleuiaj ijkuak kinchijchiuaj kalmej kanin timonechikouaj uan ijkuak kinyektlaliaj. Noijki tlapaleuiaj ijkuak mochiuaj uejueyij nechikolmej, kintlajpalouaj tokniuan tlen mokokouaj noso motlapouiaj inuan akinmej tlapajtiaj para kuali makinpajtikan tokniuan uan kichiuaj okseki tekitl. Sapanoua techpaleuia tlen yejuan kichiuaj.

10. ¿Tleka tikinpatioitaj tlayekankej?

¹⁰ Jehová okijto kintlaliskia tlajpixkej tlen kinmaluiskiaj tokniuan. Ijkon “ichkamej ayakmo momojtiskej” (Jer. 23:4). Ijkon okipanok se tokni tlen itoka Johanna uan chanti Finlandia. Ye okijto tlen okipanok ijkuak imama sapanoua omokoko. Ye okijto: “Nikita oui nikinmiluis oksekimej tlen nechpanoua. Pero se tlayekanki tlen ayamo okachi onikixmatiaya onechkak ijkuak onikilui ken onimomachiliaya, nouan omotlatlaujti uan okijto Jehová onechtlasojtlaya. Amo nikilnamiki tlen onechilui pero kuali onimomachili. Nikneltoka Jehová okiualtitlanki ijkuak okachi omonekiaya ikaj manechpaleui”. ¿Ken yomitspaleuijkej tlayekankej kanin timonechikoua?

11. ¿Ken uelis tikteititiskej tikpatioitaj tlen kichiuaj tlayekankej? (Noijki xikita foto).

¹¹ Jehová kineki matikteititikan tikinpatioitaj tlayekankej uan tikintlasojtlaj “porque tekipanouaj” miak (1 Tes. 5:​12, 13). Tokni Henrietta tlen noijki chanti Finlandia, okiyekijto: “Tlayekankej pakij kinpaleuiskej oksekimej pero non amo kijtosneki amo kipia tekitl nion amo keman sotlauaj. Noijki amo kijtosneki yejuan amitlaj kixnamikij. Ikinon ualeua nimotokia inauak se tlayekanki uan nikiluia: ‘Te kuali titlapaleuia ken tlayekanki’”. Se tokni tlen chanti Turquía uan itoka Sera, okijto: “Tlayekankej noijki moneki matikinyolchikauakan para makichiuakan inteki. Ikinon nikinmijkuililia se amatsintli, nikinmiluia matlakuatij nokalijtik noso inuan nitetlapouia”. ¿Tikneki itlaj tiktlasojkamatilis se tlayekanki porque kuali tlapaleuia kanin timonechikoua? ¿Uelis itlaj tikchiuas para tikteititis tiktlasojkamatilia? (1 Cor. 16:18).

TECHYOLCHIKAUAJ TLAYEKANKEJ ITECH CIRCUITO

12. ¿Akinmej noijki okintlali Jesús makinyolchikauakan tokniuan? (1 Tesalonicenses 2:​7, 8).

¹² Jesús noijki okintlali sekimej tlakamej para makichiuakan okseki tekitl itech tlanechikolmej. Achto siglo okinyekanki tlayekankej tlen okatkaj Jerusalén makintitlanikan Pablo, Bernabé uan oksekimej tokniuan makintlajpalotij tokniuan tlen okatkaj itech okseki tlanechikolmej (Hech. 11:22). ¿Tleka okintitlankej? Okintitlankej makinyolchikauatij tokniuan ijkon ken kichiuaj siervos ministeriales uan tlayekankej (Hech. 15:​40, 41). Nonmej tokniuan okichijkej miak tlamantli para kinpaleuiskej tokniuan, okinmachtijkej uan okinyolchikajkej maski itlaj kintoktiskiaj (xiktlajtolti 1 Tesalonicenses 2:​7, 8).

13. ¿Tlen tekitl kichiuaj tlayekankej tlen tlapaleuiaj itech circuito?

¹³ Tlayekankej tlen tlapaleuiaj itech circuito nouian yauij. Sekimej moneki yaskej sapanoua uejka para ajsitiuij itech se tlanechikol. Chichikometika kintemakaj miakej tlamachtilmej uan yauij inkalijtik tokniuan kinyolchikauatiuij. Yejuan monechikouaj inuan precursores, monechikouaj inuan tlayekankej uan techyekanaj ijkuak timonechikouaj para titetlapouiskej. Noijki moyektlaliaj para techmachtiskej uan kitaj ken mochiuaskej uejueyij nechikolmej. Yejuan noijki moyektlaliaj para mamomachtikan precursores uan mamonechikokan precursores tlen katej itech circuito. Noijki kichiuaj okseki tekitl miak ipati tlen kinmiluiaj tokniuan tlen tlapaleuiaj Betel.

14. ¿Tleka tikpatioitaj tlen kichiuaj tlayekankej itech circuito?

¹⁴ ¿Ken techyolchikauaj tokniuan tlen tlapaleuiaj itech circuito ijkuak techtlajpalotiuij? Se tokni tlen chanti Turquía okijto: “Ijkuak techualtlajpalouaj tokniuan itech circuito nechpaleuiaj okachi manimouika inuan tokniuan uan manikinpaleui. Yonikinmixmatki miakej tokniuan tlen tlapaleuiaj itech circuito. Pero amo onikixmatki nion se tlen amo okinekiaya nouan motlapouis porque kipia miak tekitl”. Johanna tlen otimotlapouijkej itech párrafo 10, otetlapouito iuan tlayekanki itech circuito pero amikaj okajsikej. Ye okijto: “Amo keman nikilkauas non tonal maski amikaj otikajsikej. Sapanoua onikinmilnamikiaya ome nokniuan porque oksekan ochantitoj. Pero tokni onechyolchika uan onechpaleui manikajsikamati ayakmo miak poliui ijkuak oksepa niyetos inuan nokniuan. Onechilui itech xochitlali miak uelta san sekan tiyetoskej”. Sapanoua tikinpatioitaj tlayekankej tlen tlapaleuiaj itech circuito porque miak uelta yotechpaleuijkej (Hech. 20:​37–21:1).

15. (1) ¿Ken uelis tikteititiskej tikinpatioitaj tlayekankej itech circuito uan ken uelis tikchiuaskej tlen kijtoua 3 Juan 5-8? (Noijki xikita foto). (2) ¿Tleka moneki matikinpatioitakan insiuauan tokniuan tlen techyekanaj uan ken uelis tikchiuaskej? (Xikita recuadro “Matikinpatioitakan insiuauan tokniuan tlen techyekanaj”).

¹⁵ Apóstol Juan okilui Gayo kuali makinseli tokniuan tlen oyayaj kintlajpalotiuij tokniuan. Noijki okilui: “Xikinmaka tlen kinpoloua ijkuak yejuan yaskej uan xikchiua ijkon ken kipaktia toTajtsin Dios” (xiktlajtolti 3 Juan 5-8). ¿Ken uelis tikinpaleuiskej tokniuan? Matikiluikan tokni tlen tlapaleuia itech circuito touan matlakuati uan iuan matitetlapouikan ijkuak techtlajpaloki. Matikitakan tlen kichiua Leslie tlen otimotlapouijkej itech párrafo 6 para kiteititis motlasojkamati. Ye okijto: “Nikiluia Jehová makinmaka tlen kinpoloua tokniuan. Nonamik uan ne tikinmijkuililiaj amatsitsintin uan tikinmiluiaj ken techyolchikauaj ijkuak techtlajpalokiuij”. Amo keman matikilkauakan tokniuan tlen tlapaleuiaj itech circuito noijki mokokouaj, motekipachouaj uan ualeua noijki sotlauaj. Uelis tikinyolchikauaskej noso itlaj matikintliokolikan uan ijkon kitaskej Jehová kinnankilia tlen omotlatlaujtijkej (Prov. 12:25).

OKACHI MONEKI MATLAPALEUIKAN TOKNIUAN TLAKAMEJ

16. ¿Tlen moneki mamotlajtlanikan tokniuan tlakamej? (Proverbios 3:27).

¹⁶ Itech nochi tlanechikolmej moneki matlapaleuikan tokniuan tlakamej tlen katej ken “tetliokolil”. Uelis ijkon tlapaleuiskej tokniuan tlakamej tlen yomoapolaktijkej (xiktlajtolti Proverbios 3:27). ¿Timochijchikaua titlapaleuis ken siervo ministerial? ¿Timochijchikaua titlapaleuis ken tlayekanki tla yititlapaleuia ken siervo ministerial?c ¿Uelis timochijchikauas para timomachtiti kanin kitemakaj tlamachtil para matetlapouikan Tekiuajkayotl? Tla ompa timomachtiti, Jesús mitsyolchikauas okachi xitlapaleui. Ximotlapoui iuan Jehová tla tikita amo uelis ijkon tikchiuas. Xikilui mamitspaleui ika iespíritu santo kuali xikchiua maski san tlen tekitl mitsmakaskej (Luc. 11:13; Hech. 20:28).

17. ¿Tlen kiteititia nochi tekitl tlen kichiuaj tokniuan tlakamej tlen katej ken “tetliokolil”?

¹⁷ Jesús techyekana itlamian ninmej tonalmej porque kichiuaj miak tekitl tokniuan tlakamej tlen katej ken “tetliokolil” (Mat. 28:20). ToTekiua techtlasojtla, techmaka miak tlamantli, kita tlen techpoloua uan techinmaka tokniuan tlen techpaleuiaj. Matiktlasojkamatilikan nochi tlen kichiua. Ikinon matikitakan ken uelis tikteititiskej timotlasojkamatij. Noijki nochipa matiktlasojkamatilikan Jehová porque ye techmaka “nochi tetliokolil kuali uan ajsitok” (Sant. 1:17).