Matimokuayejyekokan ijkon ken mokuayejyekouaj Jehová uan Jesús

1, 2. ¿Tlen kijtosneki tiktlasojtlaskej Jehová uan ken okiteititi Jesús kitlasojtla iTajtsin?

JESÚS okijto tlen tlanauatil okachi miak ipati tlen okijkuilo Moisés. Ye okijto: “Xiktlasojtla Jehová moDios ika nochi moyolo, ika nochi moyolilis, ika nochi mochikaualis uan ika nochi motlayejyekol” (Luc. 10:27). Moneki tiktlasojtlaskej Jehová ika nochi toyolo. Nin kijtosneki tiktlasojtlaskej ika nochi tochikaualis tlen tikpiaj, tlen tiknekij tikchiuaskej, tlen tikmachiliaj uan tlen timokuayejyekouaj. Tejuan tiktlasojtlaj Jehová ikinon timochijchikauaj timokuayejyekoskej ijkon ken ye mokuayejyekoua. Tejuan tiktlasojtlaj maski amo keman uelis tikajsikamatiskej nochi tlen ye mokuayejyekoua. Pero techpaleuis tla timomachtiskej ken mokuayejyekoua Cristo porque ye mokuayejyekoua ijkon ken iTajtsin (1 Cor. 2:16).

² Jesús kitlasojtla iTajtsin ika nochi itlayejyekol. Ye okimatiaya tlen okinekiaya kichiuas iTajtsin uan ye okijto ijkon kichiuaskia maski sapanoua tlajyouiskia. Okinekiaya kiyolpaktis ikinon amitlaj okika makitsakuili.

3. ¿Tlen okajsikamatki Pedro uan tlen okinmilui makichiuakan tokniuan? (1 Pedro 4:1).

³ Pedro uan oksekimej apóstoles nochipa okatkaj iuan Jesús ikinon okajsikamatkej ken mokuayejyekoua. Ijkuak Pedro okinmijkuilili tokniuan achto carta, okinmilui mamoyektlalikan para mokuayejyekoskej ijkon ken Cristo (xiktlajtolti 1 Pedro 4:1). Pedro okijkuilo tlajtoli “ximoyektlalikan” porque ijkon okinmiluiayaj soldados. Tlen okijkuilo Pedro techpaleuia matikmatikan ken mokuayejyekoua Cristo uan non techpaleuis amo matikchiuakan tlen amo kuali. Noijki techpaleuis matikixtopeuakan tlen kiyekana Satanás (2 Cor. 10:​3-5; Efes. 6:12).

4. ¿Tlen timomachtiskej?

⁴ Axkan tikitaskej ken mokuayejyekoua Jesús uan tikitaskej ken uelis noijki ijkon timokuayejyekoskej. Tikitaskej ken timokuayejyekoskej ijkon ken Jehová mokuayejyekoua. Noijki tikitaskej ken tiyetoskej tiyolyamankej uan saiktlami tikitaskej ken kuali timokuayejyekoskej.

MATIMOKUAYEJYEKOKAN IJKON KEN JEHOVÁ MOKUAYEJYEKOUA

5. Xikijto keman Pedro amo omokuayejyeko ijkon ken Jehová mokuayejyekoua.

⁵ Matikitakan tlen okichi Pedro se tonal ijkuak amo omokuayejyeko ijkon ken Jehová mokuayejyekoua. Jesús okinmilui iapóstoles omonekiaya yas Jerusalén. Ompa kikitskiskiaj teopixkej, kitlajyouiltiskiaj uan kimiktiskiaj (Mat. 16:21). Pedro okimatiaya Jesús ye okatka Mesías tlen omoijto ualaskia uan kimakixtiskia ialtepe toTajtsin Dios. Ikinon xamo Pedro amo okajsikamatiaya tleka Jehová okitekauili makimiktikan iKone (Mat. 16:16). Pedro oksekan okiuikak Jesús uan okilui: “NoTeko, ¿tleka tikijtoua mitstlajyouiltiskej? Te amo keman ijkon mitspanos” (Mat. 16:22). Pedro amo omokuayejyeko ijkon ken Jehová mokuayejyekoua. Non okiteititi noijki amo omokuayejyeko ijkon ken Jesús mokuayejyekoua.

6. ¿Ken okiteititi Jesús mokuayejyekoua ijkon ken iTajtsin mokuayejyekoua?

⁶ Jesús okiteititi mokuayejyekoua ijkon ken iTajtsin mokuayejyekoua. Ikinon okilui Pedro: “¡Xio Satanás! Te san techtsatsakuilia porque timokuayejyekoua ken tlakamej uan amo ken toTajtsin Dios” (Mat. 16:23). Jesús okimatiaya tlajyouiskia uan kimiktiskiaj porque kichiuaskia tlen kineki iTajtsin. Ikinon amo okikak tlen okilui Pedro maski ye amo okinekiaya itlaj makipano. Pedro okajsikamatki omonekiaya mokuayejyekos ijkon ken Jehová mokuayejyekoua. Techmachtia itlaj miak ipati tlen okipanok Pedro.

7. ¿Ken okiteititi Pedro omochijchikajtoka mokuayejyekos ijkon ken Jehová mokuayejyekoua? (Xikita dibujo ).

⁷ Satepan Pedro okiteititi omochijchikajtoka mokuayejyekos ijkon ken Jehová mokuayejyekoua. Jehová okijto kinseliskia itech ialtepe akinmej oualayaj itech okseki altepemej. Ikinon okilui Pedro makitlapouiti Cornelio tlen amo okatka judío uan ye achto opejki kichiua ken Cristo. Xamo Pedro okitaya oui kichiuas tlen okinauati toTajtsin Dios. Okitaya oui porque ijkuakon judíos amo omouikayaj inuan akinmej oualayaj itech okseki altepemej. Pero ye okipatlak tlen omokuayejyekouaya ijkuak okajsikamatki tlen kineki toTajtsin Dios. Ikinon ijkuak Cornelio okilui makitlajpaloti ye san niman oyajki okitato (Hech. 10:​28, 29). Pedro okitlapoui Cornelio uan ifamilia ikinon yejuan omoapolaktijkej (Hech. 10:​21-23, 34, 35, 44-48).

8. ¿Ken tikteititiskej timokuayejyekouaj ijkon ken Jehová mokuayejyekoua? (1 Pedro 3:8).

⁸ Opanok seki xiuitl uan Pedro okinmilui tokniuan ‘san se tlamantli mamokuayejyekokan’ (xiktlajtolti 1 Pedro 3:8). Tinochtin tiiTlaixpantijkauan Jehová uelis timokuayejyekoskej san se tlamantli tla timokuayejyekouaj ijkon ken Jehová mokuayejyekoua. Ijkon uelis timokuayejyekoskej tla tikchiuaj tlen kijtoua iTlajtol. Matikitakan tleka ijkon tikijtouaj. Jesús okinmilui idiscípulos okachi makipatioitakan kitekichiuiliskej Jehová (Mat. 6:33). Matikijtokan se tokni techiluia kineki okachi kitekichiuilis Jehová. ¿Tikiluiskej ijkon ken Pedro okilui Jesús? Amo ijkon matikiluikan. Tejuan matikyolchikauakan porque kineki okachi kitekichiuilis Jehová uan matikiluikan tikpaleuiskej ijkuak monekis.

MATIYETOKAN TIYOLYAMANKEJ

9, 10. ¿Tlen okinmachti Jesús iapóstoles?

⁹ Jesús okinmachti itlaj miak ipati iapóstoles se youak achto ijkuak yikimiktiskiaj. Ye okilui Pedro uan Juan matlayektlalikan kanin saiktlami tlakuaskia inuan iapóstoles. Xamo yejuan okitlalijkej se tsotsoli uan se xikali tlen ika kinmikxipajpakaskiaj akinmej yaskiaj tlakuatiuij. Pero ¿akin kinmikxipajpakaskia?

¹⁰ Ijkuakon oteikxipajpakaya se tlakeuali. Xamo apóstoles omotlajtlachialtijkej ijkuak Jesús opejki kinmikxipajpaka porque non tekitl okichiuaya se tlakeuali. Yejuan okitakej ijkuak Jesús “sekan okitlali itlaken tlen okikentoka uan omotlajkoilpi ika se tsotsoli. Satepan okitekak atl ijtik se xikali” uan “okinmikxipajpakak discípulos” (Juan 13:​4, 5). Jesús melauak yolyamanki porque okinmikxipajpakak nochtin iapóstoles uan xamo ouejka ijkon okichi. Noijki okikxipajpaki Judas tlen satepan okitemakti. Jesús okinyekilui iapóstoles: “¿Nankajsikamatij tleka ijkon onikchi? Namejuan nantechnotsaj Tlamachti uan noTeko. Non melauak porque ne nimoTlamachti uan nimoTeko. Tla ne onamechikxipajpakak maski nimoTeko uan nimoTlamachti, namejuan noijki moneki ximosepanikxipajpakakan” (Juan 13:​12-14).

11. ¿Ken okiteititi Pedro yokatka yolyamanki? (1 Pedro 5:5; noijki xikita dibujo).

¹¹ Pedro okajsikamatki Jesús yolyamanki uan non okimachti itlaj miak ipati. Satepan ijkuak Jesús oyajki iluikak, Pedro okipajti “se tlakatl tlen amo onejnemiaya porque ijkon oneski” (Hech. 1:​8, 9; 3:​2, 6-8). Miakej omotlajtlachialtijkej ijkuak Pedro okipajti non tlakatl (Hech. 3:11). Pero ye amo okinekiaya makiueyitlalikan maski itech ialtepe okipatioitayaj ueyititoskej. Pedro okatka yolyamanki ikinon okinmilui akinmej ompa okatkaj makiueyichiuakan toTajtsin Dios uan makiueyitlalikan Jesús. Okinmilui: “Nin tlakatl tlen nankitaj uan nankixmatij, omochikajkej ikxiuan ika itoka Jesús uan tejuan tikneltokaj itoka” (Hech. 3:​12-16). Satepan Pedro okintlajkuilili tokniuan uan okinmilui miak ipati mayetokan yolyamankej. Tlen okijkuilo techilnamiktia tlen okichi Jesús ijkuak “omotlajkoilpi ika se tsotsoli” uan “okinmikxipajpakak discípulos” (xiktlajtolti 1 Pedro 5:5).

12. ¿Ken tikteititiskej tiyolyamankej ijkon ken Pedro okichi?

¹² Matimochijchikauakan tiyetoskej tiyolyamankej ijkon ken Pedro okichi. Akin yolyamanki amo san kijtojtinemi tlen kichiuas. Ikinon ijkuak Pedro okijto xiyetokan “nanyolyamankej” kijtosneki ken timokuayejyekouaj uan ken tikinmitaj oksekimej. Tikinpaleuiaj oksekimej porque tikintlasojtlaj uan noijki tiktlasojtlaj Jehová. Tejuan amo ijkon tikchiuaj porque tiknekij matechueyitlalikan. Noijki tikteititiskej tiyolyamankej tla tipakij tiktekichiuiliskej Jehová uan tikinpaleuiaj tokniuan maski oksekimej amo kitaskej tlen tikchiuaj (Mat. 6:​1-4).

KUALI MATIMOKUAYEJYEKOKAN

13. ¿Tlen kijtosneki ‘kuali timokuayejyekoskej’?

¹³ ¿Tlen kijtosneki ‘kuali timokuayejyekoskej’? (1 Ped. 4:7). Kijtosneki matimokuayejyekokan ken kita Jehová tlen tiknekij tikpejpenaskej tikchiuaskej. Noijki matikilnamiktokan okachi miak ipati timouikaskej iuan Jehová. Tla kuali timokuayejyekouaj, amo tikijtoskej nochi tikmatij. Noijki tikteititiskej tikneltokaj toTajtsin Dios ijkuak tikiluiaj matechyekana.

14. ¿Tlen okipanok Pedro ijkuak amo okichi tlen okiluijkej?

¹⁴ Se youak ijkuak Jesús yikimiktiskiaj, okinmilui idiscípulos: “Nin youak nantechkajteuaskej noselti”. Pero Pedro okilui: “Ne amo keman nimitskauas maski oksekimej mitskauaskej”. Non youak Jesús noijki okinmilui idiscípulos ‘maijsatokan uan mamotlatlaujtikan’ (Mat. 26:​31, 33, 41). Tla Pedro kichiuaskia tlen okijto Jesús, amo momojtiskia kijtoskia ye okatka idiscípulo. Pero okijto amo okixmatiaya uan satepan sapanoua omoyolkoko (Mat. 26:​69-75).

15. ¿Tlen okipaleui Jesús kuali mamokuayejyeko?

¹⁵ Jesús nochipa okineltokak Jehová. Ye amo kipia tlajtlakoli pero miak uelta okitlatlaujti iTajtsin youak ijkuak yikimiktiskiaj. Non okipaleui makichiua tlen iTajtsin okinekiaya (Mat. 26:​39, 42, 44; Juan 18:​4, 5). Xamo Pedro amo keman okilka ijkuak okitak Jesús miak uelta omotlatlaujti non youak.

16. ¿Ken okiteititi Pedro kuali omokuayejyekouaya? (1 Pedro 4:7).

¹⁶ Satepan Pedro opejki okachi kitlatlaujtia Jehová makipaleui. Ijkuak okiyolitijkej Jesús, okilui Pedro uan oksekimej apóstoles kiseliskiaj iespíritu santo toTajtsin Dios para uelis tetlapouiskiaj. Pero okinmilui mamochiakan ompa Jerusalén (Luc. 24:49; Hech. 1:​4, 5). ¿Tlen okichi Pedro ijkuak ompa omochixtokaj? Biblia kijtoua Pedro uan oksekimej “san sekan omotlatlaujtiayaj” (Hech. 1:​13, 14). Satepan ijkuak Pedro okinmijkuilili tokniuan achto carta, okinmilui kuali mamokuayejyekokan uan makitlatlaujtikan Jehová uan makiluikan makinyekana (xiktlajtolti 1 Pedro 4:7). Satepan Pedro okachi otlaneltokaya uan kuali omokuayejyekouaya. Non okipaleui makinyolchikaua tokniuan (Gál. 2:9).

17. ¿Tlen moneki tikchiuaskej maski tikmatij tikchiuaskej seki tlamantli? (Noijki xikita foto).

¹⁷ Moneki nochipa tiktlatlaujtiskej Jehová tla tiknekij matechpaleui kuali matimokuayejyekokan. Moneki nochipa tiktlatlaujtiskej matechyekana maski tikmatij tikchiuaskej seki tlamantli amo oui. Noijki matikiluikan matechpaleui ijkuak tikpejpenaskej itlaj miak ipati porque tikneltokaj san ye kimati tlen okachi techpaleuis.

18. ¿Ken uelis tikchiuaskej ijkon ken Pedro okichi?

¹⁸ Tiktlasojkamatiliaj miak toTajtsin Dios porque otechchijchi ijkon ken ye kipia iyelis (Gén. 1:26). Tikilnamiktokej amo nochi uelis tikchiuaskej ijkon ken ye kichiua porque tejuan titlajtlakolejkej (Is. 55:9). Pero uelis tikchiuaskej ijkon ken Pedro okichi tla timochijchikauaj timokuayejyekoskej ijkon ken Jehová mokuayejyekoua. Noijki matiyetokan tiyolyamankej uan kuali matimokuayejyekokan.