Matipakikan ijkuak titetlapouiaj ijkon ken Jesús okichi

1. ¿Tlen techpaktia tikchiuaskej tiiTlaixpantijkauan Jehová?

TIITLAIXPANTIJKAUAN Jehová sapanoua techpaktia titetlapouiskej pero akinmej pouij itech religiones tlen tlakajkayauaj amo kinpaktia ijkon kichiuaskej (Tito 2:14). Pero ualeua sekimej tokniuan amo okachi pakij tetlapouiskej. Ualeua xamo uelis timomachiliskej ijkon ken se tlayekanki tlen mochijchikaua kuali tlapaleuis itech tlanechikol. Ye okijto: “Ualeua amo nikneki nitetlapouiti”.

2. ¿Tleka ualeua amo tipakij ijkuak titetlapouiaj?

² Xamo okachi tipakij ijkuak tikchiuaj okseki tekitl para tiktekichiuiliskej toTajtsin Dios pero amo ijkon techpanoua ijkuak titetlapouiaj. ¿Tleka? Porque tipakij ijkuak san niman tikitaj ken tlapaleuia ijkuak tikinchijchiuaj noso tikinyektlaliaj kalmej kanin timonechikouaj, ijkuak titlapaleuiaj kanin tlaxixini noso ijkuak tikinyolchikauaj tokniuan. Noijki tipakij titekipanoskej inuan tokniuan porque kuali inuan timouikaj uan timotlasojtlaj. Noijki tipakij porque tokniuan techtlasojkamatiliaj tlen tikchiuaj uan kipatioitaj. Pero kanin titetlapouiaj xamo yimiak xiuitl tikintlajpalouaj akinmej ompa chantij uan amo miakej techkakij. Oksekimej amo kinekij matikintlapouikan. Noijki tikmatij xamo okachi techtlajyouiltiskej ijkuak okachi yitiyetoskej itlamian tonalmej (Mat. 10:22). ¿Tlen techpaleuis okachi matipakikan ijkuak titetlapouiskej?

3. ¿Tlen techmachtia Lucas 13:​6-9?

³ Techpaleuis matipakikan ijkuak titetlapouiskej tla tikchiuaj tlen Jesús okichi ijkuak otetlapouiaya. Ijkuak otetlapouiaya ye amo omosotla uan okachi opakiaya tetlapouis (xiktlajtolti Lucas 13:​6-9). Ye okijto yetoskia ken se tlakatl tlen okimalui eyi xiuitl se higoskouitl pero amo otlaki nion se tlakilotl. Noijki ijkon opanok ijkuak okintlapoui judíos eyi xiuitl pero amo miakej omochijkej idiscípulos. Pero tlakatl tlen okimalui higoskouitl amo omosotla uan ok okimalui kouitl para matlaki. Jesús noijki ijkon okichi uan amo okijto ayakmo tetlapouis. Porque ye omochijchika maajsi inyolipan tlen okintlapouiaya oksekimej.

4. ¿Tlen naui tlamantli timomachtiskej?

⁴ Axkan timomachtiskej tlen okipaleui Jesús mapaki tetlapouis ijkuak ok opoliuiaya chikuase metstli para kimiktiskiaj. Tikitaskej naui tlamantli tlen Jesús okichi. Tikitaskej ye omochijchika kichiuas tlen Jehová kineki. Okimatiaya ken omochijtokaj profecías. Noijki tikitaskej Jesús okineltokak Jehová nochipa kipaleuiskia uan okilnamiktoka sekimej kikakiskiaj ijkuak kintlapouiskia.

JESÚS OKICHI TLEN KINEKI JEHOVÁ

5. ¿Ken okiteititi Jesús okipatioitaya kichiuas tlen toTajtsin Dios kineki?

⁵ Jesús opakiaya ijkuak otetlapoui “kuali tlajtoli” porque okimatiaya toTajtsin Dios okinekiaya ijkon makichiua (Luc. 4:43). Ye okachi okipatioitaya kichiuas non tekitl. Ijkon okiteititi ijkuak yikixpoloskiaj porque ok oyaya ‘tlamachtiti itech altepemej uan altepetsitsintin’ (Luc. 13:22). Noijki okinmachti idiscípulos matetlapouikan ijkon ken ye okichiuaya (Luc. 10:1).

6. ¿Ken tlapaleuia nochi tekitl tlen mochiua itech ialtepe Jehová? (Noijki xikinmita fotos).

⁶ Axkan Jehová uan Jesús noijki kinekij okachi matikpatioitakan titetlapouiskej (Mat. 24:14; 28:​19, 20). Nochi tekitl tlen mochiua itech ialtepe Jehová tlapaleuia para mamotetlapoui kuali tlajtoli. Tikinchiuaj kalmej kanin timonechikouaj para ompa makiueyichiuatij Jehová akinmej tikintlapouiaj. Nochi tekitl tlen kichiuaj tokniuan ompa Betel uan itech okseki kalmej noijki tlapaleuia mamotetlapoui kuali tlajtoli. Noijki tikinpaleuiaj tokniuan kanin tlaxixini para makipiakan tlen moneki. Non miak ipati porque kinpaleuia makitekichiuilikan Jehová. Noijki nochipa matikilnamiktokan Jehová okachi kipatioita matitetlapouikan. Non techyolinis okachi matitetlapouikan. Se tlayekanki itoka János uan chanti Hungría, okijto: “Nochipa nikilnamiki miak ipati matitetlapouikan maski tikchiuaj okseki tekitl para tiktekichiuiliskej Jehová. Non tlen okachi moneki matikpatioitakan”.

7. ¿Tleka Jehová kineki nochipa matitetlapouikan? (1 Timoteo 2:​3, 4).

⁷ Tipakiskej ijkuak titetlapouiskej tla tikinmitaj akinmej tikintlapouiaj ijkon ken Jehová kinmita. Porque ye kineki nochtin makikakikan uan makiselikan kuali tlajtoli (xiktlajtolti 1 Timoteo 2:​3, 4). Jehová techpaleuia kuali matitetlapouikan porque ye kineki nochtin mamomakixtikan. Amatlajkuilol Xitetlasojtla kipia miak tlamantli tlen techpaleuia matikmatikan ken tipeuaskej titetlapouiskej. Ijkon kuali tikinmachtiskej oksekimej uan ijkon mamochiuakan idiscípulos Jesús. Miakej amo kikakij tlen tikintlapouiaj pero xamo techkakiskej ijkuak yitlamis ueyi tlajyouilistli. Xamo satepan kilnamikiskej tlen axkan tikintlapouiaj uan uelis kiseliskej kuali tlajtoli. Ikinon miak ipati ok matitetlapouikan.

JESÚS OKIMATIAYA KEN MOCHIJTOKEJ PROFECÍAS

8. ¿Ken okipaleui Jesús profecías okachi matetlapoui?

⁸ Jesús okimatiaya mochiuaskiaj seki profecías ikinon san eyi xiuitl uan tlajko tetlapouiskia (Dan. 9:​26, 27). Noijki okimatiaya profecía tlen okijtouaya ken kimiktiskiaj uan keman ijkon kipanoskia (Luc. 18:​31-34). Jesús okimatiaya ken omochijtokaj profecías ikinon omochijchika okachi tetlapouis para kichiuas tlen toTajtsin Dios okilui makichiua.

9. ¿Ken techpaleuiaj profecías matipakikan ijkuak titetlapouiaj?

⁹ Tipakiskej titetlapouiskej tla tikinmajsikamatij profecías. Tikmatij ayakmo uejkauas tlen onka itech nin tlaltikpak. Noijki tikmatij tikatej itlamian tonalmej porque panotok miak tlamantli uan personas yokipatlakej inyelis ijkon ken kijtoua Biblia. Tikajsikamatij mochijtok profecía tlen kijtoua itlamian tonalmej mokualanis tekiua tlen kajki sur iuan tekiua tlen kajki norte. Tekiua tlen kajki sur kijtosneki Reino Unido uan Estados Unidos uan tekiua tlen kajki norte kijtosneki Rusia uan akinmej kipaleuiaj (Dan. 11:40). Noijki tikajsikamatij ikxiuan estatua tlen kijtoua Daniel 2:​43-45 kineskayotiaj tekiuajkej Reino Unido uan Estados Unidos. Ijkuak timomachtiaj ninmej textos, okachi tikneltokaj iTekiuajkayo toTajtsin Dios ayakmo miak poliui tlanauatis uan kinmixpolos tekiuajkej. Ninmej profecías techititiaj tikatej itlamian tonalmej uan techyoliniaj okachi matitetlapouikan.

10. ¿Ken techpaleuiaj profecías matipakikan ijkuak titetlapouiaj?

¹⁰ Tejuan noijki tiknekij tikintlapouiskej oksekimej ken mochijtokej profecías. Se tokni itoka Carrie uan tlapaleuia ompa República Dominicana, okijto: “Ijkuak nimokuayejyekoua nochi tlen kualtsin kichiuas Jehová, nikneki nikintlapouis oksekimej tlen kichiuas. Noijki ijkuak nikita oksekimej tlajyouiaj, nimokuayejyekoua yejuan noijki moneki makimatikan tlen kichiuas Jehová uan amo san ne manikmati”. Profecías techyolchikauaj matitetlapouikan porque techilnamiktiaj Jehová techpaleuia ijkon matikchiuakan. Se tokni itoka Leila uan chanti Hungría, okijto: “Isaías 11:​6-9 nechilnamiktia Jehová uelis kipaleuis ikaj makipatla inemilis. Ikinon nikintlapouia hasta akinmej mota amo kinekiskej nechkakiskej”. Okse tokni itoka Christopher uan chanti Zambia, okijto: “Marcos 13:10 kijtoua motetlapouis ipan nochi tlaltikpak ikinon sapanoua nikpatioita nikchiuas tlen kijtoua non profecía”. ¿Tejuatsin tlen profecía mitsyolchikaua xitetlapoui?

JESÚS OKILNAMIKTOKA JEHOVÁ NOCHIPA KIPALEUISKIA

11. ¿Tleka Jesús omonekiaya kineltokas Jehová kipaleuiskia mapaki ijkuak tetlapouiskia? (Lucas 12:​49, 53).

¹¹ Jesús okineltokaya Jehová kipaleuiskia mapaki ijkuak tetlapouiskia. Ye okintlakaitaya akinmej okintlapouiaya pero okimatiaya miakej kinkualaniskia kuali tlajtoli uan kixnamikiskiaj (xiktlajtolti Lucas 12:​49, 53). Noijki akinmej okinyekanayaj religiones amo okinpakti tlen otetlapouiaya ikinon miak uelta okinekiayaj kimiktiskej (Juan 8:59; 10:​31, 39). Pero Jesús nochipa otetlapoui porque okimatiaya Jehová okipaleuiaya. Ye okijto: “NoTajtsin tlen onechualtitlanki nouan kajki uan amo nika noselti” (Juan 8:16). Noijki okijto: “Amo nechkaua noselti, porque nochipa nikchiua tlen ye kipaktia” (Juan 8:29).

12. ¿Tlen okinmilui Jesús idiscípulos para nochipa matetlapouikan maski kintlajyouiltiskiaj?

¹² Jesús okinmilui idiscípulos makineltokakan Jehová kinpaleuiskia. Ye okimatiaya kintlajyouiltiskiaj ikinon miak uelta okinmilui Jehová inuan yetoskia uan kinpaleuiskia (Mat. 10:​18-20; Luc. 12:​11, 12). Okinnauati mamomaluikan uan mamotlachilikan (Mat. 10:16; Luc. 10:3). Okinmilui makintlakaitakan oksekimej tla amo okinekiayaj kikakiskej kuali tlajtoli (Luc. 10:​10, 11). Noijki okinmilui macholokan tla kintlajyouiltiskiaj (Mat. 10:23). Jesús okipaktiaya tetlapouis pero omomalui maski okimatiaya Jehová kipaleuiskia (Juan 11:​53, 54).

13. ¿Tleka uelis tikneltokaskej Jehová techpaleuis matitetlapouikan?

¹³ Axkan noijki techtlajyouiltiaj ikinon moneki matechpaleui Jehová matipakikan ijkuak titetlapouiaj (Apoc. 12:17). ¿Tleka uelis tikneltokaskej Jehová techpaleuis matitetlapouikan? Porque itech Juan capítulo 17 Jesús ijkon omotlatlaujti. Ompa okilui Jehová makinmalui apóstoles uan ye ijkon okichi. Amochtli Hechos kijtoua toTajtsin Dios okinpaleui apóstoles matetlapouikan uan mapakikan maski okintlajyouiltijkej. Jesús noijki omotlatlaujti inpatka akinmej kikakiskiaj kuali tlajtoli tlen apóstoles otetlapouiayaj. Uelis tikijtoskej tejuan noijki topatka omotlatlaujti porque noijki titetlapouiaj. Ikinon matikneltokakan Jehová techpaleuis ijkon ken okinpaleui apóstoles porque ye okikak tlen okitlatlaujti Jesús (Juan 17:​11, 15, 20).

14. ¿Tleka tikneltokaj nochipa tipakiskej ijkuak titetlapouiskej? (Noijki xikita foto).

¹⁴ Xamo tikitaskej oui tipakiskej titetlapouiskej porque ayakmo miak poliui tlamis nochi tlen axkan onka. Pero Jesús okijto amo toselti tiyetoskiaj (Luc. 21:​12-15). Tejuan tikchiuaj ijkon ken okichi Jesús uan idiscípulos. Tikinkauiliaj oksekimej makipejpenakan kox kikakiskej tlen tikintlapouiaj uan amo inuan timokualaniaj. Noijki tokniuan tlen chantij itech altepemej kanin amo kinkauiliaj makitekichiuilikan Jehová, kitaj ken uelis tetlapouiskej porque kineltokaj Jehová kinpaleuis uan amo san inselti ijkon kichiuaj. Achto siglo Jehová okinmakak chikaualistli itekipanojkauan ‘para nochtin makintlapouikan iTlajtol’. Tejuan noijki techmakas chikaualistli para matitetlapouikan hasta ijkuak ye kijtos ayakmo ijkon matikchiuakan (2 Tim. 4:17). Ikinon matikilnamiktokan Jehová nochipa techpaleuis matipakikan ijkuak titetlapouiskej.

JESÚS OKILNAMIKTOKA SEKIMEJ KIKAKISKIAJ IJKUAK KINTLAPOUISKIA

15. ¿Ken tikmatij Jesús okineltokaya miakej kikakiskiaj kuali tlajtoli?

¹⁵ Jesús okilnamiktoka sekimej kikakiskiaj kuali tlajtoli uan non okipaleui mapaki ijkuak otetlapouiaya. Itlamian xiuitl 30, Jesús okitak miakej okinekiayaj kikakiskej kuali tlajtoli ikinon okijto yejuan yetoskiaj ken tlatoktli tlen yochikauak uan yiuelis kololoskiaj (Juan 4:35). Opanok kanaj se xiuitl uan okinmilui idiscípulos: “Moneki tikololoskej miak tlatoktli” (Mat. 9:​37, 38). Satepan oksepa okinmilui: “Moneki tikololoskej miak tlatoktli [...]. Ikinon xiktlatlaujtikan akin iaxka tlatoktli makinualtitlani tlakeualmej makololokan” (Luc. 10:2). Jesús okimatiaya miakej kikakiskiaj tlen kintlapouiskia ikinon opakiaya ijkuak ikaj okikakiaya kuali tlajtoli (Luc. 10:21).

16. ¿Tlen okinmilui Jesús idiscípulos? (Lucas 13:​18-21; noijki xikita foto).

¹⁶ Jesús okinmachti idiscípulos sekimej kiseliskiaj kuali tlajtoli uan non kinpaleuiskia mapakikan ijkuak tetlapouiskiaj. Matikitakan ome tlamantli tlen okijto (xiktlajtolti Lucas 13:​18-21). Ye okijto kuali tlajtoli yetoskia ken iyolo mostaza tlen moskaltiskia uan mochiuaskia se ueyi kouitl. Noijki okijto kuali tlajtoli yetoskia ken levadura. Non kijtosneki kuali tlajtoli motematiltiskia ipan nochi tlaltikpak uan miakej kinpaleuiskia makipatlakan innemilis maski oksekimej amo san niman kitaskiaj. Ijkon Jesús okinpaleui idiscípulos makajsikamatikan miakej kiseliskiaj kuali tlajtoli.

17. ¿Tleka ok moneki matitetlapouikan?

¹⁷ Okachi tipakiskej titetlapouiskej tla tikitaj miakej kiseliaj kuali tlajtoli. Sejse xiuitl miakej touan monechikouaj ijkuak tikilnamikij imikilis Jesús uan peua momachtiaj. Noijki sapanoua miakej peua tetlapouiaj uan miakej moapolaktiaj. Amo tikmatij ok keski kiseliskej kuali tlajtoli. Pero Jehová miakej kinnechikojtok porque kineki kinmakixtis axkan ijkuak ayamo peua ueyi tlajyouilistli (Apoc. 7:​9, 14). Jehová kimati miakej kiseliskej kuali tlajtoli ikinon moneki ok matitetlapouikan.

18. ¿Ken tiknekij matechitakan ijkuak titetlapouiaj?

¹⁸ Akinmej melauak idiscípulos Jesús kinpaktia tetlapouiskej uan ijkon kinmixmatij. Miakej okajsikamatkej apóstoles “okatkaj iuan Jesús” porque okatkaj yolchikauakej uan opakiayaj ijkuak otetlapouiayaj (Hech. 4:13). Tejuan noijki tiknekij matechitakan tipakij ijkuak titetlapouiaj ijkon ken Jesús opakiaya ijkuak otetlapouiaya.