Matimoyekanakan ika tlen tikneltokaj

1. ¿Tleka opakiaya Pablo?

APÓSTOL Pablo kuali okipejpenki tlen okichi uan okimatiaya Jehová okiseliaya. Ye opakik ijkuak omokuayejyeko okichi tlen okachi miak ipati ijkuak opoliuiaya seki tonal yikimiktiskiaj. ¿Tleka opakiaya? Ye okijto: “Yotlanki onimotlalo uan amo onikpolo notlaneltokilis” (2 Tim. 4:​6-8). ¿Tlen techpaleuis kuali matikpejpenakan tlen tikchiuaskej ijkon ken Pablo okichi uan noijki matechseli Jehová?

2. ¿Tlen kijtosneki ikaj ‘moyekana ika tlen kineltoka’?

² Pablo okijto ye uan oksekimej tokniuan ‘omoyekanayaj ika tlen okineltokayaj uan amo ika tlen okitayaj’ (2 Cor. 5:7). ¿Tlen kijtosneki tlen okijto? Kijtosneki akin ‘moyekana ika tlen kineltoka’ kikauilia Jehová makiyekana ijkuak kipejpenas tlen kichiuas. Ijkon kichiua porque kineltoka san ye uelis kipaleuis. Akin ‘moyekana ika tlen kineltoka’ kiteititia kineltoka toTajtsin Dios kiteochiuas uan kimati san itlanauatiluan okachi kipaleuiaj (Sal. 119:66; Heb. 11:6). Porque akin moyekana san ika tlen kita, san kichiua tlen mokuayejyekoua. Non kijtosneki kichiua tlen kita, tlen kikaki uan tlen kimachilia.

3. ¿Ken techpaleuis tla “timoyekanaj ika tlen tikneltokaj”? (2 Corintios 4:18).

³ Ualeua tikpejpenaj tlen tikchiuaskej san ika tlen tikitaj, tlen tikkakij uan tlen tikmachiliaj. Pero xamo titlajyouiskej tla san tikchiuaskej tlen tikkakij noso tlen tikitaj ijkuak tikpejpenaskej tlen okachi miak ipati. ¿Tleka? Porque amo nochipa techpaleuia tlen tikkakij uan tlen tikitaj. Noijki ayakmo tikchiuaskej tlen Jehová kineki tla san tikchiuaskej tlen tikitaj (Ecl. 11:9; Mat. 24:​37-39). Tikyolpaktiskej “toTeko” tla “timoyekanaj ika tlen tikneltokaj” ijkuak tikpejpenaskej tlen tikchiuaskej (Efes. 5:10). Tipakiskej tla tiktlakamatiskej toTajtsin Dios uan amitlaj techkuejsos (Sal. 16:​8, 9; Is. 48:​17, 18). Noijki satepan nochipa tiyoltoskej tla “timoyekanaj ika tlen tikneltokaj” (xiktlajtolti 2 Corintios 4:18).

4. ¿Ken tikmatiskej kox “timoyekanaj ika tlen tikneltokaj uan amo ika tlen tikitaj”?

⁴ ¿Ken tikmatiskej kox “timoyekanaj ika tlen tikneltokaj uan amo ika tlen tikitaj”? Moneki matimotlajtlanikan: “¿Tlen ika nimoyekana ijkuak nikpejpena tlen nikchiuas? ¿Nimoyekana ika tlen nikita noso nikkaua manechyekanakan itlanauatiluan Jehová?”. Axkan tikitaskej eyi tlamantli tlen techpaleuis matimoyekanakan ika tlen tikneltokaj. Timomachtiskej tlen tikchiuaskej ijkuak tikitaskej kanin titekipanoskej, ijkuak tikpejpenaskej akin iuan timonamiktiskej uan ijkuak ialtepe Jehová itlaj technauatia. Non eyi tlamantli techpaleuis matikmatikan tlen tikchiuaskej ijkuak tikpejpenaskej itlaj miak ipati.

¿TLEN TIKCHIUASKEJ IJKUAK TIKITASKEJ KANIN TITEKIPANOSKEJ?

5. ¿San moneki matikmatikan kech techtlaxtlauiskej ijkuak tikitaskej kanin titekipanoskej?

⁵ Tinochtin tiknekij titekipanoskej para tikpiaskej tlen ika timopanoltiskej uan tikinmakaskej tofamilia tlen moneki (Ecl. 7:12; 1 Tim. 5:8). Sekimej tokniuan kuali kintlaxtlauiaj kanin tekipanouaj uan non kinpaleuia makipiakan tlen ika mopanoltiskej uan noijki kololouaj tomin tlen satepan kinejnekiskej. Pero oksekimej amo kitlanij miak kanin tekipanouaj uan san kipiaj tlen ika mopanoltiskej. Ikinon sekimej kinekij kimatiskej kech kintlaxtlauiskej kanin tekipanoskej. Akinmej ijkon kichiuaj kiteititiaj san kichiuaj tlen kitaj.

6. ¿Ken tikteititiskej “timoyekanaj ika tlen tikneltokaj” ijkuak tikitaskej kanin titekipanoskej? (Hebreos 13:5).

⁶ Tla “timoyekanaj ika tlen tikneltokaj” achto timokuayejyekoskej kox kanin titekipanoskej ok techkauilis matimajxilikan timouikaskej iuan Jehová. Ikinon matimotlajtlanikan: “¿Kanin nitekipanos monekis nikchiuas tlen Jehová kikokolia?” (Prov. 6:​16-19). “¿Ok nimajxilis nitetlapouis uan nimomachtis? ¿Monekis uejka nitekipanoti uan nikinkajteuas inselti nofamilia?” (Filip. 1:10). Amo tikseliskej tekitl tla amo techpaleuis matikchiuakan tlen Jehová kipaktia maski amo okachi onka kanin titekipanoskej. Ijkon tikteititiskej “timoyekanaj ika tlen tikneltokaj” uan tikmatokej Jehová techmakas tlen ika timopanoltiskej (Mat. 6:33; xiktlajtolti Hebreos 13:5).

7, 8. ¿Ken okiteititi Javier ‘moyekana ika tlen kineltoka’? (Noijki xikita foto).

⁷ Tokni Javiera tlen chanti Sudamérica kilnamiktok miak ipati matimoyekanakan ika tlen tikneltokaj. Ye okijto: “Kanin onitekipanouaya onechiluijkej okatka okse tekitl kanin okachi niktlaniskia tomin. Ikinon onikijto nechpaktiskia ompa nitekipanos”. Pero Javier okinekiaya mochiuas precursor. Noijki okijto: “Oniktlali se tonal para manechtlajtlani seki tlamantli akin ompa otlayekanaya. Pero ijkuak ayamo oniaya ixpan non tlakatl, oniktlatlaujti Jehová porque onikmatiaya ye okachi kimati tlen nechpaleuiskia. Oniknekiaya nikpias non tekitl pero amo nikseliskia tla amo nechpaleuiskia okachi maniktekichiuili Jehová”.

⁸ Javier okijto: “Ijkuak onechtlajtlani seki tlamantli akin ompa otlayekanaya, onechilui omonekiaya miak uelta okachi nitekipanos. Onikyekilui amo uelis ijkon nikchiuaskia porque ayakmo okachi niktekichiuiliskia toTajtsin Dios”. Javier amo okiseli non tekitl uan opanok ome semana omochi precursor. Satepan okajsik se tekitl kanin tekipanoskia san kanaj keski tonal. Ye okijto: “Jehová okikak tlen oniktlatlaujti uan onechpaleui manikajsi tekitl tlen nechpaleuia maniyeto precursor. Nipaki porque nikpia se tekitl tlen nechpaleuia okachi maniktekichiuili Jehová uan manikinpaleui tokniuan”.

9. ¿Tlen techmachtia tlen okichi Trésor?

⁹ ¿Tlen tikchiuaskej tla tikitaj tekitl tlen tikpiaj amo techpaleuia ‘matimoyekanakan ika tlen tikneltokaj’? Matikitakan tlen okichi se tokni itoka Trésor tlen chanti Congo. Ye okijto: “Onikajsik se tekitl tlen sapanoua onechpaktiaya. Okachi miak onechtlaxtlauiayaj uan onechtlakaitayaj”. Pero Trésor miak uelta amo omonechiko porque omonekiaya okachi tekipanos. Okiluiayaj matlakajkayaua porque amo okinekiayaj makimatikan tlen amo kuali okichiuayaj kanin otekipanouaya. Ayakmo okinekiaya ompa tekipanos pero omomojtiaya kox kajsiskia okse tekitl. ¿Tlen okipaleui kuali makipejpena tlen kichiuaskia? Ye okijto: “Habacuc 3:​17-19 onechpaleui manikajsikamati Jehová nechmaluiskia maski amo nikpiaskia tomin. Ikinon onikka non tekitl”. Noijki okijto: “Akinmej tlayekanaj mokuayejyekouaj tla kuali kintlaxtlauiskej akinmej ompa tekipanouaj, kichiuaskej san tlen kinnauatiskej, maski ayakmo majxiliskej yetoskej inuan infamilia uan maski ayakmo kiueyichiuaskej Jehová. Axkan nipaki porque okachi nikpatioita nimouikas iuan Jehová uan nofamilia. Opanok se xiuitl uan Jehová onechpaleui manikajsi se tekitl tlen nechpaleuia manikpia tlen ika nimopanoltis. Noijki nechpaleuia manimajxili okachi nitetlapouis. Xamo amo okachi tikpiaskej tomin ijkuak okachi tiktekichiuiliskej Jehová pero ye techmaluis uan techmakas tlen techpoloua”. Tla tikneltokaj tlen techiluia Jehová uan nochi tlen yokijto kichiuas, techpaleuis ‘matimoyekanakan ika tlen tikneltokaj’ uan ye techteochiuas.

¿TLEN TIKCHIUASKEJ IJKUAK TIKPEJPENASKEJ AKIN IUAN TIMONAMIKTISKEJ?

10. ¿Tlen kichiua akin moyekana ‘ika tlen kita’ ijkuak kipejpena akin iuan monamiktis?

¹⁰ Jehová okitlali matimonamiktikan ikinon amo tlajtlakoli tla tiknekij timonamiktiskej. Se tokni xamo kita ken iyelis akin iuan monamiktis, ken mota, tlen kichiua, ken kinmitaj oksekimej, kox kipia tomin, kox kimaluia ifamilia uan kox kitlasojtlas. Non tlamantli miak ipati pero tla san kitas non tlamantli kiteititis san moyekana ‘ika tlen kita’.

11. ¿Ken tikteititiskej “timoyekanaj ika tlen tikneltokaj” ijkuak tikpejpenaskej akin iuan timonamiktiskej? (1 Corintios 7:39).

¹¹ Jehová kipatioita ijkuak tokniuan kitlakamatij iTlajtol ijkuak kipejpenaj akin iuan monamiktiskej. Yejuan kitlakamatij iTlajtol kanin kijtoua mamonamiktikan ijkuak yiuejueyij (1 Cor. 7:36). Noijki moyekanaj ika itlanauatil Jehová kanin kijtoua moneki makitakan ken iyelis akin kinekij iuan monamiktiskej (Prov. 31:​10-13, 26-28; Efes. 5:33; 1 Tim. 5:8). Yejuan kilnamiktokej moneki monamiktiskej san iuan akin kichiua ken toTeko. Ikinon amo kiseliaj monamiktiskej iuan akin amo kitekichiuilia toTajtsin Dios ijkon ken kijtoua 1 Corintios 7:39. (Xiktlajtolti). Yejuan ‘moyekanaj ika tlen kineltokaj’ porque kilnamiktokej Jehová kimati tlen okachi kinpaleuis (Sal. 55:22).

12. ¿Tlen techmachtia tlen okipanok Rosa?

¹² Matikitakan tlen okipanok se precursora itoka Rosa uan chanti Colombia. Ye opejki mouika iuan se tlakatl tlen amo iTlaixpantijka Jehová uan okiuelitaya non tlakatl. Ye okijto: “Onikitaya yolkuali porque otlapaleuiaya itech ialtepe, okichiuaya tlen kuali, amo otlachichinaya, amo okiyekouaya drogas nion otlauanaya. Onechpaktiaya ken onechtlapouiaya. Okichiuaya miak tlamantli tlen nechpaktiskia makichiua akin niknekiskia iuan monamiktis. Pero ye amo okitekichiuiliaya toTajtsin Dios”. Noijki okijto: “Onikitak oui nikiluis amo niyetoskia inovia porque onikuelitaya. Ijkuakon oniknekiaya nimonamiktis porque noselti onimomachiliaya. Pero amo onikixmatiaya se tokni tlen uelis iuan nimonamiktiskia”. Rosa amo san omoyekanki ika tlen okitak. Ye omokuayejyeko tla monamiktiskia iuan non tlakatl ayakmo kuali mouikaskia iuan Jehová. Ikinon ayakmo omotlapoui iuan non tlakatl uan opejki okachi kitekichiuilia toTajtsin Dios. Satepan okiyolejkej makiseliti Tlamachtil para akinmej tetlapouiaj Tekiuajkayotl uan okiluijkej matlapaleui ken precursora especial. Rosa okijto: “Jehová nechpaleuia okachi maniyolpaki”. Xamo tikitaj oui ‘timoyekanaskej ika tlen tikneltokaj’ porque ualeua tiknekij tikchiuaskej tlen techyoltilana. Pero okachi techpaleuis tla timokuayejyekoskej ijkon ken Jehová mokuayejyekoua.

¿TLEN TIKCHIUASKEJ IJKUAK IALTEPE JEHOVÁ ITLAJ TECHNAUATIA?

13. ¿Tlen kichiua akin moyekana ‘ika tlen kita’ ijkuak ialtepe Jehová technauatia itlaj matikchiuakan?

¹³ Ialtepe Jehová techinualtitlanilia tlanauatilmej tlen techpaleuiaj okachi kuali matiktekichiuilikan toTajtsin Dios. Kinualtitlanilia tlayekankej, tlayekankej itech circuito, akinmej kiyekanaj Betel noso Cuerpo Gobernante. Ualeua amo tikajsikamatij tleka technauatiaj matikchiuakan seki tlamantli. ¿Tlen tikchiuaskej? ¿San timokuayejyekojtoskej amo techpaleuis tlen technauatiaj matikchiuakan? ¿San tikilnamiktokej tlen amo kuali kichiuaj tokniuan tlen technauatiaj? Tla ijkon tikchiuaskej tikteititiskej “timoyekanaj ika tlen tikitaj”.

14. ¿Ken tikteititiskej “timoyekanaj ika tlen tikneltokaj” ijkuak ialtepe Jehová itlaj technauatia? (Hebreos 13:17).

¹⁴ Ijkuak “timoyekanaj ika tlen tikneltokaj”, tikteititiaj tikneltokaj Jehová kimati tlen kichiua uan noijki kimati tlen uelis tikchiuaskej. Ikinon san niman titetlakamatij uan tikchiuaj ika nochi toyolo (xiktlajtolti Hebreos 13:17). Ijkon tikinpaleuiskej tokniuan san sekan mayetokan (Efes. 4:​2, 3). Tikilnamiktokej Jehová techteochiuas tla tikchiuaj tlen technauatiaj tokniuan maski tlajtlakolejkej (1 Sam. 15:22). Noijki tla monekis itlaj kiyektlalis Jehová, ye kimati keman ijkon kichiuas (Miq. 7:7).

15, 16. ¿Tlen okipaleui Kevin ‘mamoyekana ika tlen tikneltokaj’? (Noijki xikita foto).

¹⁵ Matikitakan tlen panoua ijkuak “timoyekanaj ika tlen tikneltokaj”. Ompa Perú tlajtouaj español pero miakej tlajtouaj okseki tlajtoli. Sekimej tlajtouaj quechua. Tokniuan miak xiuitl okintemojtinemiayaj akinmej tlajtouaj non tlajtoli. Pero okipatlakej seki tlamantli para kintlakamatiskej tlanauatilmej tlen kinpiaj itech non altepetl (Rom. 13:1). Ikinon opejki motlajtlaniaj ken kinmajsiskiaj akinmej tlajtouaj quechua. Tokniuan otetlakamatkej ikinon Jehová okinteochi uan okinpaleui makinmajsikan miakej akinmej tlajtouaj non tlajtoli.

¹⁶ Se tlayekanki tlen itoka Kevin uan otlapaleuiaya itech tlanechikol kanin tlajtouaj quechua, omotlajtlaniaya kox kinpaleuiskia tlen okinnauatijkej. Ye okijto: “Ne onimotlajtlaniaya ken uelis tikinmajsiskej akinmej tlajtouaj quechua”. ¿Tlen okichi tokni? Ye okijto: “Onimokuayejyeko tlen kijtoua Proverbios 3:5. Noijki onimokuayejyeko tlen okichi Moisés ijkuak Jehová okinauati makinkixti israelitas ompa Egipto uan makinuika mar Rojo. Ijkuak ompa oajsitoj omotaya amikaj uelis kinpaleuiskia. Pero Moisés otetlakamatki uan okipaleui makichiua se milagro” (Éx. 14:​1, 2, 9-11, 21, 22). Kevin opejki kichiua tlen okinnauatijkej. Ye okijto tlen opanok: “Jehová sapanoua otechteochi. Achto uejka otinejnemiayaj ijkuak otitetlapouiayaj uan ualeua san kanaj keski otikinmajsiayaj tlen tlajtouaj quechua. Pero axkan titetlapouiaj kanin katej miakej tlen tlajtouaj non tlajtoli. Miakej tikintlapouiaj uan tiauij oksepa tikintlajpalotiuij uan miakej tikinmachtiaj. Noijki okachi miakej touan yauij monechikotiuij”. Nin kiteititia Jehová techteochiuas tla nochipa “timoyekanaj ika tlen tikneltokaj”.

17. ¿Tlen otimomachtijkej?

¹⁷ Axkan otikitakej eyi tlamantli tlen kiteititia ken ‘timoyekanaskej ika tlen tikneltokaj’. Nochipa ijkon matikchiuakan. Ijkon matikchiuakan ijkuak tikpejpenaskej tlen ika timoyolpaktiskej, kox okachi timomachtiskej uan ken tikinmiskaltiskej tokoneuan. Ijkuak tikpejpenaskej tlen tikchiuaskej, matikilnamiktokan okachi miak ipati timouikaskej iuan Jehová, matiktlakamatikan tlen techiluia, matikilnamiktokan ye yokijto techmaluis uan amo matimoyekanakan san ‘ika tlen tikitaj’. Ijkon “nochipa tinemiskej itech itoka Jehová toDios” (Miq. 4:5).